గుడ్లు తినడం ఆరోగ్యానికి మంచిదని మనం తరచుగా వింటుంటాం. ప్రోటీన్తో పాటు అవసరమైన విటమిన్లు, ఖనిజాలు అందించే గుడ్లు మంచి ఆరోగ్యకర ఆహారంగా గుర్తింపు పొందాయి. రోజుకు ఒక గుడ్డు తినమని హెల్త్ ఎక్స్పర్ట్స్ సూచిస్తుంటారు. అయితే మరోవైపు, రోజూ గుడ్లు తింటే శరీరంలో కొలెస్ట్రాల్ పెరిగి గుండె సంబంధిత సమస్యలు వస్తాయని కొందరి అభిప్రాయం. అసలు నిజం ఏమిటి? రోజూ గుడ్లు తినడం వలన నిజంగా కొలెస్ట్రాల్ పెరుగుతుందా? చూద్దాం.
గుడ్లలో ఉన్న పోషకాలు
గుడ్లు సులభంగా జీర్ణమయ్యే ఆహారం. వాటిని ఉడికించీ, ఆమ్లెట్గా చేసీ, లేదా కూరగాయలతో కలిపీ తినవచ్చు. గుడ్లలో ఉన్న ప్రోటీన్ కండరాల నిర్మాణానికి తోడ్పడుతుంది. విటమిన్ B12, విటమిన్ D, ఐరన్, సెలెనియం వంటి పోషకాలు మెదడు పనితీరును మెరుగుపరచడంలో సహాయపడతాయి.
కొలెస్ట్రాల్ అంటే ఏమిటి?
కొలెస్ట్రాల్ అనేది మన శరీరానికి అవసరమైన కొవ్వు పదార్థం. ఇది జీర్ణక్రియలో, హార్మోన్ల ఉత్పత్తిలో, విటమిన్ D తయారీలో ఉపయోగపడుతుంది. కొలెస్ట్రాల్ రెండు రకాలుగా ఉంటుంది:
- మంచి కొలెస్ట్రాల్ (HDL): ఇది రక్తప్రవాహం నుంచి చెడు కొలెస్ట్రాల్ను తొలగిస్తుంది, గుండెని రక్షిస్తుంది.
- చెడు కొలెస్ట్రాల్ (LDL): ఇది ధమనుల్లో పేరుకుపోయి రక్తప్రవాహాన్ని అడ్డుకుంటుంది. ఫలితంగా గుండె సమస్యల ప్రమాదం పెరుగుతుంది.
మన లివర్ సహజంగానే కొలెస్ట్రాల్ ఉత్పత్తి చేస్తుంది. కానీ మాసం, జున్ను, గుడ్డు పచ్చసొన వంటి ఆహారాల్లోనూ కొలెస్ట్రాల్ ఉంటుంది.
ఒక గుడ్డులో ఎంత కొలెస్ట్రాల్ ఉంటుంది?
ఒక పెద్ద గుడ్డు పచ్చసొనలో సుమారు 186 మిల్లీగ్రాముల కొలెస్ట్రాల్ ఉంటుంది. అయితే ఇది తీసుకున్నంత మాత్రాన రక్తంలో కొలెస్ట్రాల్ స్థాయులు ప్రతి ఒక్కరికి పెరగవు. ఎందుకంటే మన లివర్ మనం తినే ఆహారం ప్రకారం కొలెస్ట్రాల్ ఉత్పత్తిని ఆటోమేటిక్గా సర్దుబాటు చేస్తుంది.
కొన్ని అధ్యయనాల ప్రకారం, రోజుకు సగం గుడ్డు నుండి ఒక గుడ్డు వరకు తినేవారిలో గుండె సంబంధిత సమస్యలు తక్కువగా ఉంటాయి.
తినే కొలెస్ట్రాల్ గుండె ఆరోగ్యాన్ని ప్రభావితం చేస్తుందా?
తాజా పరిశోధనల ప్రకారం, గుండె ఆరోగ్యాన్ని ప్రభావితం చేసేది ప్రధానంగా ట్రాన్స్ఫ్యాట్స్ (పేస్ట్రీలు, వెన్న, ప్రాసెస్డ్ ఫుడ్లలో ఉండేవి).
తినే కొలెస్ట్రాల్ కంటే ఇవే గుండె సమస్యలకు కారణమవుతాయి. కాబట్టి, రోజుకు ఒక గుడ్డు తినడం చాలా మందికి సురక్షితం.
గుడ్లను ఎలా తినాలి?
గుడ్లను తినే విధానం కూడా చాలా ముఖ్యం.
- చీజ్, వెన్నతో వేయించిన గుడ్లు కాకుండా ఉడికించిన గుడ్లు తినడం మంచిది.
- గుడ్లను తృణధాన్యాల టోస్ట్, కూరగాయలు, అవకాడో, హెర్బ్స్తో కలిపి తింటే మరింత ఆరోగ్యకరంగా మారుతుంది.
- రోజుకు ఒకటి లేదా రెండు గుడ్లు తినడం శరీరానికి సరిపోతుంది.
- గుడ్లను బ్యాలెన్స్డ్ డైట్లో భాగంగా తీసుకోవాలి.
కంటి ఆరోగ్యానికి ప్రయోజనం
గుడ్లలో ల్యూటిన్ (Lutein), జియాక్సాంతిన్ (Zeaxanthin) అనే యాంటీ ఆక్సిడెంట్లు ఉంటాయి. ఇవి కంటి కణాలను రక్షించి, వాపును తగ్గిస్తాయి. వృద్ధాప్యంలో వచ్చే కంటి సమస్యల ప్రమాదాన్ని కూడా తగ్గిస్తాయి.
సమతుల ఆహారంలో గుడ్ల ప్రాముఖ్యత
మితంగా గుడ్లు తినడం ఆరోగ్యానికి మంచిదే. శరీరానికి అవసరమైన ప్రోటీన్, విటమిన్లు, మంచి కొలెస్ట్రాల్ అందుతాయి. అయితే గుడ్లతో పాటు పండ్లు, కూరగాయలు, పప్పులు, తృణధాన్యాలు వంటి ఆహారాలను కూడా తీసుకోవడం అవసరం.
గమనిక
ఇది సాధారణ ఆరోగ్య సమాచారం మాత్రమే. ఇది వైద్య సలహాకు ప్రత్యామ్నాయం కాదు. ఏవైనా ఆరోగ్య సమస్యలు ఉన్నా లేదా కొలెస్ట్రాల్ స్థాయులు ఎక్కువగా ఉన్నా, మీ వైద్యుడి సలహా తీసుకోవడం తప్పనిసరి.
