ఆంధ్రప్రదేశ్లో వాతావరణం ఒక్కసారిగా మారిపోయింది. చలికాలం పూర్తిగా ముగియకముందే పగటి వేళ ఎండలు మండిపోతుండగా, రాత్రి వేళ చలి గాలులు వణికిస్తున్నాయి. పగలు, రాత్రి ఉష్ణోగ్రతల మధ్య తీవ్ర వ్యత్యాసం ఏర్పడటంతో ప్రజలు అయోమయంలో పడుతున్నారు.
పగటిపూట మండుతున్న ఎండలు
గత రెండు రోజులుగా రాష్ట్రవ్యాప్తంగా పగటి ఉష్ణోగ్రతలు క్రమంగా పెరుగుతున్నాయి. ముఖ్యంగా పట్టణ ప్రాంతాల్లో మధ్యాహ్నం వేళ భానుడు భగభగ మండిపోతున్నాడు. ఎండ తీవ్రతకు తోడు వాహనాల పొగ, కాలుష్యం కలిసి ప్రజలను ఉక్కిరిబిక్కిరి చేస్తున్నాయి. బయట పనులకు వెళ్లే వారు తీవ్ర ఇబ్బందులు ఎదుర్కొంటున్నారు.
రాత్రివేళ తగ్గని చలి
పగలు ఎండతో ఇబ్బంది పడుతున్న ప్రజలకు రాత్రివేళ కూడా ఉపశమనం లభించడం లేదు. చలిగాలులు వీయడంతో చలి తీవ్రత కొనసాగుతోంది. దీంతో పగలు, రాత్రి ఉష్ణోగ్రతల మధ్య భారీ తేడా ఏర్పడుతోంది. ఈ పరిస్థితి పిల్లలు, వృద్ధులు, దీర్ఘకాలిక వ్యాధులతో బాధపడే వారిపై ప్రతికూల ప్రభావం చూపే అవకాశం ఉందని వైద్యులు హెచ్చరిస్తున్నారు.
సాధారణం కంటే అధికంగా ఉష్ణోగ్రతలు
వాతావరణ శాఖ విడుదల చేసిన ప్రకటన ప్రకారం.. ఏపీలోని పలు ప్రాంతాల్లో గరిష్ట ఉష్ణోగ్రతలు సాధారణం కంటే 3 నుంచి 5 డిగ్రీలు అధికంగా నమోదవుతున్నాయి. కృష్ణా జిల్లా నందిగామలో గరిష్టంగా 33.1 డిగ్రీల సెల్సియస్ ఉష్ణోగ్రత నమోదైంది. అలాగే రాబోయే మూడు రోజుల పాటు రాయలసీమ ప్రాంతాల్లో ఉష్ణోగ్రతలు మరో 3 నుంచి 4 డిగ్రీలు పెరిగే అవకాశం ఉందని అమరావతి వాతావరణ శాఖ అంచనా వేస్తోంది.
ఏజెన్సీ ప్రాంతాల్లో ఇంకా చలి
ఎండ తీవ్రత పెరుగుతున్నప్పటికీ, ఏపీలోని ఏజెన్సీ ప్రాంతాల్లో మాత్రం చలి ఇంకా పూర్తిగా తగ్గలేదు. అల్లూరి సీతారామరాజు జిల్లా జి.మాడుగులలో కనిష్టంగా 7.1 డిగ్రీల సెల్సియస్ ఉష్ణోగ్రతలు నమోదయ్యాయి. ఎత్తైన కొండ ప్రాంతాల్లో ఉదయం వేళ పొగ మంచు, చలి కారణంగా ప్రజలు ఇళ్ల నుంచి బయటకు రావడానికే ఇబ్బందులు పడుతున్నారు.
దక్షిణాంధ్రలో తేలికపాటి వర్షాలు
వాతావరణంలో చోటు చేసుకున్న మార్పుల కారణంగా దక్షిణాంధ్ర ప్రాంతాల్లో తేలికపాటి వర్షాలు కురిశాయి. చిత్తూరు, అన్నమయ్య, శ్రీ సత్యసాయి జిల్లాల్లో చినుకులతో కూడిన వర్షం పడింది. కొన్ని చోట్ల పంటలపై స్వల్ప ప్రభావం కనిపించగా, రైతులు వాతావరణ మార్పులపై ఆందోళన వ్యక్తం చేస్తున్నారు.
ప్రజలకు వాతావరణ శాఖ సూచనలు
రానున్న రోజుల్లో ఎండ తీవ్రత మరింత పెరిగే అవకాశం ఉందని వాతావరణ నిపుణులు హెచ్చరిస్తున్నారు. మధ్యాహ్నం 12 గంటల నుంచి 3 గంటల మధ్య బయటకు వెళ్లేటప్పుడు తగిన జాగ్రత్తలు తీసుకోవాలని సూచిస్తున్నారు. తగినంత తాగునీరు తీసుకోవడం, తేలికపాటి ఆహారం తీసుకోవడం, చిన్నారులు మరియు వృద్ధులను నేరుగా ఎండలోకి పంపించకుండా చూసుకోవాలని వాతావరణ శాఖ అధికారులు స్పష్టం చేశారు.
