వృద్ధాప్యం… అనే మాట వినగానే చాలామంది మనసులో చిన్న భయం మొదలవుతుంది. శరీరంలోని కాంతి తగ్గిపోవడం, ఉత్సాహం తగ్గడం, అనేక ఆరోగ్య సమస్యలు రావడం—ఈ అన్నింటి వల్లే యవ్వనం ఎప్పటికి నిలిచి ఉంటే ఎంత బావుంటుందో అని ప్రతి ఒక్కరూ కోరుకుంటారు. గత ఎన్నో దశాబ్దాలుగా ప్రపంచవ్యాప్తంగా శాస్త్రవేత్తలు వృద్ధాప్యాన్ని అడ్డుకునే మందులు, ట్రీట్మెంట్లు, వ్యాక్సిన్లు అభివృద్ధి చేసే పనిలో నిమగ్నమై ఉన్నప్పటికీ పెద్దగా ఎలాంటి ప్రగతి కనిపించలేదు.
కానీ తాజాగా, అమెరికాలోని ఫ్లోరిడా రాష్ట్రం – మయామిలో ఉన్న ఇమ్మోర్టా బయో అనే బయోటెక్నాలజీ కంపెనీ శాస్త్రవేత్తలు ఈ రంగంలో ఒక పెద్ద ముందడుగు వేసినట్టు ప్రకటించారు. వృద్ధాప్యాన్ని నియంత్రించడంతో పాటు, శరీరంలో వృద్ధాప్య కణాలను తొలగించే ప్రత్యేకమైన వ్యాక్సిన్ను అభివృద్ధి చేసినట్లు వెల్లడించారు. ఈ వ్యాక్సిన్కి ‘సెనోవాక్స్’ (SenoVax) అని పేరు పెట్టారు. ఇప్పటికే జంతువులపై జరిగిన ప్రయోగాలు ప్రామిసింగ్ రిజల్ట్స్ ఇచ్చాయి. దీంతో మానవులపై క్లినికల్ ట్రయల్స్ నిర్వహించేందుకు శాస్త్రవేత్తలు సిద్ధమవుతున్నారు. అంతర్జాతీయ పేటెంట్ హక్కుల కోసం దరఖాస్తు కూడా పూర్తి చేశారు.
శాస్త్రవేత్తల ప్రకారం… “వృద్ధాప్యంపై విజయం సాధించాం”
ఇమ్మోర్టా బయో పరిశోధకుల మాటల్లో—సెనోవాక్స్ వృద్ధాప్యాన్ని మాత్రమే అడ్డుకోదు, శరీర ఆరోగ్యాన్ని మెరుగుపరుస్తుంది, జీవితకాలాన్ని రెట్టింపు చేసే సామర్థ్యం కూడా చూపిస్తుంది. ఈ వ్యాక్సిన్ శరీరంలోకి వెళ్లిన వెంటనే రోగనిరోధక వ్యవస్థను ట్యూన్ చేసి సెనెసెంట్ సెల్స్ (వృద్ధాప్య కణాలు)ను గుర్తించి వాటిని నాశనం చేయడంలో సహాయపడుతుంది. ఈ కణాలే వృద్ధాప్యం, అవయవాల బలహీనత, రోగనిరోధకత తగ్గిపోవడం, క్యాన్సర్ వంటి సమస్యలకు మూల కారణమని శాస్త్రవేత్తలు చెబుతారు. వాటిని తొలగించగలిగితే శరీరం ఎక్కువ కాలం యవ్వనంగా పనిచేస్తుందని అభిప్రాయపడుతున్నారు.
క్యాన్సర్ను కూడా ఎదుర్కోనున్న సెనోవాక్స్
ఇప్పటికే నిర్వహించిన ప్రీక్లినికల్ పరీక్షల్లో సెనోవాక్స్ క్యాన్సర్ ట్యూమర్ల పెరుగుదలను అణిచివేసిందని పరిశోధకులు వెల్లడించారు. ట్యూమర్లకు మద్దతు ఇచ్చే సెనెసెంట్ సెల్స్ను బలహీనపరిచే సామర్థ్యాన్ని ఈ వ్యాక్సిన్ చూపించింది. జంతువులపై జరిగిన ప్రయోగాల్లో వాటి జీవితకాలం 100% వరకు పెరిగినట్లు నమోదు చేశారు. ఈ ఫలితాలు శాస్త్ర ప్రపంచాన్ని ఆశ్చర్యానికి గురిచేశాయి.
స్టెమ్సెల్ థెరపీతో కలిపి మరింత శక్తివంతం
మానవులపై ట్రయల్స్కు ముందుగా, శాస్త్రవేత్తలు సెనోవాక్స్ను స్టెమ్సెల్ రివైవ్ థెరపీలతో కలిపి ఉపయోగించాలని యోచిస్తున్నారు. ఎందుకంటే స్టెమ్ సెల్స్ శరీరంలోని దెబ్బతిన్న కణాలను పునరుద్ధరించే సామర్థ్యాన్ని పెంచుతాయి. యంగ్ స్టెమ్ సెల్స్తో కణాలను రీజనరేట్ చేయడం ద్వారా మరింత ఫలప్రదమైన రిజల్ట్లు వచ్చే అవకాశముందన్నారు.
వైద్యశాస్త్రంలో కొత్త అద్భుతం దిశగా?
సెనోవాక్స్ మానవులపై ట్రయల్స్లో కూడా సక్సెస్ అయితే, ప్రపంచ వైద్య చరిత్రలో ఇది ఒక మహత్తరమైన అద్భుతంగా నిలుస్తుందని పరిశోధకులు అంటున్నారు. వృద్ధాప్యాన్ని నెమ్మదింపజేసే పద్ధతులు ఇప్పటివరకు ఉన్నప్పటికీ, వృద్ధాప్య కణాలను నేరుగా లక్ష్యంగా చేసుకొని, జీవితకాలాన్ని పెంచే వ్యాక్సిన్ అభివృద్ధి కావడం ఇదే మొదటిసారి.
మొత్తానికి… మానవుల యవ్వనాన్ని ఎక్కువకాలం నిలిపిపెట్టే దిశగా ప్రపంచం ఒక్క అడుగు దూరంలో ఉన్నట్టే కనిపిస్తోంది.
