దేశవ్యాప్తంగా 77వ గణతంత్ర దినోత్సవ వేడుకలు జరుగుతున్న వేళ, పశ్చిమ బెంగాల్ రాజధాని కోల్కతా శివార్లలో విషాద ఘటన చోటుచేసుకుంది. దక్షిణ 24 పరగణాల జిల్లాలోని నజీరాబాద్ (ఆనందపూర్ ప్రాంతం)లో తెల్లవారుజామున జరిగిన భారీ అగ్నిప్రమాదంలో ఏడుగురు ప్రాణాలు కోల్పోయారు. మరికొంతమంది గాయపడగా, సుమారు 20 మంది కార్మికులు గల్లంతైనట్లు కుటుంబ సభ్యులు ఆందోళన వ్యక్తం చేస్తున్నారు.
జనవరి 26 ఉదయం సుమారు 3 గంటల సమయంలో ప్యాక్ చేసిన ఆహార పదార్థాలు, సాఫ్ట్ డ్రింక్ బాటిళ్లు నిల్వ ఉంచే ఓ గోదాంలో ఒక్కసారిగా మంటలు చెలరేగాయి. క్షణాల్లోనే అవి పక్కనే ఉన్న మరో రెండు గోదాములకు వ్యాపించాయి. గోదాముల్లో అత్యంత దహనశీల పదార్థాలు ఉండటంతో మంటలు తీవ్రరూపం దాల్చాయి.
బయట నుంచి తాళం… బయటపడలేని కార్మికులు?
ప్రమాదం జరిగిన సమయంలో గోదాముకు బయట నుంచి తాళం వేసి ఉందని స్థానికులు ఆరోపిస్తున్నారు. ఈ కారణంగా లోపల ఉన్న సెక్యూరిటీ సిబ్బంది, నైట్ డ్యూటీలో ఉన్న కార్మికులు బయటకు రావలేకపోయారని చెబుతున్నారు. పైగా, గల్లీలు చాలా ఇరుకుగా ఉండటంతో ఫైర్ ఇంజన్లు ఘటనాస్థలానికి చేరుకోవడంలో తీవ్ర ఇబ్బందులు ఎదురయ్యాయి. నీటి పైపుల పొడవు సరిపోకపోవడం కూడా మంటలను అదుపు చేయడంలో ఆటంకంగా మారింది.
రంగంలోకి 15 ఫైర్ ఇంజన్లు
సమాచారం అందగానే అగ్నిమాపక శాఖ అప్రమత్తమై 15 ఫైర్ ఇంజన్లను, డజన్ల కొద్దీ ఫైర్ ఫైటర్లను సంఘటనా స్థలానికి పంపింది. గ్యాస్ కట్టర్ల సాయంతో గోదాము గోడలు, తలుపులు పగులగొట్టి లోపలికి ప్రవేశించారు. గంటల తరబడి సాగిన శ్రమ తర్వాత మంటలు చాలా వరకు అదుపులోకి వచ్చాయి. శిథిలాల నుంచి ఇప్పటివరకు రెండు మృతదేహాలను వెలికితీయగా, మిగిలిన వారి కోసం గాలింపు చర్యలు కొనసాగుతున్నాయి.
ప్రభుత్వ స్పందన
రాష్ట్ర ఇంధన శాఖ మంత్రి అరూప్ బిస్వాస్ సంఘటనా స్థలానికి చేరుకుని సహాయక చర్యలను పర్యవేక్షించారు. “పోలీసులు, అగ్నిమాపక సిబ్బంది సమన్వయంతో పనిచేస్తున్నారు. గల్లంతైన వారి కోసం గాలింపు కొనసాగుతోంది. ఇది రాజకీయం చేసే సమయం కాదు. బాధిత కుటుంబాలకు సహాయం చేయడమే ప్రభుత్వ ప్రాధాన్యత” అని ఆయన తెలిపారు.
అగ్నిప్రమాదానికి గల ఖచ్చితమైన కారణాలు ఇంకా తెలియరాలేదు. ప్రాథమికంగా షార్ట్ సర్క్యూట్ వల్లే ప్రమాదం జరిగి ఉండవచ్చని అధికారులు భావిస్తున్నారు. గోదాముల్లో కనీస అగ్నిమాపక భద్రతా ప్రమాణాలు పాటించారా? అనుమతులు సక్రమంగా ఉన్నాయా? అనే అంశాలపై విస్తృత విచారణ చేపట్టారు.
పండుగ వాతావరణంలో చోటుచేసుకున్న ఈ విషాద ఘటన కోల్కతాలో తీవ్ర విషాదాన్ని మిగిల్చింది. ముఖ్యంగా గల్లంతైన 20 మంది కార్మికుల భవితవ్యంపై వారి కుటుంబాల్లో తీవ్ర ఆందోళన నెలకొంది.
