గుంటూరు అంటేనే మిర్చి. ప్రపంచవ్యాప్తంగా గుర్తింపు పొందిన గుంటూరు ఎర్ర మిర్చి ఇటీవల రైతులకు నష్టాలు తెచ్చిపెడుతుండగా, ఇప్పుడు ఎల్లో మిర్చి సాగు రైతులకు కొత్త ఆశగా మారింది.
ఈ సీజన్లో గుంటూరు జిల్లాలో సుమారు 1000 ఎకరాల్లో ఎల్లో మిర్చి సాగు జరిగింది. ముఖ్యంగా మేడికొండూరు మండలంలోని మందపాడు, విశదల, సిరిపురం గ్రామాల్లో ఎక్కువగా పండిస్తున్నారు.
అధిక దిగుబడి – అధిక ధర
- ఎకరానికి 25–30 క్వింటాళ్ల దిగుబడి
- సాధారణ ఎర్ర మిర్చి కంటే 10 క్వింటాళ్లు ఎక్కువ
- క్వింటా ధర రూ.25,000 నుంచి ప్రారంభం
- గతంలో గరిష్టంగా రూ.50,000 వరకూ పలికింది
ఎర్ర మిర్చి ధరలు సాధారణంగా రూ.10,000–20,000 మధ్య ఉండగా, ఎల్లో మిర్చి అధిక ధర రైతులను ఆకర్షిస్తోంది. సాగు ఖర్చు ఎకరానికి సుమారు రూ.10 వేల వరకు ఎక్కువైనా, లాభాలు మెరుగ్గా ఉంటాయని రైతులు చెబుతున్నారు. చీడపీడల సమస్య కూడా తక్కువగా ఉందని పేర్కొంటున్నారు.
ఘాటైన ఎర్ర మిర్చికి పేరుగాంచిన గుంటూరులో ఇప్పుడు పసుపు రంగు మిర్చి హాట్ టాపిక్గా మారింది. ధరలు స్థిరంగా ఉంటే రానున్న రోజుల్లో ఎల్లో మిర్చి సాగు మరింత పెరిగే అవకాశం ఉంది.
