డిజిటల్ పేమెంట్స్‌లో విప్లవాత్మకంగా మారిపోయిన UPI (యూనిఫైడ్ పేమెంట్స్ ఇంటర్‌ఫేస్) సేవలపై ఇకపై కొన్ని పరిమితులు విధించబోతున్నారు. నేషనల్ పేమెంట్స్ కార్పొరేషన్ ఆఫ్ ఇండియా (NPCI) తాజాగా జారీ చేసిన సర్క్యులర్ ప్రకారం, 2025 ఆగస్టు 1వ తేదీ నుంచి ఈ కొత్త నిబంధనలు అమల్లోకి వస్తాయి.
ఈ మార్పులు ముఖ్యంగా బ్యాలెన్స్ చెకింగ్, ఆటోపే మ్యాండేట్లు, లావాదేవీల స్థితిని తెలుసుకోవడం, ఖాతాల వివరాలు చూడడం వంటి నాన్-ఫైనాన్షియల్ అభ్యర్థనలపై ప్రభావం చూపనున్నాయి. దీని వెనక ఉన్న అసలు ఉద్దేశం – UPI వ్యవస్థను మరింత స్థిరంగా, వేగంగా, అందరికీ అందుబాటులో ఉండేలా చేయడం.
ఏం మారనుంది?
బ్యాలెన్స్ చెక్ పరిమితి:
ఇప్పటి వరకు ఎన్ని సార్లు అయినా మన ఖాతా బ్యాలెన్స్‌ను యాప్‌ల ద్వారా తెలుసుకోవచ్చు. కానీ ఇకపై ఒక్కో యాప్‌లో రోజుకు గరిష్టంగా 50 సార్లు మాత్రమే చెక్ చేయొచ్చు. ఉదాహరణకు, మీరు Paytm, PhonePe రెండు వాడుతున్నారంటే, ప్రతి యాప్‌కి వేర్వేరుగా 50 సార్లు అని అర్థం.
అలాగే పీక్ టైమ్‌ల్లో (ఉదయం 10 నుంచి మధ్యాహ్నం 1 వరకు, సాయంత్రం 5 నుంచి రాత్రి 9:30 వరకు) బ్యాలెన్స్ చెక్ చేస్తే కొన్ని సందర్భాల్లో నిలిపివేస్తారు లేదా లిమిట్ చేస్తారు.
ఆటోపే మ్యాండేట్‌లపై నియంత్రణ:
ప్రతి నెల Netflix సబ్‌స్క్రిప్షన్, SIP వంటివి ఆటోమేటిక్ డెబిట్ ద్వారా డెడక్ట్ అవుతుంటాయి కదా… ఇవి ఇకపై పీక్ అవర్స్‌లో కాకుండా పీక్ టైమ్ కాకపోయే సమయంలో మాత్రమే ప్రాసెస్ అవుతాయి. ఒక్కో మ్యాండేట్‌కు మొత్తం 3 ప్రయత్నాలు మాత్రమే ఉంటాయి.
ట్రాన్సాక్షన్ స్టేటస్ API కాల్స్:
ఏదైనా లావాదేవీ పూర్తి అయిన తర్వాత, 90 సెకన్ల గ్యాప్ తర్వాతే మొదటి స్టేటస్ చెక్ చేయాలి. ఇక రెండు గంటల వ్యవధిలో గరిష్టంగా 3 సార్లు మాత్రమే స్టేటస్ చెక్ చేయడం అనుమతిస్తారు.
లింక్డ్ అకౌంట్ లిస్ట్:
ఒక మొబైల్ నంబర్‌కు లింక్ అయ్యే ఖాతాలను చూసేందుకు, ఒక్క యాప్‌లో రోజుకు 25 సార్లు మాత్రమే ఈ రిక్వెస్ట్ పంపొచ్చు. కస్టమర్ సపోర్ట్‌తో సహా అనుమతి వచ్చిన తర్వాతే ఇది వాడటం జరుగుతుంది.
ఇవన్నీ ఎందుకో తెలుసా?
గతంలో కొన్ని సందర్భాల్లో UPI వ్యవస్థపై భారం పెరిగి, లావాదేవీలు ఆలస్యం కావడం, నిలిపివేయడం జరిగిన సంగతి మనకు తెలిసిందే. ముఖ్యంగా వ్యాపారులు, ఎక్కువ యూజర్లు ఫ్రీక్వెంట్‌గా బ్యాలెన్స్ చెక్ చేయడం వంటివి చేస్తుండడంతో సిస్టమ్‌పై ఒత్తిడి పెరిగింది. దీని వల్ల సిస్టమ్ ఓవర్‌లోడ్ అవడం వంటి సమస్యలు వచ్చాయి.
NPCI వీటిని అడ్డుకోవడానికి ఈ కొత్త రూల్స్ తీసుకువచ్చింది. అంటే, తక్కువ అవసరమైన రిక్వెస్ట్‌లను తగ్గించి, అసలైన ఫైనాన్షియల్ లావాదేవీలకు ప్రాధాన్యం ఇవ్వడమే లక్ష్యం.
ఈ నిబంధనలు మీకు ఎంత ప్రభావం చూపిస్తాయి?
సాధారణంగా మనం చేసే డబ్బు పంపడం, స్వీకరించడం లాంటి ముఖ్యమైన లావాదేవీలపై పెద్దగా ప్రభావం ఉండదు. కానీ మీరు తరచుగా బ్యాలెన్స్ చెక్ చేయడం, ట్రాన్సాక్షన్ స్టేటస్‌లను చూడడం చేస్తే – కొంత అసౌకర్యం అనిపించవచ్చు.
విధులలో విఫలమైతే ఏమవుతుంది?
ఈ మార్గదర్శకాలను పాటించకపోతే:
- API యాక్సెస్‌ను తగ్గించొచ్చు
- జరిమానాలు విధించొచ్చు
- కొత్త కస్టమర్లను తీసుకునే అవకాశం నిలిపివేయొచ్చు
అంటూ NPCI ఇప్పటికే హెచ్చరించింది.
ఆఖరిగా చెప్పాలంటే…
ఈ మార్పులు మామూలుగా వినియోగించే యూజర్లకు పెద్దగా ఇబ్బంది కలిగించవు. కానీ ఎక్కువగా బ్యాలెన్స్ చెక్ చేసే వ్యాపారులు, యాక్టివ్ యూజర్లు మాత్రం కొన్ని పరిమితులను అనుభవించాల్సి వస్తుంది. ఇకపై మీరు చేసే UPI లావాదేవీలపై అవగాహనతో ఉండటం మంచిది!
