ప్రపంచవ్యాప్తంగా మధుమేహం మహమ్మారిలా విస్తరిస్తున్న నేపథ్యంలో, తీపి పదార్థాల వినియోగంపై ఉన్న ఆందోళనలకు శాస్త్రవేత్తలు ఒక ఆశాజనక పరిష్కారాన్ని సూచిస్తున్నారు. అమెరికాలోని టఫ్ట్స్ విశ్వవిద్యాలయానికి చెందిన పరిశోధకులు నిర్వహించిన తాజా అధ్యయనం, మధుమేహ వ్యాధిగ్రస్తులకు తీపి విషయంలో కొత్త దారులు తెరచే అవకాశం ఉందని స్పష్టం చేసింది. సాధారణ పంచదార (సుక్రోజ్)కు ప్రత్యామ్నాయంగా ‘టాగటోజ్’ అనే అరుదైన చక్కెరను వినియోగించవచ్చని వారు వెల్లడించారు.
టాగటోజ్ రుచిలో పంచదారకు దాదాపు 92 శాతం సమానంగా ఉన్నప్పటికీ, శరీరంపై చూపే ప్రభావం మాత్రం పూర్తిగా భిన్నంగా ఉంటుంది. సాధారణ చక్కెర తీసుకున్న వెంటనే రక్తంలో గ్లూకోజ్ స్థాయిలు ఒక్కసారిగా పెరిగి, ఇన్సులిన్ స్పైక్ ఏర్పడటం మధుమేహులకు ప్రమాదకరం. అయితే టాగటోజ్ వినియోగంలో అలాంటి ప్రమాదం తక్కువగా ఉంటుందని పరిశోధనలు సూచిస్తున్నాయి. ఇది రక్తంలో చక్కెర స్థాయిలను అకస్మాత్తుగా పెంచకపోవడం వల్ల మధుమేహ నియంత్రణకు తోడ్పడుతుంది.
సహజంగా టాగటోజ్ అనేది కొన్ని పండ్లు, పాల ఉత్పత్తుల్లో అతి స్వల్ప పరిమాణంలో మాత్రమే లభించే అరుదైన చక్కెర. దీని ప్రత్యేకత ఏమిటంటే, సాధారణ పంచదారతో పోలిస్తే ఇందులో దాదాపు 60 శాతం తక్కువ కేలరీలు మాత్రమే ఉంటాయి. అందువల్ల బరువు తగ్గాలనుకునే వారు, ఊబకాయం సమస్యతో బాధపడేవారికి కూడా ఇది ప్రయోజనకరంగా మారే అవకాశం ఉంది. అంతేకాదు, టాగటోజ్ పళ్లు పుచ్చిపోవడానికి కారణం కాకుండా, నోటిలోని హానికరమైన బ్యాక్టీరియా పెరుగుదలను అడ్డుకుంటుందని శాస్త్రవేత్తలు చెబుతున్నారు. ప్రేగులలోని మంచి బ్యాక్టీరియాను పెంపొందించే ప్రోబయోటిక్ లక్షణాలు కూడా ఇందులో ఉన్నట్లు గుర్తించారు.
ఇప్పటి వరకు టాగటోజ్ తయారీ ఖరీదైన ప్రక్రియగా ఉండేది. సహజ వనరుల్లో ఇది చాలా తక్కువగా లభించడం వల్ల, దీని ధర సామాన్యులకు అందని స్థాయిలో ఉండేది. అయితే ఈ సమస్యకు కూడా శాస్త్రవేత్తలు పరిష్కారం కనుగొన్నారు. ‘ఈ.కోలి’ అనే బ్యాక్టీరియాను ఉపయోగించి, గ్లూకోజ్ నుంచి నేరుగా టాగటోజ్ను ఉత్పత్తి చేసే చవకైన బయోసింథటిక్ విధానాన్ని వారు అభివృద్ధి చేశారు. ఈ పద్ధతిలో సుమారు 95 శాతం వరకు అధిక దిగుబడి సాధించవచ్చని పరిశోధకులు చెబుతున్నారు. దీని వల్ల భవిష్యత్తులో టీ, కాఫీ, స్వీట్లు, బేకరీ ఉత్పత్తులు, కూల్డ్రింక్స్లలో పంచదారకు బదులుగా టాగటోజ్ను తక్కువ ధరకు వినియోగించే అవకాశం ఏర్పడనుంది.
ఈ ఆవిష్కరణ ప్రభావం కేవలం మధుమేహ వ్యాధిగ్రస్తులకే పరిమితం కాదని నిపుణులు అభిప్రాయపడుతున్నారు. ఆహార ఉత్పత్తి రంగంలో కూడా ఇది విప్లవాత్మక మార్పులకు దారితీయనుంది. సాధారణంగా చాలా ఆర్టిఫిషియల్ స్వీటెనర్లు వంట చేసేటప్పుడు పంచదారలా కరిగిపోవు, బ్రౌనింగ్ ప్రభావం చూపవు. కానీ టాగటోజ్ మాత్రం అచ్చం పంచదారలాగే ప్రవర్తిస్తుంది. కేకులు, బిస్కెట్లు వంటి బేకరీ ఉత్పత్తుల్లోనూ రుచిలో ఎలాంటి తేడా లేకుండా దీనిని వినియోగించవచ్చు.
రుచిని త్యాగం చేయకుండా మధుమేహం, ఊబకాయం వంటి జీవనశైలి వ్యాధులను నియంత్రించే శక్తివంతమైన ప్రత్యామ్నాయంగా టాగటోజ్ నిలుస్తుందని వైద్య నిపుణులు ఆశాభావం వ్యక్తం చేస్తున్నారు. టాగటోజ్ ఉత్పత్తి సామాన్యులకు అందుబాటులోకి వస్తే, తీపి పదార్థాల వల్ల కలిగే అనేక అనారోగ్య సమస్యలకు అడ్డుకట్ట వేయవచ్చు. ముఖ్యంగా మధుమేహులు భయం లేకుండా తీపిని ఆస్వాదించే రోజులు ఇక దూరంలో లేవన్న నమ్మకం వ్యక్తమవుతోంది.
