నందమూరి బాలకృష్ణ అంటేనే సందడి. ఆయన పేరు వినగానే అభిమానుల్లో ఒక ప్రత్యేక ఉత్సాహం కనిపిస్తుంది. స్టేజ్పై ఆయన మాటలు, జనాల్లో కలిసిపోయే తత్వం, పండుగ వేళల్లో చేసే హడావుడి… ఇవన్నీ బాలయ్య బ్రాండ్కు ట్రేడ్మార్క్లుగా నిలిచాయి. ముఖ్యంగా ప్రతి సంవత్సరం సంక్రాంతి పండుగకు ఆయన చేసే సందడి ప్రత్యేకంగా చెప్పుకోవాల్సిందే.
ప్రతి ఏటా తన సంక్రాంతి సినిమా విడుదల అనంతరం, బావ కం వియ్యంకుడు చంద్రబాబు నాయుడు స్వగ్రామమైన నారావారిపల్లెకు కుటుంబ సమేతంగా వెళ్లడం బాలయ్యకు అలవాటే. అక్కడ ఆయన చేసే సందడి సోషల్ మీడియాలో ఎప్పుడూ వైరల్ అవుతుంటుంది. కానీ ఈసారి మాత్రం ఆ దృశ్యం కనిపించకపోవడం రాజకీయ, సినీ వర్గాల్లో చర్చకు దారి తీసింది.
నారావారిపల్లెలో కనిపించని బాలయ్య
ఈ ఏడాది సంక్రాంతి వేళ నారావారిపల్లెలో బాలయ్య కనిపించకపోవడం అభిమానులను ఆశ్చర్యానికి గురి చేసింది. అయితే ఆయన సతీమణి వసుంధర, సోదరుడు రామకృష్ణ కుటుంబ సమేతంగా అక్కడ సందడి చేశారు. కానీ బాలయ్య లేకపోవడం మాత్రం స్పష్టంగా లోటుగా కనిపించిందనే అభిప్రాయం వ్యక్తమవుతోంది.
సాధారణంగా బాలయ్య నారావారిపల్లెకు వెళ్తే, తన మనవడిని వెంటేసుకుని ఎడ్లబండి తోలడం, గ్రామస్తులతో కలిసిపోయి చుట్టుపక్కల తిరగడం, పిల్లలతో సరదాగా గడపడం వంటి దృశ్యాలు కనిపిస్తాయి. ఇవన్నీ ఫ్యాన్స్కు పండుగ విందుల్లాంటివి. కానీ ఈసారి ఆ ఎనర్జీ ఎక్కడా కనిపించలేదు.
గతంలో కనిపించిన హడావుడి… ఇప్పుడు మౌనం
ఇది కొత్త విషయం కాదు. గతేడాది అక్టోబర్లో విజయవాడలో జరిగిన దసరా ఉత్సవాల్లో బాలయ్య వేదికపై సందడి చేశారు. అక్కడ ఆయన చేసిన ప్రసంగం, చూపించిన ఎనర్జీ అభిమానులను ఆకట్టుకుంది. ఆ తర్వాత ‘అఖండ–2’ సినిమా ప్రమోషన్స్లోనూ బాలయ్య ఫుల్ యాక్టివ్గా కనిపించారు.
గత ఏడాది డిసెంబర్ 12న ‘అఖండ–2’ సినిమా విడుదలైంది. సినిమా ప్రమోషన్స్లో భాగంగా బాలయ్య వరుస ఇంటర్వ్యూలు, సక్సెస్ మీట్స్లో పాల్గొన్నారు. వారణాసి పర్యటన కూడా చేశారు. సినిమా విడుదలైన వారం రోజుల వరకూ ఆయన మీడియా ముందుకు వచ్చారు. ఆ తర్వాత మాత్రం ఒక్కసారిగా ఆయన కనిపించకపోవడం గమనార్హం.
మధ్యలో తన సొంత నియోజకవర్గమైన హిందూపురంకు వెళ్లినప్పటికీ, కొత్త ఏడాది సందర్భంగా కానీ, సంక్రాంతి సందర్భంగా కానీ బాలయ్య నుంచి ఎలాంటి అధికారిక అప్డేట్స్ రాలేదని అభిమానులు అంటున్నారు.
దీపావళి హడావుడి గుర్తొస్తోంది
గత ఏడాది దీపావళి సమయంలో బాలయ్య తన ఇంటి ముంగిట బాణాసంచా కాలుస్తూ చేసిన హడావుడి వీడియోలు, ఫోటోలు సోషల్ మీడియాలో బాగా వైరల్ అయ్యాయి. కానీ ఈసారి సంక్రాంతి వేళ మాత్రం అలాంటి ఎలాంటి దృశ్యాలు బయటకు రాకపోవడంతో ఫ్యాన్స్ కొంత నిరాశకు గురవుతున్నారని సమాచారం.
టాలీవుడ్లో మిగతా సీనియర్లు ఫుల్ హుషార్
ఇదే సమయంలో టాలీవుడ్లో మిగతా సీనియర్ హీరోలు మాత్రం సంక్రాంతి సందడిలో మునిగిపోయారు. మెగాస్టార్ చిరంజీవి తాజా చిత్రం సూపర్ హిట్ కావడంతో, ఆ సక్సెస్పై వరుస ఇంటర్వ్యూలు ఇస్తూ అభిమానులకు కనువిందు చేశారు. ఆ సినిమాలో కామియో రోల్లో నటించిన విక్టరీ వెంకటేష్ కూడా చిరంజీవితో కలిసి మీడియా ముందుకు వచ్చి సందడి చేశారు.
ఇక అక్కినేని నాగార్జున తమ అన్నపూర్ణ స్టూడియోకు 50 వసంతాలు పూర్తైన సందర్భంగా, కుటుంబ సమేతంగా, స్టాఫ్ సిబ్బందితో కలిసి సంక్రాంతిని ఘనంగా జరుపుకుంటూ కనిపించారు. ఇలా టాలీవుడ్ టాప్ సీనియర్ హీరోలంతా పండుగ వేళ యాక్టివ్గా కనిపిస్తే, బాలయ్య మాత్రం మిస్ కావడం అభిమానులను ఆలోచనలో పడేసింది.
అభిమానుల ఆశ – త్వరలో బాలయ్య రీఎంట్రీ కావాలి
ఈ పరిస్థితుల్లో బాలయ్య అభిమానులు ఒకటే కోరుకుంటున్నారు. త్వరలో కొత్త సినిమా షూటింగ్తో అయినా, లేదా ఏదైనా పబ్లిక్ ఈవెంట్తో అయినా తమ హీరో మళ్లీ అదే ఎనర్జీతో కనిపించాలని ఆశిస్తున్నారు. బాలయ్య స్టైల్ ఎప్పుడూ ప్రత్యేకమే. అందుకే ఆయన రీఎంట్రీ కోసం ఫ్యాన్స్ ఆసక్తిగా ఎదురు చూస్తున్నారు.
