**అంతర్జాతీయ అంతరిక్ష కేంద్రం (ISS)**కు భారతీయ వ్యోమగామి శుభాంశు శుక్లా పయనానికి ఏర్పాట్లు పూర్తయ్యాయి. వరుస వాయిదాల అనంతరం, జూన్ 25 నాడు ఈ మిషన్ నింగిలోకి వెళ్లనుంది. అమెరికాలోని నాసా కెన్నెడీ స్పేస్ సెంటర్, ఫ్లోరిడా నుంచి మధ్యాహ్నం 12:01 గంటలకు స్పేస్ ఎక్స్ ఫాల్కన్-9 రాకెట్ ద్వారా ప్రయోగం జరగనుంది.
ఈ ప్రయోగంలో శుభాంశుతో పాటు మరో ముగ్గురు వ్యోమగాములు — అమెరికా, హంగేరీ, పోలాండ్‌కు చెందిన వారు పాల్గొంటున్నారు. మిషన్ లాంచ్ అయిన 28 గంటల తరువాత, వ్యోమనౌక అంతర్జాతీయ అంతరిక్ష కేంద్రంతో అనుసంధానం కానుంది. శుభాంశు బృందం 14 రోజులు అంతరిక్షంలో గడుపుతూ, వివిధ శాస్త్రీయ ప్రయోగాలు నిర్వహించనున్నారు.
వాయిదాల వెనుక కారణాలు
ఈ యాక్సియం-4 మిషన్‌ను తొలుత మే 29న ప్రయోగించాల్సి ఉండగా, వాతావరణ సమస్యలు, ఫాల్కన్-9లో ద్రవ ఆక్సిజన్ లీకేజీ, అంతరిక్ష కేంద్రంలోని జ్వెజ్డా మాడ్యూల్‌లో గాలి లీక్ వంటి సాంకేతిక సమస్యల వల్ల ఇప్పటి వరకు ఆరు సార్లు వాయిదా పడింది. భద్రతకు ప్రాముఖ్యత ఇస్తూ, ఇస్రో, నాసా, స్పేస్‌ఎక్స్, యాక్సియం స్పేస్ సంస్థలు కలిసి సమస్యలను పరిష్కరించాయి.
మిషన్‌లో ఎవరు పాల్గొంటున్నారు?
ఈ మిషన్‌లో భాగంగా పాల్గొంటున్న నలుగురు వ్యోమగాములు:
- శుభాంశు శుక్లా (భారత్) – మిషన్ పైలట్
- పెగ్గి విట్సన్ (అమెరికా) – మిషన్ కమాండర్
- టిబోర్ కపు (హంగేరీ)
- స్లావోస్జ్ ఉజ్నాన్స్కి-విస్నియెవ్స్కీ (పోలాండ్)
ఈ ప్రయోగానికి యాక్సియం స్పేస్ అనే వాణిజ్య అంతరిక్ష సంస్థ ప్రాథమిక ఆర్గనైజర్‌గా ఉంది. ఇందులో ఇస్రో, నాసా, ఐరోపా అంతరిక్ష సంస్థ భాగస్వాములుగా ఉన్నారు. ప్రయోగానికి ఎలాన్ మస్క్ స్థాపించిన స్పేస్‌ఎక్స్ కంపెనీ రూపొందించిన ఫాల్కన్-9 రాకెట్ వినియోగించనున్నారు.
శుభాంశు శుక్లా ప్రొఫైల్
శుభాంశు శుక్లా 2006లో భారత వైమానిక దళంలో ఫైటర్ వింగ్‌లో చేరారు. 2024 మార్చి నాటికి గ్రూప్ కెప్టెన్‌గా పదోన్నతి పొందారు. ఆయనకు 2000 గంటలకు పైగా యుద్ధ విమానాలు నడిపిన అనుభవం ఉంది.
1984లో రాకేష్ శర్మ తర్వాత అంతర్జాతీయ అంతరిక్ష కేంద్రానికి వెళ్లే రెండవ భారతీయుడుగా శుభాంశు శుక్లా చరిత్ర సృష్టించబోతున్నారు.
60కి పైగా శాస్త్రీయ ప్రయోగాలు
ISSలో శుభాంశు బృందం మానవ శరీర అధ్యయనం, జీవ శాస్త్రం, భూమి పరిశీలన, పదార్థ విజ్ఞానం తదితర విభాగాల్లో 60కు పైగా శాస్త్రీయ ప్రయోగాలు నిర్వహించనున్నారు. అంతేకాకుండా, ప్రధాని నరేంద్ర మోదీ, పాఠశాల విద్యార్థులతో వీడియో కాల్ ద్వారా వారు సంభాషించనున్నారు.
