ఆంధ్రప్రదేశ్ ప్రభుత్వం న్యాయవాదుల కుటుంబాలకు అండగా నిలుస్తూ మరో కీలక నిర్ణయం తీసుకుంది. రాష్ట్రవ్యాప్తంగా మరణించిన 1,150 మంది న్యాయవాదుల కుటుంబాలకు ఆర్థిక సాయం అందించేందుకు రూ.46 కోట్ల నిధులను విడుదల చేసింది. ఈ నిధుల కింద ప్రతి కుటుంబానికి రూ.4 లక్షల చొప్పున ఆర్థిక సహాయం అందించనుంది.
ఈ మేరకు ప్రభుత్వం రెండు వేర్వేరు జీవోలను జారీ చేస్తూ అర్హులైన న్యాయవాదుల జాబితాను ఖరారు చేసింది. “ఏపీ అడ్వకేట్స్ వెల్ఫేర్ ఫండ్ మ్యాచింగ్ గ్రాంట్” కింద ఈ నిధులు విడుదల చేస్తున్నట్లు ఉత్తర్వుల్లో స్పష్టంగా పేర్కొంది. మరణించిన న్యాయవాదుల నామినీలకు నేరుగా ఈ సాయం చేరేలా చర్యలు తీసుకోవాలని ఆదేశాలు జారీ అయ్యాయి.
ఈ నిధుల పంపిణీకి సంబంధించి అవసరమైన తదుపరి చర్యలు తీసుకోవాలని ఏపీ బార్ కౌన్సిల్ కార్యదర్శిని ప్రభుత్వం ఆదేశించింది. న్యాయశాఖ కార్యదర్శి గొట్టపు ప్రతిభా దేవి ఈ ఉత్తర్వులను జారీ చేశారు.
వృత్తి నిర్వహణలో ఉండగానే దురదృష్టవశాత్తు ప్రాణాలు కోల్పోయిన న్యాయవాదుల కుటుంబాలను ఆదుకోవాలనే సంకల్పంతో ప్రభుత్వం ఈ నిర్ణయం తీసుకుంది. ఈ ఆర్థిక సాయం ఆ కుటుంబాలకు కొంత ఆర్థిక బలాన్ని, మానసిక ఊరటను అందిస్తుందని అధికారులు భావిస్తున్నారు.
