శ్రీకాకుళం జిల్లా కాశీబుగ్గలోని ప్రసిద్ధ శ్రీ వెంకటేశ్వర స్వామి ఆలయంలో ఈరోజు తెల్లవారుజామున ఘోర ప్రమాదం చోటు చేసుకుంది. భక్తుల రద్దీతో ఆలయం ప్రాంగణంలో తీవ్ర తొక్కిసలాట చోటుచేసుకొని, కనీసం పది మంది భక్తులు దుర్మరణం పాలయ్యారు. మరికొంతమంది భక్తులు తీవ్రంగా గాయపడినట్లు సమాచారం. క్షతగాత్రులను సమీప ఆసుపత్రులకు తరలించి చికిత్స అందిస్తున్నారు. మృతుల సంఖ్య మరింత పెరగవచ్చని అధికారులు ఆందోళన వ్యక్తం చేస్తున్నారు.
“చిన్న తిరుపతి”గా ప్రసిద్ధి చెందిన ఈ కాశీబుగ్గ వెంకటేశ్వర ఆలయంలో కార్తీకమాసం సందర్భంగా భక్తులు భారీగా తరలి వచ్చారు. అయితే సరైన ఏర్పాట్లు, భద్రతా చర్యలు లేకపోవడంతో అకస్మాత్తుగా తోపులాట ప్రారంభమై, అది క్రమంగా ప్రాణాంతక తొక్కిసలాటగా మారింది. దర్శనానికి వెళ్లే మార్గంలో ఉన్న స్టీల్ బ్యారికేడ్లు కూడా విరిగిపోవడంతో పరిస్థితి అదుపుతప్పింది.
ఈ ఘటనపై రాష్ట్ర ముఖ్యమంత్రి నారా చంద్రబాబు నాయుడు తీవ్ర దిగ్భ్రాంతి వ్యక్తం చేశారు. “కాశీబుగ్గ వెంకటేశ్వర స్వామి ఆలయంలో జరిగిన తొక్కిసలాట దుర్ఘటన హృదయ విదారకంగా ఉంది. మరణించిన భక్తుల కుటుంబాలకు ప్రగాఢ సానుభూతి తెలియజేస్తున్నాను,” అని ట్విటర్ (X) ద్వారా స్పందించారు. గాయపడిన వారికి మెరుగైన వైద్యం అందించాలంటూ అధికారులకు ఆదేశాలు జారీ చేశారు.
ఘటనకు సంబంధించిన దృశ్యాలు సోషల్ మీడియాలో వైరల్ అవుతున్నాయి. అనేకమంది భక్తులు నేలపై అపస్మారక స్థితిలో పడి ఉండగా, కుటుంబసభ్యులు, ఇతర భక్తులు ప్రాణాలు కాపాడేందుకు సీపీఆర్ ప్రయత్నాలు చేస్తున్న వీడియోలు హృదయాన్ని కలచివేస్తున్నాయి.
సంఘటన స్థలానికి పోలీసులు, అగ్నిమాపక దళం, విపత్తు నిర్వహణ సిబ్బంది పెద్దఎత్తున చేరుకుని సహాయక చర్యలు ప్రారంభించారు. మృతదేహాలను పోస్టుమార్టం కోసం తరలించగా, గాయపడినవారిని తక్షణమే వైద్యసేవలకు తరలించారు. అంబులెన్స్ సైరన్లతో కాశీబుగ్గ పట్టణం మొత్తం విషాద వాతావరణంలో మునిగిపోయింది.
ప్రస్తుతం ఆలయ పరిసరాల్లో పోలీసులు భద్రతను కట్టుదిట్టం చేశారు. భక్తుల రద్దీని అదుపు చేసేందుకు కఠిన చర్యలు తీసుకుంటున్నారు. కార్తీకమాసం వేళలో ఇలా జరిగిన ఈ ఘటనపై రాష్ట్రవ్యాప్తంగా తీవ్ర దిగ్భ్రాంతి వ్యక్తమవుతోంది.
