AP News Hunt, June 16, 2025
మధ్యప్రాచ్యంలో ఉద్రిక్తతలు రోజురోజుకూ పెరిగిపోతున్న వేళ, ఇరాన్ నుంచి వచ్చిన ఓ కీలక వ్యాఖ్య అంతర్జాతీయంగా కలకలం రేపుతోంది. ఇజ్రాయెల్ తమపై అణుబాంబు వాడితే పాకిస్థాన్ రంగంలోకి దిగి టెల్ అవీవ్‌పై ప్రతిదాడి చేస్తుందని ఇరాన్‌కి చెందిన మాజీ ఉన్నతాధికారి చేసిన వ్యాఖ్యలు వివాదాస్పదంగా మారాయి.
ఇరాన్ రేవల్యూషనరీ గార్డ్ కార్ప్స్ (IRGC) మాజీ చీఫ్ మరియు ఎక్స్‌పెడియన్సీ డిసర్న్‌మెంట్ కౌన్సిల్ కార్యదర్శి జనరల్ మొహ్సేన్ రెజాయీ, ఇరాక్ ప్రభుత్వానికి చెందిన టీవీ ఛానెల్‌కు ఇచ్చిన ఇంటర్వ్యూలో మాట్లాడుతూ, “ఇజ్రాయెల్ అణుయుద్ధానికి శ్రీకారం చుడితే పాకిస్థాన్ వారి తరఫున ప్రతిదాడి చేస్తుంది” అంటూ వ్యాఖ్యానించారు. అంతేకాకుండా, పాక్ ఇప్పటికే అటువంటి హామీ ఇచ్చిందని కూడా పేర్కొన్నారు.
అయితే రెజాయీ వ్యాఖ్యలపై పాకిస్థాన్ తక్షణమే స్పందించింది. ఇస్లామాబాద్ అధికార ప్రతినిధులు, ముఖ్యంగా రక్షణ మంత్రి ఖవాజా ఆసిఫ్, “ఇరాన్‌కు అలాంటి ఎలాంటి హామీ ఇవ్వలేదు. ఇజ్రాయెల్‌పై అణు దాడికి మేము సిద్ధంగా లేం” అని స్పష్టంగా ఖండించారు. కానీ, ఇజ్రాయెల్‌తో ఇరాన్ ఎదుర్కొంటున్న వివాదంలో మద్దతుగా నిలబడతామని, ముస్లిం ఐక్యతకు పాకిస్థాన్ పూర్తి మద్దతు ఇస్తుందని పునరుద్ఘాటించారు.
మొహ్సేన్ రెజాయీ ఇంకా తుర్కియే, సౌదీ అరేబియా, పాకిస్థాన్‌తో కలిసి “ఇస్లామిక్ ఆర్మీ” ఏర్పాటుపై కూడా ఓ పిలుపునిచ్చారు. అయితే ఈ దేశాలు ఇప్పటివరకు ఇటువంటి ప్రతిపాదనకు గ్రీన్ సిగ్నల్ ఇవ్వలేదు.
ఈ కామెంట్ల నేపథ్యంలో మిడిలీస్ట్ ప్రాంతంలో ఇప్పటికే ఉన్న అస్థిరత మరింత పెరిగే అవకాశముందని, ఈ అణుబాంబు బెదిరింపులు ఆందోళన కలిగిస్తున్నాయని అంతర్జాతీయ వర్గాలు పేర్కొంటున్నాయి. ఇజ్రాయెల్, పాకిస్థాన్ లాంటి అణు శక్తులు కలిగిన దేశాల మధ్య ఇలా మాటల యుద్ధం జరగడం విశ్వశాంతికి గంభీరమైన హెచ్చరికగా భావిస్తున్నారు.
అంతర్జాతీయ సమాజం ప్రస్తుతం ఇరాన్–ఇజ్రాయెల్ దేశాలను మెల్లగా వ్యవహరించాలని, భయానక పరిణామాలకు దారి తీసే మార్గాన్ని నివారించాలని విజ్ఞప్తి చేస్తోంది. శాంతియుత పరిష్కారానికి దారితీసే చర్చలు కొనసాగించాలని స్పష్టమైన పిలుపు వినిపిస్తోంది.
