కోయంబత్తూరులో వివాహేతర సంబంధం అనుమానంతో భర్తపై భార్య దాడి చేసిన ఘటన

వివాహేతర సంబంధం ఓ కుటుంబాన్ని విచ్ఛిన్నం చేయడమే కాదు… చివరకు అమానుష నేరానికి దారితీసింది. తన భర్త తనను కాదని మరో మహిళతో అక్రమ సంబంధం కొనసాగిస్తున్నాడన్న అనుమానంతో, ఓ భార్య అత్యంత దారుణానికి పాల్పడిన ఘటన తమిళనాడులోని కోయంబత్తూరులో కలకలం రేపుతోంది. మద్యం మత్తులో నిద్రిస్తున్న భర్త మర్మాంగాన్ని కత్తితో కోసిన ఈ ఘటన స్థానికంగా తీవ్ర సంచలనంగా మారింది.

అస్సాం రాష్ట్రానికి చెందిన బిదాన్ (33) కొన్నేళ్ల క్రితం ఉపాధి నిమిత్తం తమిళనాడుకు వలస వచ్చాడు. కోయంబత్తూరు అత్తిపాళయం ప్రాంతంలోని ఓ నివాస సముదాయంలో ప్లంబర్‌గా పనిచేస్తూ జీవనం సాగిస్తున్నాడు. అతడికి భార్య జిండి (36), ఒక కుమార్తె ఉన్నారు. కుటుంబం మొత్తం అస్సాంలో ఉండగా, బిదాన్ మాత్రం ఉద్యోగం కారణంగా కోయంబత్తూరులో ఒంటరిగా నివసిస్తున్నాడు.

ఇటీవల తన భర్త కోయంబత్తూరులో మరో యువతితో వివాహేతర సంబంధం పెట్టుకున్నాడన్న అనుమానం జిండిని వేధించసాగింది. ఈ అనుమానంతోనే ఆమె అస్సాం నుంచి కోయంబత్తూరుకు చేరుకుని భర్తను నిలదీసింది. అయితే తాను ఎలాంటి అక్రమ సంబంధం కొనసాగించడం లేదని బిదాన్ స్పష్టంగా చెప్పినప్పటికీ, జిండి అనుమానం తీరలేదు. భర్తపై నిఘా ఉంచాలన్న ఉద్దేశంతో అక్కడే ఉండిపోయిన ఆమె, రోజూ భర్తతో పాటు పనికి కూడా వెళ్లడం ప్రారంభించింది.

రెడ్ హ్యాండెడ్‌గా పట్టుకుని…
నాలుగు రోజుల క్రితం జిండి పనికి వెళ్లిన సమయంలో, బిదాన్ తన నివాసానికి ఓ మహిళను తీసుకువచ్చినట్లు సమాచారం. అనుకోకుండా అదే సమయంలో ఇంటికి తిరిగొచ్చిన జిండి, వారిద్దరినీ అభ్యంతరకర పరిస్థితిలో రెడ్ హ్యాండెడ్‌గా పట్టుకుంది. దీంతో ఆమె ఆగ్రహం హద్దులు దాటింది.

ఆ రోజు రాత్రి బిదాన్ మద్యం సేవించి గాఢ నిద్రలోకి వెళ్లిన సమయంలో, జిండి కత్తితో అతని మర్మాంగాన్ని కోసేసినట్లు పోలీసులు గుర్తించారు. అనంతరం కోసిన భాగాన్ని ఇంటి బయట పడేసి, అక్కడి నుంచి తప్పించుకునే ప్రయత్నం చేసినట్లు తెలుస్తోంది.

పరిస్థితి విషమం…
భారీ నొప్పితో బిదాన్ పెట్టిన కేకలు విన్న చుట్టుపక్కల వారు హుటాహుటిన అక్కడికి చేరుకున్నారు. రక్తపు మడుగులో పడి ఉన్న అతడిని చూసి వారు షాక్‌కు గురయ్యారు. వెంటనే బిదాన్‌ను స్థానిక ప్రభుత్వ ఆసుపత్రికి తరలించారు. ప్రస్తుతం అతని పరిస్థితి అత్యంత విషమంగా ఉందని, వైద్యులు అత్యవసర చికిత్స అందిస్తున్నారని సమాచారం.

ఈ ఘటనపై కేసు నమోదు చేసిన పోలీసులు, నిందితురాలైన జిండిని అదుపులోకి తీసుకుని విచారిస్తున్నారు. వివాహేతర సంబంధాల కారణంగా కుటుంబాల్లో చోటుచేసుకునే పరిణామాలు ఎంతటి భయంకరమైన నేరాలకు దారి తీస్తాయో చెప్పే ఉదాహరణగా ఈ ఘటన మారిందని పోలీసులు పేర్కొంటున్నారు.