ఉదయ్‌పూర్: రాజస్థాన్‌లోని ప్రసిద్ధ పర్యాటక నగరమైన ఉదయ్‌పూర్‌లో ఫ్రాన్స్‌కు చెందిన ఓ మహిళపై జరిగిన లైంగిక దాడి ఘటన తీవ్ర కలకలం రేపుతోంది. యాడ్ షూట్ నిమిత్తం ఉదయ్‌పూర్‌కు వచ్చిన ఆ పర్యాటకురాలిపై ఓ ఈవెంట్ మేనేజ్‌మెంట్ సంస్థ ఉద్యోగి అత్యాచారానికి పాల్పడ్డాడు. ఈ దారుణంపై బాధితురాలు పోలీసులకు ఫిర్యాదు చేయగా, కేసు నమోదు చేసి దర్యాప్తు ప్రారంభించారు. అయితే నిందితుడు ప్రస్తుతం పరారీలో ఉన్నాడు. అతడి కోసం పోలీసులు వేటను ముమ్మరం చేశారు.
ఈ ఘటనతో పర్యాటక వర్గాలు తీవ్ర ఆందోళన వ్యక్తం చేస్తున్నాయి. దేశీయంగా మాత్రమే కాకుండా అంతర్జాతీయంగా కూడా ఈ ఘటనపై విస్తృతంగా చర్చ జరుగుతోంది.
పార్టీ అనంతరం నగరం చూపిస్తానంటూ మభ్యపెట్టి…
ఎస్పీ యోగేష్ గోయల్ వెల్లడించిన వివరాల ప్రకారం — బద్గావ్ పోలీస్ స్టేషన్ పరిధిలోని టైగర్ హిల్స్‌లో ఒక రెస్టారెంట్‌లో నిర్వహించిన పార్టీకి పలువురు స్థానికులు, విదేశీ పర్యాటకులు హాజరయ్యారు. ఈ వేడుకలో ఓ ఈవెంట్ మేనేజ్‌మెంట్ సంస్థ ఉద్యోగి సిద్ధార్థ్ అనే యువకుడికి ఫ్రెంచ్ మహిళతో పరిచయం ఏర్పడింది. అనంతరం ఆమెను “నగరాన్ని చూపిస్తానంటూ” మభ్యపెట్టి హోటల్ గదికి తీసుకెళ్లి లైంగిక దాడికి పాల్పడ్డాడు.
కేసు నమోదు, వైద్య పరీక్షలు.. పరారీలో నిందితుడు
బాధితురాలు ఇచ్చిన ఫిర్యాదుపై బద్గావ్ పోలీసులు పలు IPC సెక్షన్ల కింద కేసు నమోదు చేశారు. మహిళను వెంటనే ఆసుపత్రికి తరలించి వైద్య పరీక్షలు నిర్వహించారు. నిందితుడు సిద్ధార్థ్ పరారీలో ఉన్న నేపథ్యంలో అతడి కోసం విస్తృతంగా గాలింపు చర్యలు చేపట్టారు.
ఫ్రెంచ్ రాయబార కార్యాలయానికి సమాచారం
ఈ ఘటన గురించి సంబంధిత అధికారులు ఫ్రెంచ్ రాయబార కార్యాలయాన్ని కూడా సమాచారమిచ్చారు. కేసులో సంబంధం ఉన్న మరిన్ని వ్యక్తులను కూడా విచారిస్తున్నట్టు పోలీసులు తెలిపారు.
కఠిన చర్యలకు పిలుపు
ఇలాంటి ఘటనలు పునరావృతం కాకుండా ప్రభుత్వం, పోలీసు శాఖలు మరింత అప్రమత్తంగా ఉండాలని పర్యాటక వర్గాలు, మహిళా సంఘాలు డిమాండ్ చేస్తున్నాయి. పర్యాటకుల భద్రతపై ప్రభావం పడేలా ఇలాంటి ఘటనలు జరిగినప్పుడు, దేశ ప్రజాస్వామ్య, భద్రతా వ్యవస్థపై నమ్మకం కోల్పోతారని వారు హెచ్చరిస్తున్నారు.
