బీహార్లో జరుగుతున్న అసెంబ్లీ ఎన్నికల్లో అభివృద్ధి, మహిళా సాధికారత, యువత భవిష్యత్తు వంటి అంశాలు ప్రధాన ప్రచార హోరుగా మారాయి. కానీ గయ నుండి సుమారు 150 కిలోమీటర్ల దూరంలో ఉన్న కొన్ని గ్రామాలకు మాత్రం “అభివృద్ధి” అనే పదం ఇప్పటికీ అందని కలగానే మిగిలిపోయింది. గత 77 ఏళ్లుగా మారని పరిస్థితులపై ఆ గ్రామాల ప్రజలు ఆవేదన వ్యక్తం చేస్తున్నారు. తమ ఏకైక డిమాండ్ అయిన మోర్హర్ నదిపై వంతెన నిర్మాణం జరగకపోతే ఓటు వేయబోమని వారు ఖరారు చేశారు.
పత్రా, హెర్హంజ్, కేవల్డిహ్ అనే మూడు గ్రామాల్లో కలిపి దాదాపు 8,000 మంది ప్రజలు తరతరాలుగా మోర్హర్ నదిపై వంతెన నిర్మాణం కోసం ఎదురు చూస్తున్నారు. ఆ నదిని వారు “నిస్సహాయ నది”గా పిలుస్తున్నారు. “మాకు వంతెన అవసరం అత్యవసరం. ‘పుల్ నహీ, తో వోట్ నహీ’ – వంతెన లేకుంటే ఓటు లేదు,” అని ఓ మహిళా ఓటరు తేల్చిచెప్పింది. “77 ఏళ్లుగా మనం ఇబ్బందులు పడుతున్నాం. నాయకులు వస్తారు, హామీలు ఇస్తారు, కానీ పనులు మాత్రం జరగవు. వర్షాకాలంలో నీరు భుజాల వరకూ వస్తుంది. మా అభివృద్ధి అంటే మోర్హర్ నదిపై వంతెనే,” అని మరో మహిళ వాపోయింది.
ప్రతి సంవత్సరం వర్షాకాలం రాగానే ఈ మూడు గ్రామాలు నాలుగు నెలల పాటు పూర్తిగా బయటి ప్రపంచంతో సంబంధాలు కోల్పోతాయి. ఆ సమయంలో పిల్లలు బడికి వెళ్లలేరు, రైతులు తమ పంటను అమ్మలేరు, మార్కెట్కి వెళ్లడమూ అసాధ్యం. వైద్య సహాయం కోసం ఆసుపత్రికి చేరుకోవడం మరీ కష్టమై ప్రాణాలు కోల్పోయే ఘటనలు తరచూ జరుగుతుంటాయి.
ఇటీవల పత్రా గ్రామానికి చెందిన సునీల్ విశ్వకర్మ అనే వ్యక్తి అనారోగ్యానికి గురయ్యాడు. నది ఉప్పొంగడంతో ఆసుపత్రికి తీసుకెళ్లే అవకాశం లేక, చివరికి నది ఒడ్డునే ప్రాణాలు విడిచాడు. “అంబులెన్స్ రాలేదు, ప్రైవేట్ వాహనం కూడా అవతలి వైపే ఉండిపోయింది,” అని సునీల్ తల్లి కన్నీరు పెట్టుకున్నారు. గర్భిణులు ఆసుపత్రికి వెళ్లే మార్గంలో ప్రాణాలు కోల్పోయిన ఘటనలు కూడా అరుదు కావు.
“ప్రతి వర్షాకాలంలో కనీసం ఇద్దరు ప్రాణాలు ఈ నదిలోనే పోతుంటారు. ప్రభుత్వం ప్రతి సారి హామీలు ఇచ్చినా పని మొదలవ్వదు. మేము వంతెనే అభివృద్ధి అని నమ్ముతున్నాం,” అని గ్రామస్థుడు బాధతో తెలిపారు.
వంతెన లేకపోవడం వల్ల ఈ ప్రాంతం రాష్ట్ర ప్రధాన మార్గాలకు దూరంగా మిగిలిపోయింది. ప్రజల జీవన ప్రమాణాలు దారుణంగా తగ్గిపోయాయి. ఇప్పుడు ఈ గ్రామాల వాసులు తమ ఓటు ద్వారా నిజమైన మార్పు తీసుకురావాలని సంకల్పించారు.
