అనకాపల్లి:
సముద్ర జీవనాధారంపై ఆధారపడిన మత్స్యకారుల జీవితం సాహసాలతో నిండి ఉంటుంది. ప్రతి వేట ప్రయాణంలో వారు ప్రాణాలను పణంగా పెట్టాల్సి వస్తోంది. అలలు, తుఫానులు, మరియు అంచనాలు తప్పిన పరిణామాలతో వారు నిత్యం పోరాడుతున్నారు.
ఇటీవల అనకాపల్లి జిల్లా అచ్చుతాపురం మండలం పూడిమడకకు చెందిన 26 ఏళ్ల యువకుడు చోడపల్లి ఎర్రయ్య తన తమ్ముడు కొర్లయ్యతో పాటు వాసుపల్లి ఎల్లాజీ, కనగాల అప్పలరాజులతో కలిసి చేపల వేటకు వెళ్లాడు. తెల్లవారుజామున సముద్రంలో దాదాపు 30 కిలోమీటర్ల దూరంలో వేట జరుగుతుండగా, వాళ్ల గాలికి సుమారు 100 కిలోల బరువుతో ఉన్న కొమ్ముకోనాం చేప చిక్కింది.
చేపను బోటులోకి లాగే ప్రయత్నంలో ఎర్రయ్యను ఆ చేప నీళ్లలోకి బలంగా లాక్కెళ్లింది. క్షణాల్లో అతను నీటిలో మునిగి గల్లంతయ్యాడు. సమీపంలో ఉన్న మిగతా మత్స్యకారులు తొలుత అతను తిరిగి వస్తాడని ఆశించారు. కానీ ఎంతకీ కనిపించకపోవడంతో అతని సోదరుడు గ్రామానికి సమాచారం ఇచ్చాడు.
గ్రామస్థులు సముద్రంలో విస్తృతంగా గాలించినప్పటికీ ఎర్రయ్య జాడ కనిపించలేదు. గల్లంతైన యువకుడి కోసం ఇంకా గాలింపు చర్యలు కొనసాగుతున్నాయి. ఈ ఘటన పూడిమడక గ్రామాన్ని విషాదంలోకి నెట్టింది. ఎర్రయ్య తల్లి కోదండమ్మ కుమారుడి కోసం కన్నీరు మున్నీరవుతున్నారు.
మత్స్యకారుల ఆవేదన:
ఇటువంటి ప్రమాదాలు తరచూ జరిగినా, వారి భద్రత కోసం ప్రభుత్వం తగిన చర్యలు తీసుకోవడం లేదని మత్స్యకార కుటుంబాలు వాపోతున్నాయి. సముద్ర జీవనోపాధి బారినపడి వారి ప్రాణాలు పోతున్నా పట్టించుకునే నాధుడు లేడని వేదన వ్యక్తం చేస్తున్నారు.
