హైదరాబాద్–విజయవాడ జాతీయ రహదారి (NH-65)పై పెద్ద ప్రమాదం తప్పింది. సుమారు 40 మంది ప్రయాణికులను తీసుకుని వెళ్తున్న ఓ ప్రైవేట్ ట్రావెల్స్ బస్సులో ఒక్కసారిగా మంటలు చెలరేగాయి. అయితే డ్రైవర్ సమయస్ఫూర్తి, అప్రమత్తత కారణంగా ప్రయాణికులంతా సురక్షితంగా బయటపడ్డారు. ఈ ఘటన నల్గొండ జిల్లా చిట్యాల మండలం పిట్టంపల్లి వద్ద మంగళవారం ఉదయం చోటుచేసుకుంది.
వివరాల ప్రకారం, విహారీ ట్రావెల్స్కు చెందిన బస్సు హైదరాబాద్ నుంచి విజయవాడ వైపుకు బయలుదేరింది. బస్సులో సుమారు 40 మంది ప్రయాణికులు ఉన్నారు. పిట్టంపల్లి గ్రామ పరిసరాలకు చేరుకున్న సమయంలో బస్సు ఇంజిన్ భాగం నుండి పొగలు ఎగసిపడటం డ్రైవర్ గమనించాడు. క్షణం ఆలస్యం చేయకుండా బస్సును రోడ్డుపక్కకు ఆపి, ప్రయాణికులందరినీ అప్రమత్తం చేశాడు. వెంటనే వారు బస్సు నుంచి దిగి సురక్షితంగా దూరమయ్యారు.
ప్రయాణికులు దిగిన కొద్ది సేపటికే మంటలు వేగంగా వ్యాపించి బస్సు మొత్తం మంటల్లో కాలి బూడిదైంది. ఘటన స్థలానికి అగ్నిమాపక సిబ్బంది చేరుకొని మంటలను అదుపు చేశారు. అయితే అప్పటికి బస్సు పూర్తిగా దగ్ధమైంది. అదృష్టవశాత్తూ ఎలాంటి ప్రాణనష్టం జరగలేదు.
స్థానిక పోలీసులు, అగ్నిమాపక సిబ్బంది ఘటన స్థలానికి చేరుకుని విచారణ చేపట్టారు. బస్సులో షార్ట్సర్క్యూట్ కారణంగా మంటలు చెలరేగినట్టు ప్రాథమికంగా గుర్తించారు. డ్రైవర్ వేగవంతమైన నిర్ణయం వల్లే పెద్ద ప్రమాదం తప్పిందని అధికారులు తెలిపారు. ప్రయాణికులు కూడా డ్రైవర్ ధైర్యసాహసాలను కొనియాడారు.
