దేశవ్యాప్తంగా త్వరలోనే జనాభా గణన (Census) ప్రారంభం కానుంది. ఈ నేపథ్యంలో గణన సమయంలో ప్రజలను ఏయే ప్రశ్నలు అడుగుతారు? అనే అంశంపై ఆసక్తి నెలకొంది. దీనికి సంబంధించిన వివరాలను కేంద్ర ప్రభుత్వం అధికారికంగా వెల్లడించింది. మొత్తం 33 ప్రశ్నలతో కూడిన పూర్తి జాబితాను విడుదల చేసింది. జనాభా గణన అధికారులు ఇంటింటికి వెళ్లి ఈ వివరాలను సేకరించనున్నారు.
కేంద్ర హోం మంత్రిత్వ శాఖ జారీ చేసిన నోటిఫికేషన్ ప్రకారం, ఈసారి జనాభా గణన కేవలం కుటుంబ సభ్యుల సంఖ్య లెక్కించడానికే పరిమితం కాదు. ప్రజల జీవనశైలి, గృహ సౌకర్యాలు, వాహనాలు, గ్యాడ్జెట్లు, ఇంటర్నెట్ వినియోగం, ఆహారపు అలవాట్లు వంటి అనేక అంశాలపై కూడా సమాచారం సేకరించనున్నారు.
కుటుంబ యజమాని వివరాలతో పాటు ఇంటి నిర్మాణ విధానం, ఇంట్లో ఉన్న మౌలిక వసతులు, తాగునీటి వనరు, మరుగుదొడ్డి సౌకర్యం, వంట కోసం ఉపయోగించే ఇంధనం, విద్యుత్ వినియోగం వంటి అంశాలను ప్రభుత్వం నమోదు చేయనుంది. అలాగే ల్యాప్టాప్, స్మార్ట్ఫోన్, టెలివిజన్, వాహనాలు వంటి సదుపాయాలపై కూడా ప్రశ్నలు ఉంటాయి.
మొబైల్ నంబర్ను కేవలం జనాభా గణనకు సంబంధించిన సమాచార మార్పిడి కోసం మాత్రమే తీసుకుంటామని కేంద్ర ప్రభుత్వం స్పష్టం చేసింది. ఇతర ప్రయోజనాల కోసం వినియోగించబోమని నోటిఫికేషన్లో పేర్కొంది.
జనాభా గణనలో అడిగే 33 ప్రశ్నల పూర్తి జాబితా
◆ భవనం నంబర్ (మున్సిపల్ / స్థానిక సంస్థ / జనాభా గణన నంబర్)
◆ జనాభా గణన ఇంటి నంబర్
◆ ఇంటి నేల నిర్మాణానికి ఉపయోగించిన ప్రధాన పదార్థం
◆ ఇంటి గోడల నిర్మాణానికి ఉపయోగించిన ప్రధాన పదార్థం
◆ ఇంటి పైకప్పు నిర్మాణానికి ఉపయోగించిన ప్రధాన పదార్థం
◆ ఇంటి వినియోగం (నివాసం / వాణిజ్యం మొదలైనవి)
◆ ఇంటి పరిస్థితి (స్థితిగతులు)
◆ కుటుంబ క్రమ సంఖ్య
◆ కుటుంబంలో సాధారణంగా నివసించే వ్యక్తుల మొత్తం సంఖ్య
◆ కుటుంబ యజమాని పేరు
◆ కుటుంబ యజమాని లింగం
◆ కుటుంబ యజమాని ఎస్సీ (SC) / ఎస్టీ (ST) / ఇతర వర్గాలకు చెందినవారా? (కీలకమైన ప్రశ్న)
◆ ఇంటి యాజమాన్య స్థితి (సొంత ఇల్లు / అద్దె ఇల్లు)
◆ కుటుంబ నివాసానికి అందుబాటులో ఉన్న గదుల సంఖ్య
◆ కుటుంబంలో నివసిస్తున్న వివాహిత జంటల సంఖ్య
◆ తాగునీటి ప్రధాన వనరు
◆ తాగునీటి వనరు లభ్యత
◆ వెలుతురు (లైటింగ్) కోసం ఉపయోగించే ప్రధాన వనరు
◆ మరుగుదొడ్డి సౌకర్యం
◆ మరుగుదొడ్డి రకం
◆ మురుగునీటి పారుదల వ్యవస్థ
◆ స్నానపు గది సౌకర్యం
◆ వంటగది మరియు LPG / PNG కనెక్షన్ లభ్యత
◆ వంట కోసం ఉపయోగించే ప్రధాన ఇంధనం
◆ రేడియో / ట్రాన్సిస్టర్
◆ టెలివిజన్ (TV)
◆ ఇంటర్నెట్ సౌకర్యం
◆ ల్యాప్టాప్ / కంప్యూటర్
◆ టెలిఫోన్ / మొబైల్ ఫోన్ / స్మార్ట్ఫోన్
◆ సైకిల్ / స్కూటర్ / మోటార్ సైకిల్ / మోపెడ్
◆ కారు / జీపు / వ్యాన్
◆ కుటుంబం ప్రధానంగా వినియోగించే ఆహార ధాన్యాలు
◆ మొబైల్ నంబర్ (జనాభా గణన సమాచారానికే పరిమితం)
గమనిక
ప్రస్తుతం విడుదల చేసిన నోటిఫికేషన్ 2027 జనాభా గణన మొదటి దశకు సంబంధించినది. ఈ దశలో ఇళ్ల జాబితా మరియు గృహ గణన చేపడతారు.
రెండో దశ అయిన జనాభా లెక్కింపుకు సంబంధించిన ప్రశ్నల జాబితాను కేంద్ర ప్రభుత్వం త్వరలో విడుదల చేయనుంది.
