తల్లికి వందనం కాదు.. తల్లులకు వేదన, సర్వే తప్పిదం….

శీతలజలాల కొండలు.. కానీ సంక్షేమం అందని కొండా.
పలాస మండలం శివారులో గల గిరిజన గ్రామం సవరరామకృష్ణాపురంలోని విద్యార్థుల తల్లులపై ప్రభుత్వం అమలు చేస్తున్న “తల్లికి వందనం” పథకం వర్తించకపోవడం గిరిజనుల్లో తీవ్ర అసంతృప్తికి దారి తీస్తోంది. గ్రామంలోని 10 మంది విద్యార్థుల్లో కేవలం ముగ్గురి తల్లుల ఖాతాల్లోనే పథకం నిధులు జమ కాగా, మిగిలిన 7 మంది విద్యార్థుల తల్లులు ఈ పథకానికి అనర్హులుగా మారారు. కారణం – రికార్డుల్లో తప్పుగా కనిపిస్తున్న భూముల వివరాలు.

లేని భూములు.. ఉన్నట్లుగా చూపించిన రికార్డులు

గ్రామానికి చెందిన సవర లావణ్యకు నిజానికి కేవలం రెండు ఎకరాల పోరంబోకు భూమి మాత్రమే ఉంది. కానీ సర్వే రికార్డుల్లో మాత్రం 10 ఎకరాల జిరాయితీ భూమి ఉన్నట్లు నమోదు అయింది. దీంతో ఆమె ‘తల్లికి వందనం’ పథకం లబ్ధిదారుల జాబితా నుంచి తొలగించబడ్డారు. ఇదే పరిస్థితి సవర చామంతి అనే మహిళకూ ఎదురైంది. ఆమెకు వాస్తవంగా కేవలం 25 సెంట్లు మాత్రమే భూమి ఉండగా, రికార్డుల్లో 76 ఎకరాలు అని చూపించడంతో, ఆమె పిల్లలు అఖిల్‌, పవిత్రకు కూడా పథకం వర్తించలేదు.

వైసీపీ హయాంలో రీసర్వే వల్ల గందరగోళం

2020లో వైఎస్ జగన్ ప్రభుత్వం సాధికార సర్వే నిర్వహించిన సమయంలో సర్వే నెంబరు 527లో ఉన్న గుంపంకొండను మొత్తం గ్రామానికి చెందనట్లుగా రికార్డుల్లో నమోదు చేశారు. వాస్తవానికి, అక్కడ 25 ఏళ్ల కిందట 37 ఎకరాలపై ఐటీడీఏ నుంచి గిరిజనులకు పట్టాలు ఇచ్చారు. ఈ భూముల్లో వారంతా పోడు సాగు చేస్తూ జీవనాధారంగా వాడుకుంటున్నారు. కానీ రీసర్వేలో తప్పుల వల్ల గుంపంకొండ మొత్తం భూమిని గ్రామస్థుల పేర్లతో జతచేయడంతో వారు పెద్దఎత్తున భూములు కలిగి ఉన్నట్లుగా రికార్డుల్లో మారిపోయింది.

స్థానికుల ఆవేదన.. ప్రభుత్వం స్పందించాల్సిన సమయం

పథకం అమలులో అధికారుల నిర్లక్ష్యం కారణంగా నిజంగా అర్హులైన గిరిజన మహిళలు పథకం వలన ప్రయోజనం పొందలేకపోతున్నారు. గ్రామస్తులు స్థానిక సచివాలయాన్ని సంప్రదించినా, స్పష్టమైన సమాధానం రాలేదు. గత వైసీపీ హయాంలో అమలైన అమ్మఒడి వంటి పథకాలలో ఇలాంటి ఇబ్బందులు తలెత్తకపోవడం గమనార్హం.

అధికారుల సమాధానం

ఈ అంశంపై స్పందించిన సచివాలయ వెల్ఫేర్ అధికారి షేక్ తాజ్ మాట్లాడుతూ,

“సర్వే ఎలా జరిగిందో మేము పరిశీలించలేదు. కానీ, ప్రస్తుతం ఉన్న భూముల రికార్డుల ప్రకారం సవరరామకృష్ణాపురానికి చెందిన మహిళలు తల్లికి వందనం పథకానికి అర్హత కోల్పోయారు. మేము ఈ విషయం గ్రీవెన్స్‌గా నమోదు చేశాం. ప్రభుత్వం నుంచి స్పష్టమైన ఆదేశాలు వచ్చిన తర్వాత తగిన చర్యలు తీసుకుంటాం,” అని తెలిపారు.

చివరగా…

గ్రామస్థుల వేదన, తప్పుగా జరిగిన రికార్డు ప్రక్రియల పట్ల అధికారులు స్పందించి, అర్హులైన వారందరికీ ‘తల్లికి వందనం’ పథకం సద్వినియోగం చేసేలా చర్యలు తీసుకోవాల్సిన అవసరం ఎంతో ఉంది.