పవన్ కళ్యాణ్ విమర్శ: జగన్ నియంతృత్వ వైఖరికి మార్పే లేదని ఆరోపణ
అమరావతి: రాష్ట్రంలో ఎన్డీయే కూటమి ప్రభుత్వం ఏడాది పాలన పూర్తి చేసుకున్న సందర్భంగా అమరావతిలో జరిగిన “సుపరిపాలనలో తొలి అడుగు” సభలో డిప్యూటీ సీఎం పవన్ కళ్యాణ్ కీలక వ్యాఖ్యలు చేశారు. మాజీ సీఎం జగన్ మోహన్ రెడ్డిపై ఆయన తీవ్ర విమర్శలు చేశారు. జగన్ నాయకత్వంలోని వైఎస్సార్‌సీపీ పాలనలో ప్రజాస్వామ్య విలువలు పరిగణనలోకి తీసుకోలేదని ధ్వజమెత్తారు.
పవన్ కళ్యాణ్ మాట్లాడుతూ, “వైసీపీకి ప్రజాస్వామ్య విధానాలపై నమ్మకం లేదు. విదేశాల్లో ఉన్నవారిని వెంటాడతామంటూ చేసిన వ్యాఖ్యలు అసహ్యకరమైనవి. గళాలు కోస్తామంటూ బెదిరింపులు చేయడం తగదు. ఇలాంటి అనర్గళ ధోరణులను ఈ ప్రభుత్వం సహించదు” అని స్పష్టం చేశారు.
అనవసర బెదిరింపులు, చిల్లర మాటలు తమను భయపెట్టవని, తాటాకు చప్పుళ్లకు తామెప్పుడూ వెనక్కి తగ్గమని పవన్ స్పష్టం చేశారు. “ఇది సరదా ప్రయాణం కాదు. ఎన్నో ఆటుపోట్లను ఎదుర్కొని ఇక్కడికి వచ్చాం. శాంతి భద్రతలు, అవినీతి రహిత పరిపాలనకే పని చేస్తున్నాం” అని తెలిపారు.
మాజీ ప్రభుత్వ హయాంలో రాష్ట్రంలో భయ భ్రాంతులు నెలకొన్నాయని గుర్తుచేశారు. “చంద్రబాబును టార్గెట్ చేయడం, అధికార వ్యవస్థను దుర్వినియోగించడం, ప్రజలను భయపెట్టడం – ఇవన్నీ గత పాలకుల విధానాలే. విశాఖలోనూ నన్ను అడ్డుకున్న సందర్భాలు ఉన్నాయి” అని పవన్ వివరించారు.
ప్రజల ఆకాంక్షలకు అనుగుణంగా మార్పు కోసం కూటమిగా ఏర్పడి పనిచేస్తున్నామని, అదే ఉద్దేశంతో మొదటి ఏడాది విజయవంతంగా పూర్తి చేశామని చెప్పారు. “మళ్లీ ఆ ప్రభుత్వం రాదు. ఇక రాబోదు కూడా. వృద్ధి చెందుతున్న భారత్‌కి తగిన విధంగా పాలన సాగుతోంది. మా పోరాటం ప్రజలు అర్థం చేసుకున్నారు” అని తెలిపారు.
