గరిక (దూర్వా) గడ్డి ఆరోగ్య ప్రయోజనాలు: రక్తహీనత నుంచి మానసిక ప్రశాంతత వరకు అద్భుత లాభాలు

హిందూ సంప్రదాయంలో విఘ్నాలను తొలగించే విఘ్నేశ్వరుడి పూజలో గరిక (దూర్వా)కు ఉన్న ప్రాధాన్యం అపారం. బంగారు ఆభరణాలు, పంచభక్ష్య పరమాన్నాలు సమర్పించకపోయినా… భక్తితో గుప్పెడు గరికను అర్పిస్తే చాలు గణపయ్య కృపిస్తాడనే విశ్వాసం శతాబ్దాలుగా ఉంది. కానీ ఈ గరిక ప్రాముఖ్యత పూజగదికే పరిమితం కాదు. ఆయుర్వేదంలో ఇది ఒక అద్భుతమైన ఔషధ గని. మన ఇంటి ఆవరణలోనే, పార్కుల్లోనే సులభంగా కనిపించే ఈ చిన్న గడ్డి పరకలో దాగి ఉన్న ఆరోగ్య రహస్యాలు తెలిస్తే నిజంగా ఆశ్చర్యపోతారు.

పోషకాలతో నిండిన గరిక

సాధారణంగా కనిపించే దూర్వా గడ్డిలో కాల్షియం, ఐరన్, ఫాస్పరస్, పొటాషియం, ప్రోటీన్, ఫైబర్ వంటి అనేక కీలక పోషకాలు సమృద్ధిగా ఉన్నాయి. ఇవి శరీరాన్ని పలు రకాల అనారోగ్యాల నుంచి కాపాడడంలో ముఖ్యమైన పాత్ర పోషిస్తాయి. ఆయుర్వేద నిపుణుల అభిప్రాయం ప్రకారం… గరిక కడుపు సంబంధిత సమస్యల నుంచి మానసిక ప్రశాంతత వరకు అనేక ఆరోగ్య సమస్యలకు సహజమైన పరిష్కారాన్ని అందిస్తుంది.

రక్తహీనతకు చెక్, రోగనిరోధక శక్తికి బలం

నేటి జీవనశైలిలో రక్తహీనత (అనీమియా) సమస్యతో బాధపడేవారి సంఖ్య పెరుగుతోంది. అలాంటి వారికి గరిక రసం ఒక వరంలా పనిచేస్తుంది. దూర్వా రసాన్ని క్రమం తప్పకుండా తీసుకుంటే హిమోగ్లోబిన్ స్థాయులు పెరగడమే కాకుండా రక్తం శుద్ధి అవుతుంది. అంతేకాదు, తాజా గరికను శుభ్రంగా కడిగి రసం తీసుకుని తాగడం వల్ల శరీరంలోని రోగనిరోధక శక్తి బలపడుతుంది. చిన్నపాటి ఇన్ఫెక్షన్లను ఎదుర్కొనే సామర్థ్యం పెరుగుతుంది.

మానసిక ప్రశాంతత, రక్తపోటు నియంత్రణ

ఒత్తిడితో నిండిన ఆధునిక జీవనంలో చాలామందికి మనశ్శాంతి దూరమవుతోంది. ఉదయం లేదా సాయంత్రం వేళల్లో చెప్పులు లేకుండా పచ్చని గరికపై నడవడం ద్వారా అద్భుతమైన ప్రయోజనాలు లభిస్తాయి. పాదాలకు గడ్డి తగలడం వల్ల నరాలు ఉత్తేజితమై ఒత్తిడి తగ్గుతుంది, మనసు ప్రశాంతంగా మారుతుంది. ఇది హైబీపీ నియంత్రణకు, కంటి చూపు మెరుగుదలకు, మైగ్రేన్ తలనొప్పి తగ్గడానికి కూడా సహాయపడుతుందని ఆయుర్వేదం చెబుతోంది.

జీర్ణక్రియకు మేలు, మహిళల ఆరోగ్యానికి తోడ్పాటు

గరిక రసం జీర్ణవ్యవస్థను బలోపేతం చేస్తుంది. మలబద్ధకం వంటి సమస్యలతో బాధపడేవారికి ఇది మంచి ఉపశమనాన్ని ఇస్తుంది. అలాగే మహిళల్లో నెలసరి సమయంలో వచ్చే నొప్పులు, అసౌకర్యాన్ని తగ్గించడంలో గరిక రసం సహాయకారిగా ఉంటుందని ఆయుర్వేద గ్రంథాలు సూచిస్తున్నాయి.

నోటి, చర్మ సమస్యలకు సహజ పరిష్కారం

చిగుళ్ల నుంచి రక్తస్రావం, పంటి నొప్పి, నోటి పూత వంటి సమస్యలు ఉన్నప్పుడు గరిక రసాన్ని తేనె లేదా నెయ్యితో కలిపి పుక్కిలించడం లేదా ప్రభావిత ప్రాంతంలో రాయడం వల్ల ఉపశమనం లభిస్తుంది. అలాగే చర్మంపై వచ్చే చిన్నపాటి దద్దుర్లు, దురద, అలర్జీ సమస్యలకు గరిక పేస్ట్ మంచి ఔషధంలా పనిచేస్తుంది.

ఎలా తీసుకోవాలి?

లేతగా ఉన్న గరికను సేకరించి శుభ్రంగా కడిగి మెత్తగా దంచి రసం తీసుకోవాలి. అవసరమైతే నిపుణుల సూచన మేరకు తేనెతో కలిపి తీసుకోవచ్చు.

Disclaimer:
ఈ ఆర్టికల్‌లో అందించిన సమాచారం సాధారణ అవగాహన, విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, నిర్ధారణ లేదా చికిత్సకు ప్రత్యామ్నాయం కాదు. మీ ఆరోగ్య పరిస్థితికి సంబంధించి సందేహాలు ఉంటే తప్పనిసరిగా వైద్యులు లేదా సంబంధిత నిపుణుల సలహా తీసుకోండి.