ఇక టెస్ట్ లేకుండానే లైసెన్స్! –   ఆంధ్రప్రదేశ్‌లో కొత్త డ్రైవింగ్ లైసెన్స్ విధానం

ఆంధ్రప్రదేశ్‌లో డ్రైవింగ్ లైసెన్సుల జారీ విధానాన్ని మరింత ప్రామాణికంగా, పారదర్శకంగా మార్చేందుకు ప్రభుత్వం కీలక నిర్ణయం తీసుకుంది. సరైన శిక్షణ లేకుండా లైసెన్సులు పొందడం వలన రోడ్డు ప్రమాదాలు పెరుగుతున్నాయని గుర్తించిన రవాణా శాఖ, ఈ సమస్యకు పరిష్కారంగా వ్యవస్థాత్మక మార్పులను చేపట్టింది. కేంద్ర రవాణా మరియు జాతీయ రహదారుల మంత్రిత్వ శాఖ (MoRTH) మార్గదర్శకాలకు అనుగుణంగా రాష్ట్రవ్యాప్తంగా 53 డ్రైవింగ్ ట్రైనింగ్ సెంటర్లు (DTCs) మరియు 5 ప్రాంతీయ డ్రైవింగ్ ట్రైనింగ్ సెంటర్ల (RDTCs) స్థాపనకు ఆమోదం తెలిపింది.

టెస్ట్ లేకుండానే లైసెన్స్ పొందే అవకాశం

ఈ కొత్త విధానంలో డ్రైవింగ్ శిక్షణ కేంద్రాల్లో పూర్తి శిక్షణ పొందిన అభ్యర్థులు ఇక రవాణా శాఖ కార్యాలయానికి వెళ్లి టెస్ట్ ఇవ్వాల్సిన అవసరం లేదు. డీటీసీ సర్టిఫికేట్‌ ఆధారంగా వారికి నేరుగా డ్రైవింగ్ లైసెన్స్ జారీ చేయబడుతుంది.

ఈ శిక్షణ కేంద్రాల్లో —

• ద్విచక్ర వాహనాలు
• లైట్ మోటార్ వెహికల్స్ (కార్లు)
• హెవీ వాహనాలు

కోసం ప్రత్యేక శిక్షణ అందిస్తారు. తరగతి గదుల్లో రోడ్డు భద్రతా నిబంధనలపై అవగాహన కల్పించడం, సిమ్యులేటర్ల ద్వారా డ్రైవింగ్ ప్రాక్టీస్ చేయించడం, ప్రత్యేకంగా నిర్మించిన ట్రాక్‌లపై ప్రాక్టికల్ శిక్షణ ఇవ్వడం వంటి అంశాలు శిక్షణలో భాగమవుతాయి.

ఏ లైసెన్సుకు ఎంత కాలం శిక్షణ ఇవ్వాలి, ఫీజులు ఎంత వసూలు చేయాలి అనే వివరాలను కేంద్ర రవాణా శాఖే నిర్ణయిస్తుంది.

ఆర్‌డీటీసీలలో లైసెన్స్ జారీ సౌలభ్యం

రాష్ట్రంలోని ఉత్తరాంధ్ర, కోస్తా, రాయలసీమ ప్రాంతాల్లో ఐదు ప్రాంతీయ డ్రైవింగ్ ట్రైనింగ్ సెంటర్లు (RDTCs) ఏర్పాటు చేయనున్నారు. ఈ కేంద్రాల్లో శిక్షణ పూర్తిచేసిన అభ్యర్థులు ఆర్టీఏ కార్యాలయాలకు వెళ్లకుండానే అక్కడికక్కడే లైసెన్స్ కోసం దరఖాస్తు చేసుకుని, లైసెన్స్ పొందే సౌకర్యం కలుగుతుంది.

కేంద్ర ప్రభుత్వ ఆర్థిక సాయం

డీటీసీ స్థాపనకు కనీసం 2 ఎకరాల స్థలం అవసరం ఉంటుంది. ఒక్కో డీటీసీకి అయ్యే మొత్తం వ్యయంలో 85 శాతం (గరిష్ఠంగా రూ. 2.5 కోట్లు) వరకు కేంద్ర ప్రభుత్వం ఆర్థిక సహాయం అందిస్తుంది.
ఆర్‌డీటీసీ స్థాపనకు 3 ఎకరాల భూమి అవసరం కాగా, ఒక్కో కేంద్రానికి రూ. 5 కోట్లు వరకు నిధులు కేటాయిస్తారు.

ఈ కేంద్రాల ఏర్పాటులో ఆసక్తి ఉన్న వ్యక్తులు లేదా సంస్థలు తమ జిల్లా కలెక్టర్లకు దరఖాస్తులు సమర్పించాలి.

దరఖాస్తుల స్థితి

ఇప్పటికే ఎన్టీఆర్, శ్రీకాకుళం, నెల్లూరు జిల్లాల నుంచి రెండేసి దరఖాస్తులు, అలాగే అనంతపురం, కృష్ణా, తిరుపతి, పశ్చిమగోదావరి, బాపట్ల, కాకినాడ జిల్లాల నుంచి ఒక్కో దరఖాస్తు అందినట్లు సమాచారం.
వీటిలో అనంతపురం జిల్లాలోని ఒక డీటీసీకి కేంద్రం ఇప్పటికే ఆమోదం తెలిపింది.

అయితే ఇప్పటివరకు ఆర్‌డీటీసీ ఏర్పాటుకు ఒక్క దరఖాస్తు కూడా రాలేదు. దరఖాస్తులను జనవరి చివరి వరకు స్వీకరించి, ఫిబ్రవరి నాటికి కేంద్ర ప్రభుత్వానికి పంపేలా రవాణా శాఖ అధికారులు ప్రణాళిక సిద్ధం చేశారు.

రాష్ట్ర ప్రభుత్వం ఈ కేంద్రాలను వచ్చే ఏడాది నాటికి పూర్తిగా అందుబాటులోకి తేవాలనే లక్ష్యంతో కృషి చేస్తోంది.