ఇజ్రాయెల్‌లో భారతీయులకు హై అలర్ట్: అత్యవసరమైతే తప్ప బయటకు రావొద్దు – కేంద్రం హెచ్చరిక

Israel Advisory for Indians | AP News Hunt

పశ్చిమాసియాలో ఉద్రిక్త పరిస్థితులు వేగంగా మారుతున్న నేపథ్యంలో భారత్ తన పౌరుల భద్రతపై కీలక నిర్ణయం తీసుకుంది. ఇరాన్–అమెరికా మధ్య ముదురుతున్న యుద్ధ మేఘాల ప్రభావం ఇజ్రాయెల్‌పై పడే అవకాశముందని నిఘా వర్గాలు హెచ్చరించడంతో, కేంద్ర విదేశాంగ శాఖ (MEA) ఇజ్రాయెల్‌లో నివసిస్తున్న భారతీయులకు తాజాగా హై అలర్ట్ అడ్వైజరీ జారీ చేసింది.

అనవసరంగా బయటకు రావొద్దని స్పష్టీకరణ

ఇజ్రాయెల్‌లో ప్రస్తుతం సుమారు 40 వేల మందికి పైగా భారతీయులు నివసిస్తున్నారు. వీరిలో ఐటీ నిపుణులు, నర్సింగ్ సిబ్బంది, విద్యార్థులు ఎక్కువ సంఖ్యలో ఉన్నారు. ప్రస్తుత భద్రతా పరిస్థితుల దృష్ట్యా అత్యవసరమైతే తప్ప బయటకు రావొద్దని, స్థానిక భద్రతా సంస్థలు జారీ చేసే మార్గదర్శకాలను కచ్చితంగా పాటించాలని భారత ఎంబసీ సూచించింది.

ప్రయాణాలు వాయిదా వేసుకోవాలని సూచన

ఇజ్రాయెల్‌కు కొత్తగా ప్రయాణించాలనుకునే భారతీయులు తమ ప్రయాణాలను తాత్కాలికంగా వాయిదా వేసుకోవాలని విదేశాంగ శాఖ స్పష్టం చేసింది. ఇప్పటికే అక్కడ ఉన్నవారు కూడా అనవసర ప్రయాణాలు మానుకోవాలని, పెద్ద సమావేశాలు, బహిరంగ ప్రదేశాలకు వెళ్లకుండా ఉండాలని కోరింది. ఇదే తరహా హెచ్చరికలను అమెరికా, బ్రిటన్ ప్రభుత్వాలు కూడా తమ పౌరులకు జారీ చేయడం గమనార్హం.

ఇరాన్‌లోని భారతీయులపై కూడా ఆందోళన

మరోవైపు, ఇరాన్‌లో అంతర్గత అల్లర్లు, అమెరికా సైనిక చర్యల ముప్పు పెరుగుతున్న నేపథ్యంలో అక్కడ ఉన్న సుమారు 10 వేల మంది భారతీయుల భద్రతపై కూడా భారత్ దృష్టి సారించింది. టెహ్రాన్‌లోని భారత రాయబార కార్యాలయం విద్యార్థులు, పర్యాటకులు తక్షణమే వాణిజ్య విమానాల ద్వారా దేశం విడిచి రావాలని సూచించింది.

24×7 హెల్ప్‌లైన్ నంబర్లు ఏర్పాటు

ఏవైనా అత్యవసర పరిస్థితుల్లో సహాయం అందించేందుకు భారత ఎంబసీ 24×7 హెల్ప్‌లైన్ సేవలు అందుబాటులో ఉంచింది.
ఇజ్రాయెల్‌లో ఉన్న భారతీయులు ఈ నంబర్‌ను సంప్రదించవచ్చు:
+972-54-7520711

అలాగే, ఇజ్రాయెల్‌లో నివసిస్తున్న భారతీయులు తప్పనిసరిగా భారత ఎంబసీ వెబ్‌సైట్‌లో తమ వివరాలను నమోదు చేసుకోవాలని, రాయబార కార్యాలయంతో నిరంతరం టచ్‌లో ఉండాలని అధికారులు సూచించారు.