తెలుగు, తమిళ సినీ పరిశ్రమల్లో ఒకప్పుడు యాక్షన్ చిత్రాలకు కేరాఫ్ అడ్రస్గా నిలిచిన నటుడు భానుచందర్. వరుస సూపర్ హిట్ సినిమాలతో హీరోగా తనదైన ముద్ర వేసిన ఆయన, స్టైల్, గంభీరమైన డైలాగ్ డెలివరీ, పవర్ఫుల్ యాక్షన్ సన్నివేశాలతో ప్రేక్షకుల మనసుల్లో ప్రత్యేక స్థానం సంపాదించుకున్నారు. హీరోగా కెరీర్ పీక్లో ఉన్నప్పటికీ, కాలానుగుణంగా సహాయక పాత్రలకు మారి కూడా తన నటనా ప్రతిభను నిరూపించుకున్న అరుదైన నటుల్లో భానుచందర్ ఒకరు.
1978లో విడుదలైన ‘మన ఊరి పాండవులు’ సినిమాతో ఆయన సినీ ప్రయాణం ప్రారంభమైంది. తొలి చిత్రంతోనే మంచి గుర్తింపు తెచ్చుకున్న భానుచందర్, ఆ తర్వాత ‘బెబ్బులి’, ‘వంశ గౌరవం’, ‘ఇద్దరు కిలాడీలు’, ‘ఆడవాళ్లు మీకు జోహార్లు’, ‘సత్యం శివం’, ‘మెరుపు దాడి’, ‘రేచుక్క’, ‘పున్నమి రాత్రి’ వంటి సినిమాలతో బ్యాక్ టు బ్యాక్ హిట్స్ అందుకున్నారు. ముఖ్యంగా యాక్షన్ కథలతో తెరకెక్కిన చిత్రాల్లో ఆయన నటన అప్పటి యువతను విపరీతంగా ఆకట్టుకుంది. తెలుగుతో పాటు తమిళ చిత్రాల్లోనూ నటించి అక్కడ కూడా మంచి ఫ్యాన్ బేస్ను సంపాదించారు.
భానుచందర్ కెరీర్లో కీలక మైలురాయిగా నిలిచిన చిత్రం 1986లో విడుదలైన ‘నిరీక్షణ’. ఈ సినిమాలో ఆయన పోషించిన పాత్రకు విమర్శకుల ప్రశంసలతో పాటు అవార్డులు కూడా దక్కాయి. అయితే, కాలక్రమేణా హీరోగా వరుస పరాజయాలు ఎదురవడంతో క్యారెక్టర్ ఆర్టిస్టుగా మారారు. అయినప్పటికీ, సెకండ్ ఇన్నింగ్స్లో తండ్రి పాత్రలు, కీలక సహాయక పాత్రల ద్వారా తన అనుభవాన్ని, నటనా పరిపక్వతను తెరపై సమర్థవంతంగా ఆవిష్కరించారు.
ఇటీవల 71 ఏళ్ల వయసులో భానుచందర్ వృద్ధాప్య లుక్లో కనిపిస్తున్న ఫొటోలు సోషల్ మీడియాలో వైరల్ అవుతున్నాయి. ఒకప్పుడు పవర్ఫుల్ యాక్షన్ హీరోగా ప్రేక్షకులను ఆకట్టుకున్న ఆయనను ఈ రూపంలో చూసి అభిమానులు ఆశ్చర్యంతో పాటు నాస్టాల్జియాకు లోనవుతున్నారు.
