తమిళనాడులో ఘోర రైలు ప్రమాదం
తమిళనాడులో మరోసారి రైలు ప్రమాదం తీవ్ర విషాదాన్ని మిగిల్చింది. కడలూరు జిల్లా చెమ్మంగుప్పం వద్ద మంగళవారం ఉదయం జరిగిన ఈ ఘటనలో ప్రైవేట్ స్కూల్ వ్యాన్ను రైలు ఢీకొనడంతో ఇద్దరు విద్యార్థులు అక్కడికక్కడే మృతి చెందారు. ఈ ఘటనలో మరో 10 మందికి పైగా చిన్నారులు తీవ్రంగా గాయపడినట్లు సమాచారం.
ప్రాథమిక సమాచారం ప్రకారం, విద్యార్థులతో వెళ్తున్న స్కూల్ వ్యాన్ రైల్వే క్రాసింగ్ను దాటే ప్రయత్నంలో ఉండగా, అదే సమయంలో వేగంగా వచ్చిన రైలు ఢీకొట్టింది. ఈ ప్రమాదానికి గేటు కీపర్ నిర్లక్ష్యమే కారణమన్న ఆరోపణలు తీవ్రమవుతున్నాయి. రైలు సమీపంలో ఉన్నప్పటికీ గేట్ మూయకపోవడం, గేట్ కీపర్ డ్యూటీ సమయంలో నిద్రపోవడమే ప్రమాదానికి దారితీసినట్లు తెలుస్తోంది.
ఘటనకు దారితీసిన పరిణామాలు:
ఉదయం 8:30 గంటల ప్రాంతంలో ఈ ప్రమాదం చోటు చేసుకుంది. చెమ్మంగుప్పంలోని ప్రైవేట్ స్కూల్కు చెందిన వ్యాన్ నిబంధనల ప్రకారం రైల్వే గేటు వద్ద ఆగింది. అయితే గేట్ మూయలేదని గమనించిన డ్రైవర్ ముందుకు సాగాడు. ఇంతలోనే వేగంగా వచ్చిన రైలు, వ్యాన్ను ఢీకొట్టి సుమారు వంద మీటర్ల వరకు ఈడ్చుకుపోయింది. వ్యాన్ పూర్తిగా నుజ్జునుజ్జయింది.
చిన్నారుల రోదనలు.. తల్లిదండ్రుల కళ్లలో కన్నీరే:
ఈ ఘోర ఘటనను చూసిన స్థానికులు, తల్లిదండ్రులు కన్నీరుమున్నీరవుతున్నారు. పాఠశాలకు ఆనందంగా వెళ్లిన పిల్లలు క్షణాల్లో శవాలుగా మారిపోయారు. తల్లిదండ్రులు తమ పిల్లల మృతదేహాలను చూసి మూర్చిపోయారు. ఓ చిన్నారి తల్లి “ఉదయం నవ్వుతూ చేతులూపి వెళ్ళాడు.. ఇప్పుడు శవంగా వచ్చాడు” అంటూ రోధించడమే మిగిలింది.
స్థానికుల ఆగ్రహావేశం.. గేట్ కీపర్పై దాడి:
ప్రమాదానికి గేట్ కీపర్ నిర్లక్ష్యమే కారణమని భావించిన స్థానికులు అతనిపై తీవ్ర ఆగ్రహం వ్యక్తం చేశారు. సంఘటన జరిగిన వెంటనే అతన్ని చితకబాదారు. పోలీసులు సకాలంలో అక్కడికి చేరి గేట్ కీపర్ను రక్షించి అదుపులోకి తీసుకున్నారు.
గాయపడిన చిన్నారుల పరిస్థితి విషమం:
సమాచారం అందుకున్న వెంటనే రెస్క్యూ టీమ్, పోలీసులు సంఘటనా స్థలానికి చేరుకుని గాయపడిన విద్యార్థులను సమీపంలోని ప్రభుత్వ ఆసుపత్రికి తరలించారు. పలువురి పరిస్థితి విషమంగా ఉన్నట్లు వైద్యులు తెలిపారు. మృతుల సంఖ్య మరింత పెరిగే అవకాశముందని అధికారులు పేర్కొన్నారు.
ఇటీవలి కాలంలో పెరుగుతున్న స్కూల్ ట్రాన్స్పోర్ట్ ప్రమాదాలు:
ఈ సంఘటన isolated కాదు. ఇటీవలి కాలంలో స్కూల్ బస్సులు, వ్యాన్లు రోడ్లపై ప్రమాదాలకు గురవుతున్న ఘటనలు అధికమవుతున్నాయి. కేవలం నాలుగు రోజుల క్రితమే ఆంధ్రప్రదేశ్లో ఓ చిన్నారి స్కూల్ మొదటి రోజునే స్కూల్ వ్యాన్ కింద పడి ప్రాణాలు కోల్పోయాడు. హైదరాబాద్లో మరో ఘటనలో స్కూటీ మీద స్కూల్కి వెళ్తున్న చిన్నారి టిప్పర్ కింద పడి మృతిచెందాడు.
రైల్వే విభాగం నిర్లక్ష్యమేనా?
ఈ ప్రమాదంపై పలువురు అధికారులు, రైల్వే శాఖపై తీవ్ర విమర్శలు చేస్తున్నారు. గేట్ కీపర్కు బాధ్యతలు గుర్తు చేయని విధానం, ఆ వ్యక్తి నిద్రపోవడంపై ఏ నియంత్రణ లేకపోవడమే ఈ దుర్ఘటనకు దారితీసిన కారణాలుగా భావిస్తున్నారు.
పోలీసుల విచారణ ప్రారంభం:
ప్రమాదంపై కేసు నమోదు చేసిన పోలీసులు, రైల్వే గేట్ కీపర్ను అదుపులోకి తీసుకున్నారు. అతని వాంగ్మూలం తీసుకొని, అన్ని కోణాల్లో విచారణ చేపట్టారు. అలాగే స్కూల్ వ్యాన్ డ్రైవర్ లైసెన్స్, ట్రాఫిక్ నిబంధనల పాటింపు అంశాలు కూడా దర్యాప్తులో భాగంగా తీసుకుంటున్నారు.
తీవ్ర దుఃఖాన్ని వ్యక్తం చేసిన అధికారులు:
తమిళనాడు ముఖ్యమంత్రి ఎంకే స్టాలిన్, ఈ ఘటనపై తీవ్ర దిగ్భ్రాంతి వ్యక్తం చేశారు. బాధిత కుటుంబాలకు అండగా ఉంటామని ప్రకటించారు. ప్రభుత్వ స్థాయిలో చర్యలు తీసుకుంటామని, బాధ్యులపై కఠిన చర్యలు తప్పవని స్పష్టం చేశారు.
