న్యూఢిల్లీ: కేంద్ర ప్రభుత్వ మేక్ ఇన్ ఇండియా కార్యక్రమంపై కాంగ్రెస్ నేత రాహుల్ గాంధీ తీవ్ర వ్యాఖ్యలు చేశారు. “భారత్‌లో తయారీ రంగాన్ని ప్రోత్సహించాలన్న ఉద్దేశంతో మోదీ ప్రభుత్వం ప్రారంభించిన మేక్ ఇన్ ఇండియా యాత్ర పూర్తిగా విఫలమైంది,” అంటూ విమర్శల దాడి చేశారు. దీనివల్ల చైనాకు మేలు జరగడం తప్ప భారత్‌కు ఏనాడూ గుణం జరగలేదని ఆయన మండిపడ్డారు.
రాహుల్ గాంధీ తాజాగా ఢిల్లీలోని ప్రముఖ ఎలక్ట్రానిక్స్ మార్కెట్ నెహ్రూ ప్లేస్‌ను సందర్శించి, అక్కడి టెక్నీషియన్లతో సంభాషించారు. అనంతరం తన ఎక్స్ ఖాతా (మాజీ ట్విట్టర్)లో వీడియోను షేర్ చేశారు. ఈ సందర్భంగా మాట్లాడుతూ, “మేక్ ఇన్ ఇండియా పేరుతో భారత్‌లో వస్తువులను తయారు చేయడం లేదు. బదులుగా విదేశాల నుంచి విడిభాగాలు దిగుమతి చేసుకుని అసెంబ్లింగ్ మాత్రమే జరుగుతోంది” అని ఆరోపించారు.
తయారీ రంగం క్షీణతలో.. నిరుద్యోగం పెరుగుదలపై ఆందోళన
రాహుల్ గాంధీ ప్రకారం, 2014 నాటి నుంచి భారతదేశ తయారీ రంగం జిడిపిలో 14 శాతం వరకు పడిపోయిందని చెప్పారు. దేశ యువత నిరుద్యోగం గణనీయంగా పెరిగిందని, తయారీ రంగానికి అవసరమైన ప్రోత్సాహం లేకపోవడమే ఇందుకు కారణమని అభిప్రాయపడ్డారు. “ప్రధాని మోదీ నినాదాలూ చెప్పగలరు, కానీ వాటిని నెరవేర్చే కార్యాచరణ మాత్రం కనిపించదు” అని తీవ్ర వ్యాఖ్యలు చేశారు.
చైనా దిగుమతుల పెరుగుదలపై ప్రశ్నలు
చైనాతో సంబంధాలు పెరుగుతున్న నేపథ్యంలో, రాహుల్ గాంధీ కీలకంగా కొన్ని ప్రశ్నలు చేశారు. “ఎందుకు చైనా నుండి దిగుమతులు రెండు రెట్లు పెరిగాయి? మేక్ ఇన్ ఇండియా వల్ల మనం తయారు చేయకుండా అసెంబ్లింగ్ మాత్రమే చేస్తే లాభం చైనాకే కదా?” అని ప్రశ్నించారు. ఈ విధానంతో భారత్‌కు కేవలం ‘అతుకులు’ మాత్రమే మిగులుతున్నాయని వ్యాఖ్యానించారు.
కేంద్రాన్ని వెంటనే చర్యలకు పిలుపు
మేక్ ఇన్ ఇండియా నినాదం కేవలం ప్రచారంగా మిగిలిపోకూడదని, వాస్తవ మార్పులకు కేంద్రం చర్యలు తీసుకోవాలని రాహుల్ డిమాండ్ చేశారు. భారత్‌ను కేవలం మార్కెట్‌గా మిగల్చకుండా, ఇది తయారీ కేంద్రంగా మారాలన్న దిశగా ప్రభుత్వ విధానాలు స్పష్టంగా ఉండాలని సూచించారు.
