ఆంధ్రప్రదేశ్ మాజీ ముఖ్యమంత్రి వైఎస్ జగన్మోహన్రెడ్డి ఇటీవల ఒక ప్రెస్మీట్లో చేసిన వ్యాఖ్యలు ఇప్పుడు రాజకీయ వర్గాల్లో చర్చనీయాంశంగా మారాయి. “పార్టీ నడపడానికి ఇబ్బందులు పడుతున్నాం… ఎవరికైనా డబ్బులు ఉంటే సాయం చేయండి” అని జగన్ సరదాగా అన్న మాటలు ఇప్పుడు నిజం అవుతున్నట్టుగా అనిపిస్తోంది. ఎందుకంటే తాజాగా ప్రూడెంట్ ఎలక్టోరల్ ట్రస్ట్ ఎన్నికల కమిషన్కు సమర్పించిన నివేదిక ప్రకారం — వైఎస్ఆర్ కాంగ్రెస్ పార్టీకి రూ.98 కోట్లు విరాళంగా ఇచ్చింది.
మొత్తం మీద 2024–25 ఆర్థిక సంవత్సరంలో వైసీపీకి రూ.140 కోట్ల విరాళాలు వచ్చినట్టు వివరాలు చెబుతున్నాయి. అధికారంలో లేని పార్టీకి ఇంత భారీ విరాళాలు రావడం రాజకీయంగా పెద్ద చర్చకు దారితీసింది. సాధారణంగా అధికారంలో ఉన్న పార్టీలకు కార్పొరేట్ విరాళాలు రావడం సహజం. కానీ వైసీపీ మాత్రం అధికారాన్ని కోల్పోయిన తర్వాత కూడా విరాళాల్లో రికార్డు సృష్టించింది.
2023–24లో ఎన్నికల సంవత్సరం కావడంతో వైసీపీకి రూ.184 కోట్ల విరాళాలు రావడం సహజమనే అనిపించింది. అయితే అధికారాన్ని కోల్పోయిన తర్వాత కూడా రూ.140 కోట్ల డొనేషన్లు రావడం అనుమానాలకు తావిస్తోంది. ముఖ్యంగా, టెలంగాణలో బీఆర్ఎస్ పార్టీకి విరాళాలు 97% తగ్గి కేవలం రూ.10 కోట్లకు చేరడం మరో ఆసక్తికర అంశంగా నిలిచింది.
ప్రూడెంట్ ఎలక్టోరల్ ట్రస్ట్ అంటే ఏమిటి?
ఇది కార్పొరేట్ సంస్థలు రాజకీయ పార్టీలకు డబ్బు పంపే మధ్యవర్తి వేదిక. కంపెనీలు నేరుగా పార్టీకి విరాళాలు ఇవ్వకుండా, ఈ ట్రస్ట్ ద్వారా చెల్లిస్తాయి. దీంతో డబ్బు ఎక్కడినుంచి వచ్చిందో ప్రజలకు తెలియదు. ఎలక్టోరల్ బాండ్లను సుప్రీంకోర్టు రద్దు చేసిన తర్వాత, ఈ ట్రస్టుల ప్రాధాన్యం మరింత పెరిగింది.
ఇప్పుడేమో, జగన్ బినామీల కంపెనీలు ఈ ట్రస్ట్కు డబ్బులు పంపి, అక్కడినుంచి తిరిగి వైసీపీకి విరాళాలుగా మళ్లించారనే అనుమానాలు వ్యక్తమవుతున్నాయి.
ఎవరి కంపెనీలు విరాళాలు ఇచ్చాయి?
ప్రూడెంట్ ఎలక్టోరల్ ట్రస్ట్తో పాటు —
- నాట్కో ప్రైవేట్ లిమిటెడ్,
- ప్రోగ్రెసివ్ ఎలక్టోరల్ ట్రస్ట్,
- వర్సిటీ ఎడ్యుకేషన్ మేనేజ్మెంట్ వంటి సంస్థలు కూడా రూ.10 కోట్లు చొప్పున విరాళాలు ఇచ్చాయి.
ఇవన్నింటిలో “వర్సిటీ ఎడ్యుకేషన్ మేనేజ్మెంట్” సంస్థ వార్షిక ఆదాయం పది కోట్లు కూడా కాకపోవడం ప్రత్యేక దృష్టిని ఆకర్షిస్తోంది. ఇంత చిన్న కంపెనీ ఇంత భారీ విరాళం ఎలా ఇచ్చిందన్న ప్రశ్న ఇప్పుడు కేంద్రంలో నిలిచింది.
లోటు పూడ్చడానికేనా ఈ విరాళాలు?
2023–24లో వైసీపీ మొత్తం రూ.184 కోట్ల ఆదాయం చూపించింది. కానీ పార్టీ ఖర్చు మాత్రం రూ.295 కోట్లు. అంటే దాదాపు రూ.104 కోట్ల లోటు. అందుకే ఈ సంవత్సరం రూ.140 కోట్ల విరాళాలు చూపించడం ద్వారా ఆ లోటును కవర్ చేసే ప్రయత్నమా అన్న అనుమానం రాజకీయ విశ్లేషకుల్లో వ్యక్తమవుతోంది.
ప్రజల్లో చర్చ, రాజకీయ వేడి
ఒకవైపు జగన్ “పార్టీ నడవడం కష్టం” అంటుంటే, మరోవైపు కార్పొరేట్ ట్రస్టులు కోట్ల రూపాయల విరాళాలు ఇవ్వడం — ప్రజల్లో అనేక ప్రశ్నలు రేకెత్తిస్తోంది. ఇది నిజంగా కార్పొరేట్ సాయం మాత్రమేనా? లేక వైసీపీ సొంత నిధుల మార్పిడి పద్ధతేనా?
రాజకీయ వర్గాల అభిప్రాయం ప్రకారం, ఈ డొనేషన్ వ్యవహారం రాబోయే రోజుల్లో రాష్ట్ర రాజకీయాల్లో వేడి పెంచే అవకాశం ఉంది.
