పవర్ స్టార్ పవన్ కల్యాణ్ నటిస్తున్న ప్రతిష్టాత్మక పీరియాడిక్ యాక్షన్ చిత్రం ‘హరి హర వీరమల్లు: పార్ట్ 1 – స్వోర్డ్ వర్సెస్ స్పిరిట్’ విడుదలకు సిద్ధమవుతోంది. ఇటీవలే ఈ చిత్రం సెన్సార్ కార్యక్రమాలు పూర్తి చేసుకుని U/A సర్టిఫికేట్ పొందింది. చిత్రం నిడివి 2 గంటల 42 నిమిషాలు గా నిర్ణయించబడింది.
ఈ చిత్రాన్ని జులై 24న ప్రపంచవ్యాప్తంగా తెలుగు, హిందీ, తమిళం, కన్నడ, మలయాళ భాషల్లో విడుదల చేయనున్నారు. ప్రేక్షకుల్లో మరింత ఉత్సాహాన్ని పెంచేందుకు చిత్రబృందం జులై 20న విశాఖపట్నంలో భారీ స్థాయిలో ప్రీ-రిలీజ్ ఈవెంట్ నిర్వహించనుంది. ఈ వేడుకలో పవన్ కల్యాణ్తో పాటు పలువురు సినీ ప్రముఖులు పాల్గొననున్నారు.
చిత్ర దర్శకత్వ బాధ్యతలు క్రిష్ జాగర్లమూడి ఒక భాగం వరకు చేపడితే, మిగతా పార్ట్ను ఏఎం జ్యోతికృష్ణ పూర్తిచేశారు. ఈ సినిమాను ప్రముఖ నిర్మాత ఏఎం రత్నం నిర్మించారు. చారిత్రక నేపథ్యంలో తెరకెక్కుతున్న ఈ చిత్రం భారీ యాక్షన్ సన్నివేశాలతో, భావోద్వేగ క్షణాలతో ప్రేక్షకులను ఆకట్టుకునేలా రూపొందించారని చిత్ర బృందం పేర్కొంటోంది.
హాలీవుడ్ యాక్షన్ డైరెక్టర్ నిక్ పావెల్ ఆధ్వర్యంలో చిత్రీకరించిన యుద్ధ సన్నివేశాలు ఈ సినిమాకి ప్రత్యేక ఆకర్షణగా నిలవనున్నాయి. పవన్ కల్యాణ్కు జోడిగా నిధి అగర్వాల్, విలన్ పాత్రలో బాబీ డియోల్ వంటి ప్రముఖులు నటిస్తున్నారు.
ప్రీ-రిలీజ్ ఈవెంట్ సందర్భంగా చిత్రం నుంచి ఒక పవర్ఫుల్ పాటతో పాటు, సినిమా నిర్మాణానికి సంబంధించిన వీడియోను విడుదల చేయనున్నారు. ఈ ఈవెంట్ అభిమానుల్లో భారీ స్థాయిలో ఉత్సాహం నింపేలా ఉంటుందని నిర్వాహకులు పేర్కొన్నారు.
ఈ చిత్రానికి సంగీతాన్ని ఆస్కార్ అవార్డు గ్రహీత ఎంఎం కీరవాణి సమకూర్చారు. ఆయన సంగీతం, చిత్ర నిర్మాణ విలువలు కలిసిన ఈ సినిమా ప్రేక్షకులకు కన్నుల పండుగగా ఉండబోతోందన్న అంచనాలు నెలకొన్నాయి.
మూడు సంవత్సరాల విరామం తర్వాత పవన్ కల్యాణ్ సిల్వర్ స్క్రీన్పై కనిపించనున్న ఈ చిత్రం కోసం అభిమానులు ఎంతో ఉత్కంఠతో ఎదురు చూస్తున్నారు.
