దేశవ్యాప్తంగా రేపు (గురువారం) భారత్ బంద్ నిర్వహించనున్నారు. కార్మిక సంఘాలు, రైతు సంఘాలు సంయుక్తంగా ఈ బంద్కు పిలుపునిచ్చాయి. ముఖ్యంగా భారత్–అమెరికా వాణిజ్య ఒప్పందం, కేంద్ర ప్రభుత్వం తీసుకొచ్చిన లేబర్ కోడ్లు, ఇతర ఆర్థిక విధానాలకు నిరసనగా ఈ దేశవ్యాప్త సమ్మె జరుగనుంది. తెలుగు రాష్ట్రాల్లోనూ పలు సంఘాలు, వామపక్ష పార్టీలు బంద్కు మద్దతు ప్రకటించడంతో సాధారణ జీవన విధానంపై ప్రభావం పడే అవకాశం కనిపిస్తోంది.
భారత్–అమెరికా ఒప్పందంపై ఆగ్రహం
రైతు సంఘం సంయుక్త కిసాన్ మోర్చా (ఎస్కేఎం) ఈ నెల 12న భారత్ బంద్ నిర్వహించాలని అధికారికంగా పిలుపునిచ్చింది. ఆ సంఘం కన్వీనర్ హన్నన్ మొల్లా మీడియాతో మాట్లాడుతూ భారత్–అమెరికా వాణిజ్య ఒప్పందం దేశ రైతులకు తీవ్ర నష్టం కలిగిస్తుందని ఆరోపించారు. అమెరికా ఒత్తిడికి కేంద్ర ప్రభుత్వం లొంగిపోయిందని విమర్శించారు. ఈ ఒప్పందం వల్ల దేశీయ వ్యవసాయ రంగం దెబ్బతింటుందని, చిన్న రైతులు నష్టపోతారని ఆయన అభిప్రాయపడ్డారు.
లేబర్ కోడ్లు, ఇతర చట్టాలకు వ్యతిరేకంగా సమ్మె
కేంద్రంలోని బీజేపీ ప్రభుత్వం కార్మిక వ్యతిరేక విధానాలు అనుసరిస్తోందని కార్మిక సంఘాలు ఆరోపిస్తున్నాయి. ముఖ్యంగా మోడీ ప్రభుత్వం తీసుకొచ్చిన నాలుగు లేబర్ కోడ్లను రద్దు చేయాలని వారు డిమాండ్ చేస్తున్నారు. అలాగే విద్యుత్ సవరణ చట్టం–2025, వీబీజి రామ్ జీ చట్టం, విత్తన సవరణ బిల్లు, ఎల్ఐసీలో 100 శాతం విదేశీ పెట్టుబడులకు అనుమతి వంటి అంశాలను ఉపసంహరించుకోవాలని డిమాండ్ చేస్తున్నారు. ప్రజావ్యతిరేక విధానాలకు వ్యతిరేకంగానే ఈ సార్వత్రిక సమ్మె నిర్వహిస్తున్నట్లు సంఘాల నేతలు స్పష్టం చేశారు.
తెలుగు రాష్ట్రాల్లోని వామపక్ష పార్టీలు, కార్మిక మరియు విద్యార్థి సంఘాలు ఈ బంద్కు మద్దతు ప్రకటించాయి. సమ్మెను విజయవంతం చేయాలని నేతలు పిలుపునిచ్చారు.
రవాణా వ్యవస్థపై ప్రభావం
బంద్ నేపథ్యంలో రవాణా రంగంపై భారీ ప్రభావం పడే అవకాశముంది. ఆటో డ్రైవర్ల సంఘాలు కూడా బంద్కు మద్దతు ప్రకటించాయి. తెలంగాణ ఆటో, ప్రైవేట్ మోటార్ డ్రైవర్లు, వర్కర్స్ యూనియన్ జేఏసీ రాష్ట్ర కన్వీనర్ వెంకటేశం మాట్లాడుతూ ప్రభుత్వం ఇచ్చిన హామీలను అమలు చేయడం లేదని ఆరోపించారు. కార్మికుల నడుము విరిచే నాలుగు లేబర్ కోడ్లను రద్దు చేయాలని డిమాండ్ చేస్తూ రవాణా రంగ కార్మికులు పెద్ద సంఖ్యలో సమ్మెలో పాల్గొనాలని పిలుపునిచ్చారు.
దీంతో ఆటోలు, కొన్ని ప్రైవేట్ వాహనాలు, సరుకు రవాణా సేవలు నిలిచిపోయే అవకాశముంది. రాష్ట్ర రవాణా సంస్థలపై అధికారిక ప్రకటన వెలువడాల్సి ఉన్నప్పటికీ, కొన్ని ప్రాంతాల్లో బస్సు సర్వీసులపై ప్రభావం ఉండొచ్చని అంచనా వేస్తున్నారు.
బ్యాంకులు, విద్యా సంస్థల పరిస్థితి?
బ్యాంకు ఉద్యోగ సంఘాల నుంచి కూడా బంద్కు సానుకూల స్పందన వస్తున్నట్లు సమాచారం. దీంతో బ్యాంకింగ్ సేవలపై ప్రభావం పడే అవకాశముంది. అయితే అధికారికంగా బ్యాంకులు మూసివేయాలన్న నిర్ణయం వెలువడలేదు. కొన్నిచోట్ల సేవలు పరిమితంగా ఉండవచ్చని తెలుస్తోంది.
ఇక విద్యా సంస్థల విషయానికి వస్తే, ప్రస్తుతం పరీక్షల సమయం కావడంతో పాఠశాలలు, కళాశాలల విషయంలో ప్రభుత్వం నుంచి స్పష్టమైన ప్రకటన రావాల్సి ఉంది. కొన్ని జిల్లాల్లో విద్యార్థుల భద్రత దృష్ట్యా సెలవులు ప్రకటించే అవకాశముంది. అయితే తుది నిర్ణయం స్థానిక అధికారుల ప్రకటనలపై ఆధారపడి ఉంటుంది.
సాధారణ ప్రజలకు సూచనలు
భారత్ బంద్ నేపథ్యంలో ప్రజలు అత్యవసర ప్రయాణాలు తప్ప ఇతర కార్యక్రమాలను వాయిదా వేసుకోవడం మంచిదని అధికారులు సూచిస్తున్నారు. బ్యాంకింగ్ పనులు, ప్రభుత్వ కార్యాలయ పనులు ముందుగానే పూర్తి చేసుకోవాలని సూచిస్తున్నారు. స్థానిక పరిస్థితులపై అప్రమత్తంగా ఉండాలని, అధికారిక ప్రకటనలను గమనించాలని సూచిస్తున్నారు.
దేశవ్యాప్తంగా జరుగనున్న ఈ బంద్ ఎంతవరకు ప్రభావం చూపుతుందన్నది రేపటి పరిస్థితులపై ఆధారపడి ఉంటుంది. తెలుగు రాష్ట్రాల్లో ముఖ్యంగా రవాణా, బ్యాంకింగ్ రంగాలపై ప్రభావం ఎక్కువగా ఉండే అవకాశం కనిపిస్తోంది.
