హైదరాబాద్ పాతబస్తీలో మరోసారి భారీ అగ్నిప్రమాదం సంభవించి అక్కడి ప్రజలను భయాందోళనకు గురిచేసింది. శాలిబండ ప్రాంతంలోని లాల్ దర్వాజ క్రాస్ రోడ్ సమీపంలో ఉన్న గోమతి ఎలక్ట్రానిక్స్ షోరూంలో అకస్మాత్తుగా మంటలు చెలరేగి క్షణాల్లోనే భారీగా వ్యాపించాయి. ఎగిసిపడుతున్న మంటలతో షాపు మొత్తం మునిగిపోయిన దృశ్యాలు స్థానికులను ఆందోళనకు గురి చేశాయి.

మంటల తీవ్రత కారణంగా గ్యాస్ సిలిండర్లు పేలుతున్నట్లు వరుసగా శబ్దాలు వినిపించాయని అక్కడి ప్రజలు చెబుతున్నారు. ఈ శబ్దాల వల్ల సమీప ప్రాంతాల్లో భయం మరింత పెరిగింది. ఘటన సమాచారం అందుకున్న వెంటనే అగ్నిమాపక శాఖ అక్కడికి చేరుకుని 8 ఫైర్ ఇంజిన్లతో మంటలను అదుపులోకి తీసుకునే ప్రయత్నం ప్రారంభించింది. రెండు అంతస్తులు కలిగిన ఈ ఎలక్ట్రానిక్స్ షోరూంలో ఎక్కువసంఖ్యలో ఎలక్ట్రానిక్ పరికరాలు, ప్యాకింగ్ మెటీరియల్ ఉండటంతో మంటలు అదుపులోకి రావడం కష్టంగా మారింది.

పోలీసులు కూడా వెంటనే ఘటనాస్థలికి చేరుకుని సహాయక చర్యలు చేపట్టారు. పక్క షాపులు, ఇళ్లలో ఉన్న వారిని ముందుజాగ్రత్తగా ఖాళీ చేయించారు. మంటలు పెరుగుతూ పక్క భవనాలకు వ్యాపించే అవకాశం ఉండటంతో స్థానికులు భయాందోళనతో పరుగులు తీశారు.

అగ్నిప్రమాదం ప్రభావంతో చార్మినార్ ప్రాంతం మొత్తం ట్రాఫిక్ జామ్ అయింది. ప్రధాన రహదారులపై భారీగా వాహనాలు నిలిచిపోయాయి. వాహనదారులు గంటల తరబడి ఇబ్బందులు ఎదుర్కొన్నారు. ట్రాఫిక్ నియంత్రణ కోసం పోలీసులు భారీగా మోహరించారు.

అగ్నిప్రమాదానికి గల స్పష్టమైన కారణాలు ఇంకా తెలియరాలేదు. ఎలాంటి ప్రాణనష్టం జరిగినదీ లేదా షోరూంలో ఎంత మేర నష్టం జరిగినదీ వివరాలు బయటకు రావాల్సి ఉంది. అగ్నిమాపక సిబ్బంది మంటలను అదుపులోకి తీసుకొచ్చిన తర్వాత పూర్తి వివరాలు వెల్లడించే అవకాశం ఉంది.