మహారాష్ట్రలోని నాందేడ్ జిల్లాలో చోటుచేసుకున్న ఓ పరువుహత్య దేశవ్యాప్తంగా చర్చనీయాంశమైంది. ప్రేమ పేరుతో జరిగిన ఈ దారుణం ఒక కుటుంబాన్ని తునతునకలు చేయడమే కాకుండా, సమాజాన్ని కూడా కలచివేసింది. కేవలం వేర్వేరు కులాలకు చెందిన వారన్న ఒక్క కారణంతో ఓ నిరపరాధ యువకుడి ప్రాణం బలైపోయింది. అయితే ప్రియుడి మృతదేహం పక్కనే నిలబడి పెళ్లి తంతు పూర్తి చేసిన ఆ యువతి తీరు అందరినీ ముక్కున వేలేసుకునేలా చేసింది.

ప్రేమ… వ్యతిరేకత… చివరకు హత్య

నాందేడ్‌కు చెందిన సాక్షం టేటే (20) మరియు ఆంచల్ గత మూడేళ్లుగా ప్రేమలో ఉన్నారు. ఆంచల్ సోదరుల ద్వారా పరిచయమైన సాక్షంతో అనుబంధం బలపడింది. అయితే కుల భేదాల పేరుతో ఆంచల్ కుటుంబ సభ్యులు ఈ సంబంధాన్ని ఏ విధంగానైనా అడ్డుకోవాలని నిర్ణయించుకున్నారు. ప్రేమను ముగించమని పలుమార్లు హెచ్చరించినా, ఇద్దరూ వెనక్కి తగ్గలేదు.

దారుణానికి తెరలేపిన కుటుంబం

ఆంచల్‌ను పెళ్లి చేసుకోవాలని సాక్షం నిర్ణయించుకున్న విషయం తెలిసిన ఆ యువతి తండ్రి, సోదరులు గురువారం అతనిపై దాడి చేశారు. దారుణంగా కొట్టి, తుపాకీతో కాల్చి, తరువాత బండరాయితో తలను నుజ్జునుజ్జు చేస్తూ ఘోరంగా హత్య చేశారు. ఈ ఘటన పరువుహత్యల్లో మరో భయానక అధ్యాయంగా నిలిచిపోయింది.

మృతదేహానికి పసుపు రాసి సిందూరం… ‘ప్రియుడినే భర్తగా’

సాక్షం అంత్యక్రియలు జరుగుతుండగా ఆంచల్ అక్కడికి చేరుకోవడం చూసిన వారు క్షణాల్లో స్థబ్ధులయ్యారు. ప్రేమించిన వ్యక్తి మృతదేహం పక్కనే నిలబడి ఆమె ఒక నిర్ణయం తీసుకుంది—
అతని కుడి చేతికి పసుపు కట్టింది… తన నుదుట సిందూరం దిద్దుకుంది… చనిపోయినా సాక్షమే తన భర్త అని ప్రపంచానికి ప్రకటించింది.

ఆమె చెప్పిన మాటలు అక్కడున్న ప్రతి ఒక్కరి హృదయాలను పగులుకొట్టాయి—
“మా ప్రేమ గెలిచింది. సాక్షం చనిపోయినా మా ప్రేమ చనిపోలేదు. నా నాన్న, సోదరులు ఓడిపోయారు. నేను జీవితాంతం సాక్షం ఇంట్లోనే అతని భార్యగా ఉంటాను.”

కేసు నమోదు – ఆరుగురు అరెస్ట్

ఈ ఘటనపై పోలీసులు కేసు నమోదు చేసుకుని, హత్యకు పాల్పడిన ఆరుగురు నిందితులను అరెస్ట్ చేశారు. యువతి నిందితులకు మరణశిక్ష విధించాలని డిమాండ్ చేస్తోంది.
ఈ కేసు దేశవ్యాప్తంగా కుల వివక్ష, పరువుహత్యలపై మరోసారి పెద్ద చర్చను రేపింది.