హైదరాబాద్: గృహ రుణం కోసం ఎదురుచూస్తున్న మధ్య తరగతి కుటుంబాలకు ఇది నిజంగా శుభవార్త. హోమ్ లోన్స్ విభాగంలో ప్రముఖ సంస్థ LIC హౌసింగ్ ఫైనాన్స్ (LIC HFL) మరో కీలక ప్రకటన చేసింది. కొత్తగా హోమ్ లోన్ తీసుకునే వారికి ఇకపై వడ్డీ రేటు కేవలం 7.50 శాతం నుంచే ప్రారంభమవుతుంది. ఇదివరకు ఉన్న వడ్డీ రేటుతో పోలిస్తే ఇది 50 బేసిస్ పాయింట్ల తక్కువ.
LIC HFL మేనేజింగ్ డైరెక్టర్, సీఈఓ త్రిభువన్ అధికారి వెల్లడించిన వివరాల ప్రకారం, సంస్థ 36వ వార్షికోత్సవం సందర్భంగా ఈ నిర్ణయం తీసుకుంది. గృహ రుణాలను మరింత అందుబాటులోకి తీసుకురావడమే లక్ష్యంగా వడ్డీ రేట్లను తగ్గించినట్టు చెప్పారు. మధ్య తరగతి ప్రజలు తక్కువ వడ్డీకే ఇళ్లను కొనుగోలు చేసే అవకాశాన్ని ఉపయోగించుకోవాలని కోరారు.
వడ్డీ తగ్గింపు కారణాలు ఏమిటి?
రిజర్వ్ బ్యాంక్ ఆఫ్ ఇండియా (RBI) ఇటీవల వరుసగా మూడు దఫాలు రెపో రేటును తగ్గించింది. ఫిబ్రవరిలో 25 బేసిస్ పాయింట్లు, ఏప్రిల్‌లో మరో 25 బీపీఎస్, జూన్‌లో 50 బీపీఎస్ కలిపి మొత్తం 100 బేసిస్ పాయింట్ల తగ్గింపు జరిగింది. దీని ప్రభావంగా రుణాలపై వడ్డీ రేట్లు తగ్గడం ప్రారంభమైంది. ఈ ఫేస్‌లో LIC కూడా తన వడ్డీ రేటును తగ్గించి హోమ్ లోన్ తీసుకునేవారికి ఊరటనిచ్చింది.
ఎల్ఐసీ హౌసింగ్ ఫైనాన్స్ హోమ్ లోన్ ప్రధాన ఫీచర్లు:
- ప్రారంభ వడ్డీ రేటు: 7.50%
- ఈఎంఐ భారం తగ్గింపు
- మధ్య తరగతి కుటుంబాల కోసం ప్రత్యేకంగా రూపొందించిన స్కీమ్‌లు
- నమ్మదగిన సంస్థ కింద రుణం పొందే అవకాశంతో భద్రత
మీ ఇంటి కలను నిజం చేసుకోండి
ఈ కుదింపు నేపథ్యంలో, ఎక్కువ మంది తమ స్వంత ఇంటి కలను నెరవేర్చేందుకు ముందుకు రావచ్చని LIC ఆశిస్తోంది. ఇతర బ్యాంకులతో పోలిస్తే LIC హౌసింగ్ ఫైనాన్స్ గృహ రుణాలపై తక్కువ వడ్డీకే రుణాలను అందిస్తోంది. ఇది బడ్జెట్‌లో ఇళ్లు కొనాలనుకునే వారికి సరైన సమయమని నిపుణులు సూచిస్తున్నారు.
