టాలీవుడ్ సినిమా ఇండస్ట్రీకి చేదు వార్త. ప్రముఖ నటుడు ఫిష్ వెంకట్ (53) కన్నుమూశారు. కిడ్నీ సంబంధిత సమస్యలతో కొంతకాలంగా అనారోగ్యంతో బాధపడుతూ, హైదరాబాద్ చందానగర్లోని పీఆర్కే ఆసుపత్రిలో చికిత్స పొందుతూ శుక్రవారం రాత్రి తుదిశ్వాస విడిచారు.
ఫిష్ వెంకట్ అసలు పేరు మంగళంపల్లి వెంకటేశ్. ముషీరాబాద్లో చేపల వ్యాపారం చేస్తున్న సమయంలోనే “ఫిష్ వెంకట్” అని పిలవబడే స్థాయి చేకూరింది. నటుడు శ్రీహరి ద్వారా సినీ పరిశ్రమలోకి అడుగుపెట్టి, దర్శకుడు వీవీ వినాయక్ చేత నటుడిగా పరిచయం అయ్యారు.
ఆది, దిల్, బన్నీ, అత్తారింటికి దారేదీ, గబ్బర్ సింగ్, ఆర్య, డీజే టిల్లు వంటి ఎన్నో సూపర్ హిట్ చిత్రాల్లో నటించి ప్రేక్షకులను ఆకట్టుకున్నారు. తనదైన హాస్య శైలి, డైలాగ్ డెలివరీతో మంచి గుర్తింపు తెచ్చుకున్నారు. కామెడీ మరియు విలన్ పాత్రల్ని సమర్ధవంతంగా పోషించిన అతని నటనలో ప్రత్యేకత ఉండేది.
100కి పైగా చిత్రాల్లో నటించిన ఫిష్ వెంకట్.. ఇండస్ట్రీలో అందరికీ సుపరిచితుడే. సినీ రంగంలోని పలు ప్రముఖులు ఆయన మృతికి తీవ్ర సంతాపం వ్యక్తం చేశారు.
రెండు కిడ్నీలు పూర్తిగా పనిచేయకపోవడంతో చికిత్స అవసరమయ్యింది. కిడ్నీ మార్పిడి కోసం వైద్యులు సూచించారు. ఖర్చుల భారం పెరగడంతో కుటుంబ సభ్యులు సాయం కోసం ఎదురుచూశారు. అనేక సినీ ప్రముఖులు ఆయన వైద్య ఖర్చుల కోసం ముందుకొచ్చారు. అయినప్పటికీ, ఆరోగ్యం కుదుటపడక శుక్రవారం రాత్రి ఆయన కన్నుమూశారు.
ఫిష్ వెంకట్ లాంటి విలక్షణ నటుడు ఇక లేడనే వార్తతో టాలీవుడ్లో విషాదం అలుముకుంది. శనివారం ఆయన స్వస్థలమైన ముషీరాబాద్లో అంత్యక్రియలు నిర్వహించనున్నట్టు కుటుంబసభ్యులు తెలిపారు.
