నేతన్నలకు తీపికబురు: ఉచిత విద్యుత్, పెన్షన్ పెంపు, ఉపాధి హామీలతో చంద్రబాబు ప్రభుత్వం చేనేతలకు ధీమా

ముఖ్యమంత్రి చంద్రబాబు నాయుడు నేతృత్వంలోని కూటమి ప్రభుత్వం చేనేతలకు తీపికబురు అందించింది. జాతీయ చేనేత దినోత్సవాన్ని పురస్కరించుకుని, నేతన్నలకు ఉచిత విద్యుత్ పథకాన్ని ప్రారంభించారు. ఈ పథకం ప్రకారం సాధారణ మగ్గాలకు 200 యూనిట్లు, మర మగ్గాలకు 500 యూనిట్లు ఉచిత విద్యుత్ అందించనున్నారు. ఈ పథకం నేటినుంచే అమలులోకి వస్తుందని సీఎం ప్రకటించారు.

ఎన్నికల ప్రచారంలో ఇచ్చిన హామీని నిలబెట్టుకుంటూ ఈ నిర్ణయాన్ని తీసుకున్నట్లు చంద్రబాబు పేర్కొన్నారు. రాష్ట్రంలో దాదాపు 50 వేల మగ్గాలు, 11,500 మర మగ్గాలపై నేతన్నలు ఆధారపడుతూ జీవనం సాగిస్తున్నారు. ఈ పథకం వల్ల ప్రభుత్వంపై సంవత్సరానికి సుమారు రూ.125 కోట్ల భారం పడనుందని సీఎం వివరించారు. అయినప్పటికీ నేతన్నల సంక్షేమం కోసం ఈ వ్యయాన్ని భరించేందుకు ప్రభుత్వం సిద్ధంగా ఉందని చెప్పారు.

ఇక నేతన్నలకు తీపికబురుగా మరో ముఖ్యమైన నిర్ణయం – ఎన్టీఆర్ భరోసా పెన్షన్ కింద 92,724 మంది నేతన్నల పెన్షన్‌ను రూ.3 వేల నుంచి రూ.4 వేలకి పెంచారు. మొదటి ఏడాదిలోనే ఈ పెన్షన్ రూపంలో రూ.370.89 కోట్లు పంపిణీ చేశారు. అలాగే త్రిఫ్ట్ పథకం కింద 2024–25లో రూ.5 కోట్లు, 2025–26లో మరో రూ.5 కోట్లు కేటాయించారు. సహకార సంఘాల ద్వారా బ్యాంకు రుణాల పంపిణీ చేపట్టారు.

నేటితరపు అభిరుచులకు అనుగుణంగా ఐదు జిల్లాల్లో నేతన్నలకు నైపుణ్య అభివృద్ధి శిక్షణా కార్యక్రమాలు నిర్వహించారు. నేతన్న వస్త్రాల విక్రయాల కోసం రాష్ట్రంతో పాటు దేశంలోని ఏడు నగరాల్లో ఎగ్జిబిషన్లు ఏర్పాటు చేశారు. ఆప్కో ఆధ్వర్యంలో ఈ కామర్స్ ద్వారా వినియోగదారుల ఇళ్ల వద్దకే చేనేత వస్త్రాలను డెలివరీ చేస్తున్నారు.

వీవర్స్ ముద్రా స్కీం ద్వారా చేనేతలకు రుణాలు అందిస్తున్నారు. జాతీయ హ్యాండ్‌లూమ్ అభివృద్ధి ప్రోగ్రామ్ కింద 2024–25లో 10 క్లస్టర్లు ఏర్పాటు చేశారు. ముడి పదార్థాల సరఫరా పథకం ద్వారా నూలుపై 15 శాతం సబ్సిడీ అందిస్తున్నారు. విశాఖపట్నంలో రూ.172 కోట్లతో యూనిటీ మాల్ నిర్మాణం చేపట్టారు. రాయదుర్గం, హిందూపురం, బ్రాండెక్స్లో టెక్స్‌టైల్స్ పార్కుల అభివృద్ధితో పాటు ఎమ్మిగనూరులో కూడా టెక్స్‌టైల్స్ పార్క్ నిర్మించనున్నారు.

చేనేత ఉత్పత్తులకు మార్కెటింగ్ కల్పించేందుకు టాటా తనేరియా, ఆద్యం బిర్లా గ్రూప్, కో ఆప్టెక్స్ (తమిళనాడు) వంటి సంస్థలతో ఒప్పందాలు కుదుర్చుకున్నారు. స్వయం సహాయక సంఘాల్లో ఉన్న మహిళ నేతన్నలకు రూ.10 వేలు విలువ చేసే నూలు ఉచితంగా అందిస్తున్నారు.

మంత్రి నారా లోకేశ్ స్ఫూర్తితో రాష్ట్ర వ్యాప్తంగా వీవర్ శాలల ఏర్పాటుకు కూటమి ప్రభుత్వం చర్యలు చేపట్టింది. అలాగే నేతన్నలకు 365 రోజుల ఉపాధి కల్పించాలన్న లక్ష్యంతో రూ.10 వేల కోట్లతో నూతన టెక్స్‌టైల్స్ పాలసీ రూపొందించారు. ఈ పాలసీ ద్వారా 1.51 లక్షల మందికి ఉపాధి కల్పించనున్నట్లు తెలిపారు.

ఈ అన్ని చర్యలతో రాష్ట్ర చేనేత రంగానికి నూతన ఊపిరి వచ్చినట్లు నేతృత్వం ప్రకటించింది. చంద్రబాబు ప్రభుత్వ సంకల్పంతో నేతన్నల జీవితాల్లో మార్పు వచ్చిందని, ఇది చేనేత పునరుజ్జీవానికి బీజంపడుతుందని విశ్లేషకులు చెబుతున్నారు.