దేశ స్వాతంత్య్ర పోరాటంలో తమ ప్రాణాలను పణంగా పెట్టి, నిస్వార్థంగా దేశం కోసం పోరాడినవారి పేర్లు చరిత్రలో నిలిచిపోయాయి. అయితే ఆ జాబితాలో ఎక్కువగా పురుషుల పేర్లే వినిపిస్తాయి. మహిళలు కూడా తక్కువేమీ చేయలేదు కానీ, వారి త్యాగాలు అంతగా వెలుగులోకి రాలేదు. అలాంటి గణనీయమైన కానీ మరచిపోయిన వీరనారి నీరా ఆర్య. భారత జాతీయ సైన్యంలో (ఆజాద్ హింద్ ఫౌజ్) తొలి మహిళా గూఢచారిగా గుర్తింపు పొందిన ఆమె జీవితం ఇప్పుడు పెద్ద తెరపై బయోపిక్ రూపంలో రాబోతోంది.
జననం – చిన్ననాటి జాతీయ స్పూర్తి
ఉత్తరప్రదేశ్లోని బాగ్పత్ జిల్లా, ఖేక్రా నగర్లో 1902 మార్చి 5న నీరా ఆర్య జన్మించారు. ఆమె తండ్రి సేథ్ ఛజ్జుమల్ ప్రముఖ వ్యాపారవేత్త. మంచి ఆర్థిక పరిస్థితులున్న కుటుంబంలో పెరిగినా, చిన్నప్పటి నుంచే నీరా దేశభక్తి, జాతీయతా భావాలతో మమేకమయ్యారు. సోదరుడు బసంత్తో కలిసి కోల్కతాలో చదువుకున్నారు. విద్య పూర్తయ్యాక స్వాతంత్య్ర పోరాటంపై మక్కువ పెంచుకున్న ఆమె, సుభాష్ చంద్రబోస్ ఆజాద్ హింద్ ఫౌజ్లోని రాణి ఝాన్సీ రెజిమెంట్లో చేరారు.
పెళ్లి – విరుద్ధమైన దారులు
తండ్రి ఒత్తిడితో, నీరా బ్రిటిష్ CID అధికారి శ్రీకాంత్ జైరంజన్ దాస్ను వివాహం చేసుకున్నారు. కానీ ఈ పెళ్లి ఆమె జీవితాన్ని మలుపుతిప్పింది. నీరా ఆజాద్ హింద్ ఫౌజ్ కోసం పనిచేస్తుండగా, భర్త బ్రిటిష్ ప్రభుత్వానికి విధేయుడిగా ఉన్నాడు. ఇద్దరి ఆలోచనల్లో ఉన్న భిన్నత కారణంగా వారి మధ్య కలహాలు చెలరేగాయి. శ్రీకాంత్ తన భార్య నుంచి సుభాష్ బోస్ గురించి రహస్య సమాచారాన్ని తెలుసుకోవాలని ప్రయత్నించగా, నీరా మాత్రం దృఢంగా నిరాకరించారు.
భర్తను హతమార్చిన సాహసినారి
ఒక సందర్భంలో, బోస్ను కలవడానికి వెళ్తున్న నీరాను శ్రీకాంత్ రహస్యంగా అనుసరించాడు. తుపాకీతో అక్కడికి చేరుకున్న ఆయన బోస్ డ్రైవర్పై దాడి చేశాడు. ఆ సమయంలో నేతాజీపై దాడి జరుగుతుందనే భయంతో, దేశభక్తి కోసం, బోస్ను రక్షించడానికి, నీరా తన స్వంత భర్తను హతమార్చడం చరిత్ర చెబుతోంది.
జైలు జీవితం – అమానుష హింస
ఈ ఘటన తరువాత బ్రిటిష్ వారు నీరాను అరెస్ట్ చేసి అండమాన్ సెల్యులార్ జైలుకి తరలించారు. అక్కడ ఆమెపై రకరకాల ఒత్తిళ్లు, ప్రలోభాలు చూపించారు. “బోస్ ఎక్కడ ఉన్నాడో చెబితే విడుదల చేస్తాం” అని జైలు అధికారులు ప్రయత్నించినా, ఆమె మాట తప్పలేదు. మరీ అంతకుమించి, తమపై ఒత్తిడి తెచ్చిన జైలు అధికారులపై ఆమె ఉమ్మివేయడం జరిగింది.
దీని ఫలితంగా నీరా అమానుష హింసకు గురయ్యారు. సుభాష్ చంద్రబోస్ తన గుండెల్లో ఉన్నాడని చెప్పినందుకు, ఆమె రొమ్ములు కూడా కత్తిరించారని చారిత్రక ఆధారాలు చెబుతున్నాయి. అయినా కూడా నీరా ఆర్య తన దేశభక్తి నుంచి వెనక్కి తగ్గలేదు.
బయోపిక్గా నీరా కథ
ఈ వీరనారి జీవితం ఇప్పుడు సినీ తెరపైకి రాబోతోంది. బాలీవుడ్లో రూపా నాయర్ ఈ చిత్రంతో నటిగా, దర్శకురాలిగా ఆరంగేట్రం చేస్తున్నారు. జాతీయ అవార్డు గెలుచుకున్న రచయిత వరుణ్ గౌతమ్ ఈ బయోపిక్కి స్క్రీన్ప్లే అందిస్తున్నారు. నీరా ఆర్య త్యాగాలు, ఆమె సాహసోపేతమైన జీవితం, స్వాతంత్య్ర సమరంలో ఆమె చేసిన కృషి ద్వారా మరచిపోయిన ఒక వీరనారిని దేశం మళ్లీ గుర్తుచేసుకోబోతోంది.
