భారత పురుషుల హాకీ జట్టు మరోసారి తన ప్రతిభను నిరూపించింది. బిహార్లోని రాజ్గిర్ వేదికగా ఆదివారం జరిగిన ఆసియా కప్ ఫైనల్లో టీమిండియా దక్షిణ కొరియాపై 4-1 గోల్స్ తేడాతో ఘనవిజయం సాధించింది. ఈ విజయం ఎనిమిదేళ్ల తర్వాత ఆసియా కప్ను కైవసం చేసుకున్న క్షణంగా చరిత్రలో నిలిచింది. అంతేకాకుండా, 2026లో జరగబోయే ఎఫ్ఐహెచ్ ప్రపంచకప్కు భారత జట్టుకు అర్హత లభించింది.
ఈ చారిత్రక గెలుపు దేశవ్యాప్తంగా ఆనందాన్ని నింపింది. తెలంగాణ, ఆంధ్రప్రదేశ్ ముఖ్యమంత్రులు, రాజకీయ నాయకులు, క్రీడాభిమానులు జట్టును అభినందించారు.
తెలంగాణ సీఎం రేవంత్ రెడ్డి అభినందనలు తెలియజేస్తూ –
“డిఫెండింగ్ ఛాంపియన్పై సాధించిన ఈ విజయంతో దేశం గర్వపడుతోంది. ఇది కేవలం హాకీ జట్టుది మాత్రమే కాదు, యావత్ భారతదేశానిదే విజయమని” అన్నారు.
ఆంధ్రప్రదేశ్ సీఎం చంద్రబాబు నాయుడు సోషల్ మీడియా వేదికగా స్పందిస్తూ –
“ఎనిమిదేళ్ల తర్వాత ఆసియా కప్ కైవసం చేసుకోవడం క్రీడా చరిత్రలో ఒక మైలురాయి. యువ క్రీడాకారుల పట్టుదల, కృషికి ఇది నిదర్శనం. ప్రపంచ వేదికపై భారత హాకీ ప్రభావం మరింత బలపడుతుంది” అని పేర్కొన్నారు.
వైసీపీ అధినేత, మాజీ సీఎం వైఎస్ జగన్ మోహన్ రెడ్డి కూడా జట్టును అభినందించారు. ఆయన సందేశంలో –
“ఆసియా కప్లో అద్భుత విజయం సాధించిన భారత హాకీ జట్టుకు హృదయపూర్వక శుభాకాంక్షలు. భవిష్యత్తులోనూ మరిన్ని విజయాలు సాధించాలని ఆకాంక్షిస్తున్నాను” అని పేర్కొన్నారు.
👉 ఈ విజయం భారత హాకీ పునరుజ్జీవనానికి పెద్ద బలాన్ని ఇచ్చింది. ఇక 2026 ప్రపంచకప్లోనూ టీమిండియా అదే జోరు కొనసాగిస్తుందనే ఆశలు అభిమానుల్లో మొదలయ్యాయి.
