ప్రపంచ క్రైస్తవ చరిత్రలోనే ఓ అరుదైన, విశిష్ట ఘట్టానికి కేరళ వేదిక కాబోతోంది. ప్రపంచంలోనే అత్యంత పొడవైన, పూర్తిగా చేతితో రాసిన బైబిల్ త్వరలోనే భక్తుల ముందుకు రానుంది. ఏకంగా 100 కిలోమీటర్ల పొడవుతో రూపొందించిన ఈ మహాగ్రంథాన్ని కేరళ రాష్ట్రం త్రిసూర్లో ఆదివారం అధికారికంగా ఆవిష్కరించనున్నారు. ఈ చారిత్రక ఆవిష్కరణ కార్యక్రమాన్ని కార్డినల్ మార్ జార్జ్ కూవక్కాడ్ నిర్వహించనుండగా, సేక్రేడ్ హార్ట్ ఆఫ్ అవర్ లేడీ ఆఫ్ సారోస్ బసిలికా ప్రాంగణం దీనికి వేదికగా మారనుంది.
2025 జూబ్లీ ఇయర్ వేడుకలు, అలాగే త్రిసూర్ బసిలికా శతాబ్ది ఉత్సవాలను పురస్కరించుకుని ఈ వినూత్న ఆధ్యాత్మిక ప్రాజెక్టును చేపట్టారు. కేసీవైఎం త్రిసూర్ ఆర్చ్డియోసెస్, బసిలికా యాత్రికుల కేంద్రం సంయుక్త ఆధ్వర్యంలో ఈ మహత్తర కార్యం విజయవంతంగా పూర్తయింది. మొత్తం 2,025 మంది భక్తులు, యువజన ప్రతినిధులు కలిసి బైబిల్ను పూర్తిగా చేతితో రాయడం ఈ ప్రాజెక్టుకు ప్రత్యేక ఆకర్షణగా నిలుస్తోంది. ఇది వారి సామూహిక విశ్వాసానికి, అచంచల భక్తికి ప్రతీకగా నిలుస్తుందని నిర్వాహకులు పేర్కొంటున్నారు.
ఈ బైబిల్ను సాధారణ కాగితంపై కాకుండా, ప్రత్యేకమైన వస్త్రంలాంటి దీర్ఘకాలిక మెటీరియల్పై, ప్రత్యేకంగా తయారు చేసిన పెన్నుతో రాశారు. ఎన్నో సంవత్సరాల పాటు ఎలాంటి నష్టం లేకుండా భద్రంగా నిలిచేలా ఈ మెటీరియల్ను ఎంపిక చేసినట్లు తెలిపారు. “చేతితో రాసిన ఈ మహాగ్రంథాన్ని రోలర్లపై అమర్చాం. చదవాలనుకునే వారు రోలర్ను తిప్పుతూ ఒక్కో భాగాన్ని దర్శించవచ్చు. మొత్తం 12 భారీ రీళ్లలో ఈ బైబిల్ను భద్రపరిచాం. వీటిని బసిలికాలోని ప్రత్యేకంగా నిర్మించిన ‘బైబిల్ టవర్’లో ఉంచుతాం” అని రెవరెండ్ ఫాదర్ జియో చెరడాయ్ వివరించారు.
ఆదివారం ఉదయం 8:30 గంటలకు బసిలికా ప్రాంగణంలో ఆవిష్కరణ కార్యక్రమం ఘనంగా జరగనుంది. ఈ సందర్భంగా ప్రపంచంలోనే అత్యంత పొడవైన చేతిరాత బైబిల్ను రూపొందించిన ఘనతకు గాను నిర్వాహకులకు ‘బెస్ట్ ఆఫ్ ఇండియా రికార్డు’ను కూడా ప్రదానం చేయనున్నారు. కార్డినల్ మార్ జార్జ్ కూవక్కాడ్ స్వయంగా చివరి వాక్యాన్ని రాయడంతో ఈ అపూర్వ గ్రంథం అధికారికంగా పూర్తవుతుంది.
ఈ చారిత్రక కార్యక్రమానికి పెద్ద సంఖ్యలో మత పెద్దలు, వివిధ యువజన సంఘాల సభ్యులు, క్రైస్తవ భక్తులు హాజరయ్యే అవకాశం ఉందని నిర్వాహకులు తెలిపారు. విశ్వాసం, సమర్పణ, సామూహిక కృషికి ప్రతీకగా నిలిచే ఈ మహా బైబిల్, భవిష్యత్ తరాలకు ఒక ఆధ్యాత్మిక వారసత్వంగా నిలవనుందని వారు ఆశాభావం వ్యక్తం చేస్తున్నారు.
