ఇంగ్లండ్‌తో జరుగుతున్న టెండూల్కర్-అండర్సన్ ట్రోఫీ తొలి టెస్టు మ్యాచ్‌లో టీమిండియా ఓపెనర్ యశస్వి జైస్వాల్ జోరుమీదున్నాడు. శతకం సాధించి టీమిండియా స్కోర్ బోర్డును ముందుకు నడిపిస్తున్నాడు. హెడింగ్లీ వేదికగా టాస్ గెలిచిన ఇంగ్లండ్ కెప్టెన్ బెన్ స్టోక్స్ తొలుత బౌలింగ్ ఎంచుకున్నాడు. బ్యాటింగ్‌కి దిగిన భారత్ ఆకట్టుకునే ఆటతీరు చూపిస్తోంది.
యశస్వి జైస్వాల్ – కేఎల్ రాహుల్ జోడీ తొలి వికెట్‌కు 91 పరుగులు చేసింది. రాహుల్ 42 పరుగుల వ్యక్తిగత స్కోర్ వద్ద స్లిప్‌లో క్యాచ్ ఇచ్చి అవుటయ్యాడు. వెంటనే వచ్చిన సాయి సుదర్శన్ తక్కువ స్కోరుకే పెవిలియన్ చేరాడు. అయితే, జైస్వాల్ మాత్రం ఆగలేదు. కెప్టెన్ శుభమన్ గిల్‌తో కలిసి జాగ్రత్తగా ఆడుతూ స్కోర్ పెంచుతున్నాడు.
జైస్వాల్ 144 బంతుల్లో 16 ఫోర్లు, ఒక సిక్సర్‌తో శతకం నమోదు చేశాడు. ఈ మ్యాచ్‌తో అతను తన కెరీర్‌లో ఐదో టెస్టు సెంచరీ నమోదు చేశాడు. ప్రస్తుతం అతని ఖాతాలో 20 టెస్టుల్లో 1898 పరుగులున్నాయి. వీటిలో రెండు డబుల్ సెంచరీలు, ఐదు సెంచరీలు, పది అర్ధ శతకాలు ఉన్నాయి.
గాయం కారణంగా కొద్దిగా ఇబ్బందిపడ్డప్పటికీ జైస్వాల్ గట్టి పట్టుదలతో క్రీజులో నిలబడ్డాడు. బ్రైడన్ కార్స్, బెన్ స్టోక్స్ బౌలింగ్‌ను ధైర్యంగా ఎదుర్కొంటూ వరుస బౌండరీలతో అభిమానులను ఉర్రూతలూగిస్తున్నాడు.
మొదటి సెషన్‌లో 92 పరుగులు చేసిన టీమిండియా, రెండో సెషన్‌లో 123 పరుగులు జోడించింది. టీ బ్రేక్ సమయానికి భారత్ రెండు వికెట్లు మాత్రమే కోల్పోయి 215 పరుగులు చేసింది. ప్రస్తుతం శుభమన్ గిల్ (58), యశస్వి జైస్వాల్ (100) పరుగులతో క్రీజులో ఉన్నారు. మ్యాచ్‌పై పూర్తి ఆధిపత్యాన్ని ప్రదర్శిస్తున్న టీమిండియా, ఇంగ్లండ్‌కి కఠిన పరీక్ష ఇస్తోంది.
