విద్యను ఆధునీకరించేందుకు మంత్రి నారా లోకేష్ చొరవ
ఆంధ్రప్రదేశ్ రాష్ట్ర ప్రభుత్వం విద్యా రంగాన్ని ఆధునీకరించేందుకు గట్టి అడుగులు వేస్తోంది. విద్య, ఐటీ శాఖల మంత్రి నారా లోకేష్ నేతృత్వంలో పాఠశాల విద్య, ఇంటర్మీడియట్, నైపుణ్యాభివృద్ధి, శిక్షణ శాఖల అధికారులతో సమీక్ష నిర్వహించారు.
ఈ సమీక్షలో మంత్రి, ప్రభుత్వ ఉన్నత పాఠశాలలన్నింటిలో కంప్యూటర్ ల్యాబ్స్, ఇంటర్నెట్ సదుపాయాలు తప్పనిసరిగా ఉండేలా చర్యలు తీసుకోవాలని అధికారులను ఆదేశించారు. ఇది ప్రభుత్వ పాఠశాల విద్యార్థులకు డిజిటల్ పరిజ్ఞానాన్ని అందించే దిశగా పెద్ద మైలురాయి కానుంది.
ఇది కూడా చదవండి 👉 మంగళగిరిలో వంద పడకల ఆసుపత్రి నిర్మాణం వేగంగా కొనసాగుతోంది
అటల్ టింకరింగ్ ల్యాబ్స్తో విద్యార్థుల్లో ఆవిష్కరణ పుట్టింపునే లక్ష్యం
రాష్ట్రవ్యాప్తంగా విద్యార్థుల్లో సైన్స్, టెక్నాలజీ, ఇంజనీరింగ్, మ్యాథమెటిక్స్ (STEM) పట్ల ఆసక్తిని పెంచేందుకు అటల్ టింకరింగ్ ల్యాబ్స్ ను అమలు చేయనున్నట్లు మంత్రి వెల్లడించారు.
ఈ ల్యాబ్స్ ద్వారా విద్యార్థులలో ఆలోచనా శక్తి, ఆవిష్కరణ సామర్థ్యం, ప్రాజెక్ట్ ఆధారిత విద్యా విధానాలు బలపడతాయని ఆయన అభిప్రాయపడ్డారు.
సెప్టెంబర్ 1 నుంచి ప్రారంభం కానున్న నైపుణ్య పోర్టల్
సెప్టెంబర్ 1వ తేదీన ‘నైపుణ్య పోర్టల్’ ను ప్రారంభించేందుకు కూటమి ప్రభుత్వం సన్నాహాలు చేస్తోంది. ఈ పోర్టల్ ద్వారా:
- యువతకు ఉపాధి అవకాశాలు
- శిక్షణ కార్యక్రమాలు
- ఇంటర్న్షిప్లు
- అంతర్జాతీయ ఉద్యోగ అవకాశాల సమాచారం
ఒకే వేదికలో అందుబాటులో ఉంటాయని మంత్రి నారా లోకేష్ తెలిపారు.
బోర్డు ఆఫ్ సెకండరీ ఎడ్యుకేషన్ పునర్వ్యవస్థీకరణ
బోర్డు ఆఫ్ సెకండరీ ఎడ్యుకేషన్ను నిపుణుల సలహాలతో పునః వ్యవస్థీకరించేందుకు చర్యలు చేపట్టారు. ఈ బోర్డు కార్యకలాపాలపై త్వరలో సమావేశం నిర్వహించనున్నట్లు వెల్లడించారు.
పాఠశాల ఎన్రోల్మెంట్ డ్రైవ్పై సమీక్ష
ఉండవల్లి నివాసంలో జరిగిన సమీక్షలో అధికారులు పాఠశాల ఎన్రోల్మెంట్ డ్రైవ్ ద్వారా ఇప్పటివరకు ప్రభుత్వ పాఠశాలల్లో విద్యార్థుల ప్రవేశాలపై పవర్ పాయింట్ ప్రజెంటేషన్ ద్వారా మంత్రి ముందు వివరించారు.
ప్రతి జిల్లాలో నైపుణ్య అభివృద్ధి అధికారులు
ఇకపై ప్రతి జిల్లాలో ఉపాధి కల్పన అధికారుల స్థానంలో నైపుణ్య అభివృద్ధి అధికారులను నియమించనున్నారు. ఈ అధికారుల ఆధ్వర్యంలో:
- జాబ్ మేళాలు
- శిక్షణ కార్యక్రమాలు
- యువతకు ఉపాధి అవకాశాలు
సాధించేందుకు చర్యలు తీసుకుంటామని మంత్రి స్పష్టం చేశారు.
విదేశాల్లో ఉపాధికి సమాచారం, హెల్ప్లైన్లు
విదేశాల్లో ఉద్యోగ అవకాశాల కోసం వెళ్లే యువతకు అవసరమైన మార్గదర్శకాలు, హెల్ప్లైన్లు, సలహా కేంద్రాలు ఏర్పాటు చేయనున్నట్లు తెలిపారు.
సంప్రదించాల్సిన నెంబర్లు:
- హెల్ప్లైన్ నంబర్: 0863-2340678
- వాట్సాప్ నంబర్: 85000 27678
