క్రికెట్ ప్రపంచంలో అత్యంత ప్రతిష్టాత్మక సిరీస్గా పరిగణించబడేది యాషెస్. ఆస్ట్రేలియా–ఇంగ్లాండ్ జట్ల మధ్య జరిగే ఈ టెస్ట్ పోరు ఎప్పుడూ అంచనాలను మించే ఉత్కంఠ రేపుతుంది. ఇక ఈ ఏడాది యాషెస్ సిరీస్ నవంబర్ 21 నుంచి ఆస్ట్రేలియా వేదికగా ఆరంభం కానుండటంతో, అభిమానులు ఇప్పటికే ఉత్కంఠతో ఎదురుచూస్తున్నారు. అయితే సిరీస్కు ముందు ఆస్ట్రేలియా మాజీ ఓపెనర్ మాథ్యూ హేడెన్ చేసిన ఒక వ్యాఖ్య ప్రపంచ క్రికెట్ వర్గాల్లో చర్చనీయాంశమైంది.
“సెంచరీ చేయకపోతే MCG చుట్టూ నగ్నంగా నడుస్తా” – హేడెన్ సవాలు
ఓ యూట్యూబ్ ఛానల్కు ఇచ్చిన ఇంటర్వ్యూలో హేడెన్ మాట్లాడుతూ, “ఈ యాషెస్ సిరీస్లో ఇంగ్లాండ్ బ్యాటర్ జో రూట్ కనీసం ఒక సెంచరీ చేయకపోతే, నేను మెల్బోర్న్ క్రికెట్ గ్రౌండ్ (MCG) చుట్టూ నగ్నంగా నడుస్తా” అని సంచలనంగా ప్రకటించారు. హేడెన్ మాటలు సోషల్ మీడియాలో వైరల్ అవగా, అభిమానుల్లోనూ పెద్ద చర్చ మొదలైంది.
కూతురు గ్రేస్ హేడెన్ విజ్ఞప్తి
హేడెన్ చేసిన ఈ సవాలుపై ఆయన కూతురు, స్పోర్ట్స్ ప్రజెంటర్ గ్రేస్ హేడెన్ కూడా స్పందించారు. సోషల్ మీడియాలో సరదాగా “ప్లీజ్ జో రూట్, కనీసం ఒక సెంచరీ అయినా కొట్టి మా నాన్నను ఇబ్బంది పెట్టొద్దు” అని విజ్ఞప్తి చేశారు. తండ్రి సవాలు, కూతురు అభ్యర్థన – ఈ రెండూ కలిపి ప్రస్తుతం యాషెస్ చర్చకు మరింత రుచిచేసాయి.
ఆస్ట్రేలియాలో జో రూట్ రికార్డు బలహీనమే
టెస్ట్ క్రికెట్లో అగ్రశ్రేణి బ్యాటర్లలో ఒకరిగా నిలిచిన జో రూట్కు ఆస్ట్రేలియా గడ్డపై మాత్రం రికార్డు అంతగా బలంగా లేదు. ఇప్పటి వరకు ఆస్ట్రేలియాలో ఆడిన 14 టెస్ట్ మ్యాచ్ల్లో ఆయన 35.6 సగటుతో 892 పరుగులు మాత్రమే సాధించారు. ఇందులో 9 అర్ధశతకాలు ఉన్నా, ఒక్క సెంచరీ కూడా లేకపోవడం విశేషం. ఈ లోటును ఈసారి తప్పకుండా పూడ్చుకోవాలని రూట్ కృతనిశ్చయంతో ఉన్నారని భావిస్తున్నారు.
రూట్ కెరీర్ గణాంకాలు ఆశ్చర్యపరుస్తున్నాయి
ఇప్పటివరకు 134 టెస్ట్ మ్యాచ్ల్లో రూట్ 13,543 పరుగులు రాబట్టారు. ఇందులో 30 సెంచరీలు, అనేక విలువైన ఇన్నింగ్స్ ఉన్నాయి. టెస్ట్ క్రికెట్లో అత్యధిక పరుగులు చేసిన బ్యాటర్ల జాబితాలో రెండో స్థానంలో రూట్ కొనసాగుతుండగా, ఇంగ్లాండ్ తరఫున అత్యధిక సెంచరీలు చేసిన ఆటగాడిగానూ ఆయన రికార్డు సొంతం చేసుకున్నారు. కానీ ఈ ప్రతిభావంతుడైన ఆటగాడు ఆస్ట్రేలియా గడ్డపై తన ప్రతిభను ఇంకా పూర్తిగా చాటలేకపోవడం పెద్ద ప్రశ్నగా మిగిలింది.
యాషెస్ 2025లో రూట్ సవాలు
హేడెన్ సవాలు, గ్రేస్ హేడెన్ విజ్ఞప్తి, రూట్ గత రికార్డులు – ఇవన్నీ కలిపి ఈసారి యాషెస్ సిరీస్ను మరింత ఆసక్తికరంగా మార్చేశాయి. జో రూట్ ఈసారి తన ఆస్ట్రేలియా “సెంచరీ దాహాన్ని” తీర్చగలడా? లేక హేడెన్ సవాలు మిగతా సిరీస్ మొత్తానికి ప్రధాన చర్చగా నిలుస్తుందా? అన్నది అభిమానులంతా ఆసక్తిగా గమనిస్తున్నారు.
