ఇంటర్మీడియట్ పరీక్షల షెడ్యూల్లో కీలక మార్పులు
ఇంటర్మీడియట్ విద్యామండలి ఈసారి పబ్లిక్ పరీక్షల నిర్వహణలో పలు మార్పులు తీసుకొచ్చింది. గతంలో మార్చి నెలలో జరిగే పరీక్షలను, ఈ ఏడాది ఫిబ్రవరిలోనే నిర్వహించేందుకు నిర్ణయం తీసుకుంది. సీబీఎస్ఈ తరహాలో ముందుగానే పరీక్షలను పూర్తి చేసే దిశగా బోర్డు ప్రణాళికలు సిద్ధం చేసింది.
పరీక్షల విధానం కొత్తగా
సైన్స్ గ్రూప్ విద్యార్థులకు ముందుగా పరీక్షలు నిర్వహిస్తారు. రోజుకు ఒక్క సబ్జెక్టు మాత్రమే పరీక్ష ఉండేలా షెడ్యూల్ రూపొందించారు. గతంలో ఒకే రోజున ఎంపీసీ, బైపీసీ, ఆర్ట్స్ విద్యార్థులకు వేర్వేరు సబ్జెక్టుల పరీక్షలు ఉండేవి. కానీ, ఈసారి ఒక రోజున ఒకే సబ్జెక్టు పరీక్ష జరగనుంది.
సైన్స్ గ్రూప్ సబ్జెక్టులన్నీ పూర్తయ్యాక భాషల పరీక్షలు నిర్వహిస్తారు. ఆపై ఆర్ట్స్ గ్రూప్ విద్యార్థులకు పరీక్షలు ప్రారంభం అవుతాయి. అయితే, ప్రాక్టికల్ పరీక్షల తేదీలపై ఇంకా స్పష్టత లేదు. జనవరి చివరిలో నిర్వహించాలా లేక రాతపరీక్షల అనంతరం జరపాలా అన్న అంశంపై త్వరలో నిర్ణయం తీసుకోనున్నారు.
మొదటి సంవత్సరంలో ప్రధాన మార్పులు
ఇంటర్మీడియట్ ప్రథమ సంవత్సరం నుంచి ఎన్సీఈఆర్టీ సిలబస్ పూర్తిస్థాయిలో అమల్లోకి వచ్చింది. ప్రశ్నాపత్రాల నమూనాలో కూడా కొత్త మార్పులు చేశారు.
- భౌతిక శాస్త్రం, రసాయన శాస్త్రం, జీవశాస్త్రం పేపర్లను 85 మార్కులకు మాత్రమే నిర్వహిస్తారు. మిగిలిన మార్కులు రెండో సంవత్సరం ప్రాక్టికల్స్లో కలుస్తాయి.
- అన్ని పేపర్లలో ఒక మార్కు ప్రశ్నలను కొత్తగా ప్రవేశపెట్టారు.
ఈ మార్పులన్నీ విద్యార్థుల అభ్యాసానికి అనుగుణంగా, సీబీఎస్ఈ తరహాలో పోటీ పరీక్షలకు మరింతగా సన్నద్ధం అయ్యేలా చేయడమే లక్ష్యంగా విద్యామండలి వెల్లడించింది.
