సామర్లకోట | కాకినాడ జిల్లా:
కాకినాడ జిల్లా సామర్లకోట మండలంలోని వేట్లపాలెం–మేడపాడు గ్రామాల మధ్య ఉన్న బాణసంచా తయారీ కేంద్రంలో శనివారం తీవ్రస్థాయిలో పేలుడు సంభవించింది. ప్రమాద ప్రభావంతో యూనిట్ పూర్తిగా మంటల్లో దగ్ధమైంది. ప్రాథమిక సమాచారం ప్రకారం ఘటనలో 18 మంది కార్మికులు అక్కడికక్కడే ప్రాణాలు కోల్పోయారు. మృతుల్లో మహిళల సంఖ్య ఎక్కువగా ఉందని స్థానికులు తెలిపారు. గాయపడిన వారిని చికిత్స కోసం కాకినాడ ప్రభుత్వ సామాన్య ఆసుపత్రి (GGH)కు తరలించారు. ప్రమాదం అనంతరం చుట్టుపక్కల ఐదు గ్రామాల పరిధిలో దట్టమైన పొగ అలుముకుని, తీవ్ర భయాందోళన నెలకొంది.
ప్రమాద సమయంలో మహిళా కార్మికులు మందుగుండు సామాగ్రి తయారీలో నిమగ్నమై ఉన్నారు. అకస్మాత్తుగా భారీ శబ్దంతో పేలుడు సంభవించడంతో తయారీ కేంద్రం పూర్తిగా ధ్వంసమైంది. సంఘటనా స్థలం యుద్ధ వాతావరణాన్ని తలపించేలా హృదయవిదారక దృశ్యాలతో మారింది. మృతదేహాలు తీవ్రంగా దెబ్బతిని గుర్తుపట్టలేనంతగా మారాయి. పేలుడు శబ్దం చుట్టుపక్కల 4–5 కిలోమీటర్ల దూరం వరకు వినిపించినట్లు స్థానికులు వెల్లడించారు.
రంగంలోకి కలెక్టర్, ఎస్పీ – సహాయక చర్యలు ముమ్మరం
సమాచారం అందిన వెంటనే జిల్లా యంత్రాంగం అప్రమత్తమైంది. జిల్లా కలెక్టర్ షణ్మోహన్, జిల్లా ఎస్పీ బిందు మాధవ్ సంఘటనా స్థలానికి చేరుకుని పరిస్థితిని ప్రత్యక్షంగా పర్యవేక్షించారు. రెవెన్యూ, పోలీస్, అగ్నిమాపక శాఖల సిబ్బంది సమన్వయంతో మంటలను అదుపులోకి తెచ్చి, శిథిలాల కింద చిక్కుకున్న వారిని వెలికితీసే చర్యలు చేపట్టారు. క్షతగాత్రులకు తక్షణ వైద్యం అందేలా అత్యవసర ఏర్పాట్లు చేశారు.
జీజీహెచ్కు క్షతగాత్రుల తరలింపు
ప్రమాదంలో గాయపడిన వారిని 108 అంబులెన్సుల ద్వారా కాకినాడ ప్రభుత్వ సామాన్య ఆసుపత్రికి తరలించి చికిత్స అందిస్తున్నారు. బాధితులకు మెరుగైన వైద్యం అందేలా వైద్య సదుపాయాలు పెంచాలని కలెక్టర్ ఆదేశించారు. ప్రమాదానికి గల ఖచ్చిత కారణాలు, మృతుల సంఖ్యపై అధికారిక నిర్ధారణ ఇంకా రావాల్సి ఉంది. ఉన్నతాధికారులు సంఘటనా స్థలంలో పరిశీలనలు కొనసాగిస్తున్నారు.
