సంవత్సరంలో అత్యంత పవిత్రమైన నెలలలో ఒకటైన కార్తీక మాసం ఇప్పుడు కృష్ణపక్షంలోకి ప్రవేశించింది. ఈ మాసం శుక్లపక్షంలో పండుగల వలెనే, కృష్ణపక్షంలోనూ పుణ్యకార్యాలు, వ్రతాలు, దీపారాధనలు ప్రత్యేకమైన ప్రాధాన్యతను సంతరించుకున్నాయి. పండితులు చెబుతున్నట్లుగా, కార్తీక పౌర్ణమి అనంతర 15 రోజులు కూడా దేవతారాధనకు, వ్రతాలకు, శుభకార్యాలకు అత్యంత అనుకూలమైనవే.
కార్తీక మాసం ప్రాధాన్యం
భారతీయ పంచాంగంలో ఉన్న 12 నెలలలో శ్రావణం మరియు కార్తీకం అత్యంత పవిత్రమైన మాసాలుగా పరిగణిస్తారు. శ్రావణమాసం వర్షాలతో ప్రకృతిని సుసంపన్నం చేస్తే, చలికాలపు కార్తీకమాసం దేవతల ఆరాధనకు, దీపారాధనకు అత్యంత శ్రేష్ఠమైన సమయమని శాస్త్రాలు చెబుతున్నాయి. ఈ మాసంలో శివకేశవులు ఇద్దరూ ప్రత్యేక పూజలకు అర్హులు అవుతారు.
ఇమ్యూనిటీ తగ్గే ఈ కాలంలో దీపాలు వెలిగించడం ద్వారా శరీర, మనో, ఆధ్యాత్మిక శక్తులను సమతుల్యం చేసుకోవచ్చని పండితులు చెబుతున్నారు.
శుక్లపక్షంలోని ముఖ్య పండుగలు
కార్తీకమాస శుక్లపక్షంలో దేవతా పూజలు, దీపదానం, పండుగలు, వ్రతాలు విస్తారంగా జరుగుతాయి.
ఇవి కొన్ని ముఖ్యమైన పండుగలు:
- కేదారగౌరి వ్రతం
- బలిపాడ్యమి
- గోవర్ధన పూజ
- ఆకాశ దీపారంభం
- కార్తీక స్నానారంభం
- యమ ద్వితీయ
- భగినీ హస్త భోజనం
- నాగపంచమి
- తిరుమల పుష్పయాగం
- చిలుక ఏకాదశి
- తులసి కళ్యాణం
- వైకుంఠ చతుర్దశి
ఈ రోజుల్లో నదీ స్నానం, దీపదానం, హరిహర దర్శనం, సత్యనారాయణ వ్రతం వంటి పుణ్యకార్యాలు నిర్వహిస్తారు.
కృష్ణపక్షంలోని విశేషత
కార్తీక పౌర్ణమి తర్వాత వచ్చే కృష్ణపక్షం రోజులు కూడా పుణ్యఫలదాయకమైనవే. ఈ 15 రోజుల్లో దీపారాధన చేయడం, శివకేశవ పూజ, సత్యనారాయణ స్వామి వ్రతం వంటి ఆచారాలు అత్యంత శుభప్రదమని పండితులు చెబుతున్నారు.
ఈ కాలంలో వచ్చే ముఖ్యమైన పండుగలు:
- సంకష్ట చతుర్థి
- ఉత్పత్తి ఏకాదశి
- సర్వ ఏకాదశి
- కార్తిక బహుళ ద్వాదశి
- తిరుచానూరు శ్రీ పద్మావతి అమ్మవారి బ్రహ్మోత్సవాలు
- శ్రీ వేదనారాయణ స్వామి పవిత్రోత్సవం
- మాసశివరాత్రి
ఇతర పూజలతో పాటు లక్ష్మీ పూజ, కేదారేశ్వర వ్రతం, సత్యనారాయణ స్వామి వ్రతం కూడా నిర్వహిస్తారు.
పుణ్యమంత్రాలు మరియు జపాలు
శాస్త్రాలు చెబుతున్నాయి –
“న కార్తీక నమో మాసః న దేవం కేశవాత్పరం!
న చ వేద సమం శాస్త్రం న తీర్థం గంగాయాశ్ సమమ్!”
ఈ మంత్రాన్ని నిత్యం జపిస్తూ, శివనామ స్మరణ చేయడం, విష్ణుభక్తులు దశావతార స్మరణ చేయడం, లలితా దేవి భక్తులు “శ్రీ మాత్రే నమః” అని జపించడం ద్వారా అపారమైన పుణ్యం లభిస్తుందని పండితులు సూచిస్తున్నారు.
వివాహాలకు అనుకూల సమయం
కార్తీక మాసంలోని కృష్ణపక్షం రోజులు కూడా ముహూర్త సమృద్ధి రోజులు అని పండితులు చెబుతున్నారు. ఈ కాలంలో వివాహాలు, గృహప్రవేశాలు, శుభకార్యాలు నిర్వహించడం శుభప్రదంగా ఉంటుందని నమ్మకం ఉంది.
