పంజాబ్లో ఒక భయానక ఘటన చోటుచేసుకుంది. జాతీయ స్థాయిలో కబడ్డీ ఆడుతూ పేరు తెచ్చుకున్న యువ క్రీడాకారుడు తేజ్పాల్ సింగ్ (26)ను స్నేహితులే అతి కిరాతకంగా కాల్చి చంపారు. లూథియానా జిల్లాలోని జాగ్రావ్ పట్టణంలో జరిగిన ఈ ఘటన రాష్ట్రవ్యాప్తంగా సంచలనం రేపింది.
పోలీసుల ప్రకారం, తేజ్పాల్ సింగ్ తన ఇద్దరు స్నేహితులతో కలిసి స్థానిక ఫ్యాక్టరీ వైపు నడుస్తున్న సమయంలో ఈ ఘటన జరిగింది. ఈ సమయంలో పాత గొడవలపై వారిలో వాగ్వాదం మొదలై క్షణాల్లోనే తీవ్ర ఘర్షణకు దారితీసింది. అదే సమయంలో వారితో ఉన్న మరో వ్యక్తి ఆకస్మికంగా తుపాకీ తీసి తేజ్పాల్ ఛాతీపై కాల్పులు జరిపాడు. ఈ ఘటన జాగ్రావ్లోని ఎస్ఎస్పీ కార్యాలయానికి కేవలం కొద్దిదూరంలోనే జరగడం పోలీసులను కూడా ఆశ్చర్యపరిచింది.
రక్తపు మడుగులో కుప్పకూలిన తేజ్పాల్ను వెంటనే ఆసుపత్రికి తరలించినప్పటికీ, వైద్యులు అతన్ని అప్పటికే మృతిగా ప్రకటించారు. ఈ ఘటనపై కేసు నమోదు చేసిన పోలీసులు నిందితుల గుర్తింపు కోసం గాలింపు చర్యలు చేపట్టారు. పాత కక్షల నేపథ్యంలోనే ఈ హత్య జరిగిందని, నిందితులను త్వరలోనే అరెస్ట్ చేస్తామని లూథియానా ఎస్ఎస్పీ తెలిపారు.
