ఆంధ్రప్రదేశ్ రాజకీయాల్లో మరో కీలక పరిణామానికి రంగం సిద్ధం అవుతున్న సంకేతాలు కనిపిస్తున్నాయి. దివంగత కాపు నాయకుడు వంగవీటి మోహనరంగా కుమార్తె ఆశా కిరణ్ రాజకీయ ప్రస్థానానికి పునాది వేస్తున్నట్లు రాజకీయ వర్గాల్లో జోరుగా చర్చ నడుస్తోంది. పైకి రాజకీయాలకు దూరంగా ఉన్నానని, సేవా కార్యక్రమాలే తన ధ్యేయమని చెబుతున్నా—అంతర్గతంగా మాత్రం కొత్త రాజకీయ సమీకరణలకు మార్గం సుగమం చేస్తున్నట్లు తెలుస్తోంది. ఈ క్రమంలోనే ఆమె విజయవాడ నుంచి నేరుగా విశాఖవైపు దృష్టి మళ్లించి ఓ భారీ సభను ప్లాన్ చేశారు.
డిసెంబరు 26న విశాఖపట్టణంలో ‘రంగనాడు’ పేరిట ఆవిష్కరించనున్న ఈ బహిరంగ సభకు సంబంధించి ఆశా కిరణ్ అధికారికంగా ప్రకటించారు. రాధా రంగా రాయల్ అసోసియేషన్ ఆధ్వర్యంలో రంగనాడు పోస్టర్ను ఆవిష్కరించిన ఆమె—రాధా రంగా మిత్ర మండలి సభ్యులను ఒక కుటుంబంలా చూస్తున్నానని చెప్పారు. కుల, మత, రాజకీయాలకు అతీతంగా విశాఖలో ఈ సభ నిర్వహిస్తున్నామని, ఇది పూర్తిగా రంగా అభిమానులకోసం మాత్రమే ఏర్పాటు చేస్తున్నామని స్పష్టం చేశారు.
అన్ని పార్టీల్లో ఉన్న రంగా అభిమానులు ఈ సభకు హాజరవ్వాలని పిలుపునిచ్చారు.
‘‘చేయి చేయి కలుపు… చేజారదు గెలుపు’’—మోహనరంగా ఇచ్చిన ఈ నినాదాన్ని తిరిగి ప్రజల్లోకి తీసుకెళ్తామని, రాష్ట్రవ్యాప్తంగా రాధా రంగా మిత్ర మండలిని మరింత బలోపేతం చేస్తామని ఆశా కిరణ్ తెలిపారు. ప్రస్తుతం ఎటువంటి రాజకీయ నిర్ణయం తీసుకోలేదని, రాధారంగ మిత్ర మండలి తరఫున సేవా కార్యక్రమాల కోసం మాత్రమే ముందుకొస్తున్నానని ఆమె స్పష్టం చేశారు. తాను ఏ రాజకీయ పార్టీతోనూ ప్రస్తుతం అనుబంధం లేదని, పూర్తిగా చారిటబుల్ కార్యకలాపాల ద్వారానే ప్రజలకు చేరువయ్యే ఉద్దేశ్యంతో పని చేస్తున్నానని తెలిపారు.
తాను విశాఖ సభలో ఎటువంటి రాజకీయ ప్రకటన చేయబోనని, ఏ పార్టీకి చేరే యోచన ప్రస్తుతం లేదని ఆమె ఖచ్చితంగా చెప్పారు. రంగా ఆశయాలను ముందుకు తీసుకెళ్లేవారందరూ ఆయన నిజమైన వారసులేనన్నారు. అన్న వంగవీటి రాధాకృష్ణతో ఎటువంటి విభేదాలు లేవని, అనవసర గాసిప్స్ ప్రచారం చేయవద్దని మీడియా, ప్రజలను కోరారు. విశాఖలో జరగబోయే ఈ సభకు రాధాకృష్ణను ఆహ్వానించినట్లు కూడా వెల్లడించారు.
తదుపరి మూడు సంవత్సరాల పాటు తాను చేసే సేవా కార్యక్రమాలు, ప్రజా సేవే తన అసలు ప్రమాణం అవుతుందని, రాధా రంగా మిత్ర మండలి పెద్దల సూచనలు, మార్గదర్శకత్వం మేరకే భవిష్యత్ రాజకీయ నిర్ణయం తీసుకుంటానని ఆశా కిరణ్ తెలిపారు. ప్రజల అభిప్రాయం, మిత్ర మండలి మార్గనిర్దేశం—ఇవి రెండూ కలిసి వచ్చినప్పుడే తన తదుపరి దిశ స్పష్టమవుతుందని ఆశా కిరణ్ పేర్కొన్నారు.
