ఆంధ్రప్రదేశ్ రాజకీయ వాతావరణంలో, ముఖ్యంగా ఉమ్మడి కృష్ణా జిల్లా టీడీపీ శిబిరంలో చోటు చేసుకున్న అంతర్గత కలహాలు మరోసారి చర్చనీయాంశంగా మారాయి. విజయవాడ ఎంపీ కేశినేని చిన్ని మరియు తిరువూరు ఎమ్మెల్యే కొలికపూడి శ్రీనివాసరావు మధ్య నెలకొన్న మాటల యుద్ధం ఇప్పటికీ సద్దుమణగలేదు. ఈ వ్యవహారంపై పార్టీ అధినేత, ముఖ్యమంత్రి చంద్రబాబు నాయుడు ఇప్పటికే తీవ్ర అసహనం వ్యక్తం చేసినా, వివాదానికి తెరపడే సూచనలు కనబడడం లేదు.
తాజాగా ఎమ్మెల్యే కొలికపూడి శ్రీనివాసరావు పార్టీ రాష్ట్ర అధ్యక్షుడు పల్లా శ్రీనివాసరావుతో భేటీకి అపాయింట్మెంట్ కోరడం రాజకీయ వర్గాల్లో కొత్త చర్చకు దారి తీసింది. ఎంపీ కేశినేనిపై కొలికపూడి సోషల్ మీడియాలో చేసిన విమర్శలతో ఈ వివాదం ఆరంభమైందని, అది పార్టీ అగ్ర నాయకత్వ దృష్టికి చేరడంతో, విదేశీ పర్యటనలో ఉన్న చంద్రబాబు దుబాయ్ నుంచే జోక్యం చేసుకున్నారని సమాచారం. ఆయన రాష్ట్ర అధ్యక్షుడు పల్లాకు, “వివాదంలో ఉన్న నేతలతో ఎలాంటి చర్చలు జరపకూడదు, ఎవరినీ పార్టీ కార్యాలయానికి పిలవవద్దు” అని స్పష్టమైన ఆదేశాలు ఇచ్చినట్లు తెలుస్తోంది.
అయితే, చంద్రబాబు సూచనలను పక్కనబెట్టి కొలికపూడి స్వయంగా పల్లా శ్రీనివాసరావు అపాయింట్మెంట్ కోరడం ఇప్పుడు హాట్ టాపిక్గా మారింది. ఈరోజే ఇద్దరి భేటీ జరిగే అవకాశం ఉందని సమాచారం. ఇందులో కొలికపూడి, ఎంపీ కేశినేనిపై విమర్శలు ఎందుకు చేయాల్సి వచ్చిందో తన వాదనను వివరించేందుకు సిద్ధంగా ఉన్నారని పార్టీ వర్గాలు చెబుతున్నాయి.
ముఖ్యమంత్రి స్పష్టంగా “జోక్యం అవసరం లేదు” అని చెప్పిన తరుణంలోనూ, ఈ సమావేశం జరగబోతుండటంతో టీడీపీ లోపలి రాజకీయాలు మరింత ఉత్కంఠ రేపుతున్నాయి. ఈ భేటీ అనంతరం వివాదం ఎటు దారి తీస్తుందో, పార్టీ అధిష్ఠానం ఏ నిర్ణయం తీసుకుంటుందో అన్నదానిపై రాజకీయ వర్గాలు కళ్లప్పగించి చూస్తున్నాయి.
