ఢిల్లీ గుసగుసలు: నారా లోకేష్‌ గురించి అదే చర్చ – టీడీపీ భవిష్యత్‌ నేతగా ఎదుగుతున్న లోకేష్?

నారా లోకేష్—టీడీపీ జాతీయ ప్రధాన కార్యదర్శి, కూటమి మంత్రి, ముఖ్యమంత్రి చంద్రబాబు నాయుడు రాజకీయ వారసుడిగా పార్టీ వర్గాల వద్ద ప్రత్యేక గుర్తింపు పొందిన నాయకుడు. చంద్రబాబు లాంటి దూరదృష్టి గల, జాతీయస్థాయిలో కీలకమయిన స్థానాన్ని సంపాదించిన నేతకు వారసుడు కావడం చిన్న విషయం కాదు. ఈ బాధ్యత యొక్క భారాన్ని లోకేష్ తొలుత తనపై ఎవ్వరూ అంతగా ఉంచకపోయినా… ఈ రోజు పరిస్థితి పూర్తిగా మారిపోయింది.

2017లో ఎమ్మెల్సీగా మొదటసారి మంత్రిపదవిలో అడుగుపెట్టిన లోకేష్‌పై అప్పటి అంచనాలు అంతగా లేవు. ముఖ్యంగా 2019 మంగళగిరి ఎన్నికల్లో ఓటమి తర్వాత, లోకేష్‌పై ఉన్న ఆశలు మరింత తగ్గినట్టే కనిపించాయి. అయితే అప్పటినుంచి లోకేష్ రాజకీయ ప్రస్థానం కొత్త మలుపు తిరిగింది. ఓటమిని ఒక అవకాశంగా మార్చుకుని, ప్రతిపక్ష కాలంలో ప్రజల్లోకి వెళ్లి, భారీ పాదయాత్ర చేసి, పార్టీ వ్యవస్థపై తన పట్టు బలపరిచారు. 2024 ఎన్నికల్లో టీడీపీ కూటమి ఘన విజయం సాధించడంలో లోకేష్ పాత్రను సైతం అందరూ అంగీకరిస్తున్నారు.

ఢిల్లీతో బలోపేతమైన బంధం

ఇటీవల నెల నెలా ఢిల్లీ పర్యటనలు లోకేష్‌ను జాతీయ రాజకీయాల్లో కూడా ఒక ప్రత్యేక స్థానంలో నిలుపుతున్నాయి. గతంలో 2014–2019 మధ్య కాలంలో, ఏపీ ప్రయోజనాల కోసం స్వయంగా చంద్రబాబే వరుసగా ఢిల్లీ చుట్టేవారు. అప్పట్లో ఆయన చెప్పినట్టు, అయిదేళ్లలో 29 సార్లు ఢిల్లీ పర్యటనలు చేశారు. ఇప్పుడు అదే బాధ్యతలను లోకేష్ తన భుజాన వేసుకున్నారు.

తాజాగా మోంథా తుఫాన్‌పై కేంద్ర సహాయం కోరుతూ కేంద్ర హోంమంత్రి అమిత్ షా సహా పలువురు కేంద్ర మంత్రులతో సమావేశమైన లోకేష్, ఏపీ అభివృద్ధి కార్యకలాపాలపై సవివరంగా నివేదిక సమర్పించారు. ప్రతిసారీ ఢిల్లీ వెళ్లి రాష్ట్ర అవసరాలను వివరించడం, నిధుల కోసం ఫాలోఅప్ చేయడం, కేంద్రస్థాయిలో ఏపీ తలుపులు తట్టడం ఇవి ఆయనను జాతీయ స్థాయి నాయకుడుగా మరింత బలపరుస్తున్నాయి.

కేంద్ర పెద్దలు కూడా లోకేష్‌ను మర్యాదతో ఆహ్వానించడం, చర్చలకు సమయం కేటాయించడం, ఆయన విన్నపాలను పరిగణనలోకి తీసుకోవడం గమనార్హం.

“ఫ్యూచర్ లీడర్” చర్చ… ఢిల్లీలో గుసగుసలు

జాతీయ మీడియా కదా, ఢిల్లీ పాలిటికల్ సర్కిల్స్‌లో కూడా లోకేష్‌ గురించి చర్చ ఒకే బిందువులో చేరుతోంది—“ఏపీ ఫ్యూచర్ లీడర్”.
అంతకంతకూ పెరుగుతున్న అడుగులు, పరిపాలనలో కనిపిస్తున్న స్పష్టత, ఫైళ్ల పరిశీలనలో చూపుతున్న నిశితత ఇవి బీజేపీ నాయకత్వాన్ని కూడా ప్రభావితం చేశాయని, లోపలి వర్గాలు చెబుతున్నాయి.

టీడీపీ-బీజేపీ-జనసేన కూటమి అధికారంలోకి వచ్చిన ఏడాది లోపే, లోకేష్ తనదైన ముద్రను వేయడమే కాకుండా, యువ నాయకుడిగా కేంద్రస్థాయిలో ప్రత్యేక గుర్తింపును పొందారని ఢిల్లీ వర్గాలు అంటున్నాయి. చంద్రబాబుకు లభించిన గౌరవం, ప్రోటోకాల్, సాన్నిహిత్యం ఇప్పుడు లోకేష్‌కు కూడా కొద్ది కొద్దిగా లభిస్తున్నట్లు రాజకీయ పరిశీలకులు చెబుతున్నారు.

లోకేష్ స్పందన – “ఇప్పుడు కాదు… సమయం వచ్చినప్పుడు”

అయితే లోకేష్ మాత్రం ఈ చర్చలు, ప్రశంసలు, భవిష్యత్ అంచనాలపై ఎలాంటి తొందర చూపడం లేదు.
చంద్రబాబు దూరదృష్టి, రాజకీయ వ్యూహాల్లో ఆయన క్షణక్షణానికీ చేసే లెక్కలు ఇవి టీడీపీ రాజకీయాలను ఎక్కడికి తీసుకెళ్తాయో బాగా తెలుసని లోకేష్ నమ్మకంతో ముందుకు సాగుతున్నట్లు తెలుస్తోంది. సరైన సమయంలోనే పార్టీ నిర్ణయాలు తీసుకుంటుంది… నాయకత్వ మార్పులు, భవిష్యత్ వ్యూహాలు అన్ని చర్యలు పరిస్థితి అవసరం చూపినప్పుడు మాత్రమే తీసుకోవబడతాయి, అని ఆయన సన్నిహిత వర్గం భావిస్తోంది.

ఏది ఏమైనా, ఢిల్లీ పనులను చక్కగా నిర్వహించడం, కేంద్రంలో పట్టు సాధించడం అంత సులభం కాదు. కానీ ఈ పర్యటనల్లో లోకేష్ చూపుతున్న చురుకుదనం, నైపుణ్యం, కమ్యూనికేషన్ ఇవి ఆయన్ను చంద్రబాబు తరహాలోనే జాతీయస్థాయిలో నిలబెడుతున్నాయి.