వైఎస్సార్ కాంగ్రెస్ పార్టీ అధ్యక్షుడు వైఎస్ జగన్ మోహన్ రెడ్డి తన రాజకీయ జీవితంపై ఆసక్తికరమైన వ్యాఖ్యలు చేశారు. తాడేపల్లిలోని వైసీపీ కేంద్ర కార్యాలయంలో నిర్వహించిన పార్టీ యువజన విభాగం సమావేశంలో, ఆయన తన రాజకీయ ప్రస్థానం ఎలా ప్రారంభమైంది, ఎలాంటి సవాళ్లను ఎదుర్కొన్నారన్న విషయాలను వివరిస్తూ, యువతకు స్పష్టమైన మార్గనిర్దేశం చేశారు.
జగన్ మాట్లాడుతూ, “ప్రజలతో నిత్యం అనుసంధానంలో ఉండటం రాజకీయ నాయకుడి ప్రాధాన్యమైన బాధ్యత. ఇందుకోసం సోషల్ మీడియాను బలంగా ఉపయోగించాలి,” అని యువజన నేతలకు సూచించారు. తన రాజకీయ అరంగేట్రం రోజులను గుర్తుచేసుకుంటూ, పార్టీ ప్రారంభ సమయంలో తాను, తన తల్లి విజయమ్మ మాత్రమే ఉన్నామని, ఆ సమయంలో ఎదురైన ఒడిదుడుకుల్ని వివరించారు.
ఉపఎన్నికల్లో తన విజయం దేశవ్యాప్తంగా ప్రాచుర్యం పొందిందని, అప్పటినుంచి తనపై పగతీరు పెరిగిందని చెప్పారు. 18 మంది ఎమ్మెల్యేలు తమ పార్టీలోకి రావడంతో, రాజీనామాలు చేయించి తిరిగి ఉపఎన్నికలకు వెళ్లి గెలిచిన దాన్ని ఆయన గుర్తు చేశారు. 2014 ఎన్నికల్లో 67 స్థానాలు గెలిచినప్పటికీ, 23 మంది టీడీపీకి జారిపోయిన సంగతిని వివరించారు.
యువత రాజకీయంగా ఎదగాలంటే ప్రజల మధ్య ఉండాలి: జగన్
జనాల్లో ఉంటూ ప్రజల సమస్యలు తెలుసుకోవడమే నాయకుని నిజమైన లక్షణమని జగన్ హితవు పలికారు. విశ్వసనీయతను కాపాడుకోవడమే తన రాజకీయం అని చెప్పారు. యువ నాయకులు కూడా ప్రజల సమస్యలను ప్రభుత్వానికి వెల్లడిస్తూ సామాజిక మాధ్యమాలను ఒక ఆయుధంగా వాడుకోవాలన్నారు.
పార్టీని బలోపేతం చేయాలన్న సంకల్పంతో జోన్ల వారీగా యువజన అధ్యక్షులను నియమిస్తున్నట్లు తెలిపారు. సమర్థులైన నాయకులను పార్టీ నిర్మాణాత్మక వ్యవస్థల్లోకి తీసుకురావాలని, న్యాయ పోరాటాల్లో పార్టీ తరఫున యువత ముందుండాలన్నది జగన్ అభిప్రాయం.
