నెలసరి సమయంలో చాలా మంది మహిళలు పొత్తికడుపు నొప్పి, నడుం నొప్పి, అలసట, మూడ్ స్వింగ్స్ వంటి ఇబ్బందులను ఎదుర్కొంటారు. కొందరికి ఈ నొప్పులు తీవ్రంగా ఉంటాయి. తాత్కాలిక ఉపశమనానికి మందులు వాడుతుంటారు కానీ, నిపుణుల సూచనల ప్రకారం ఆహారపు అలవాట్లలో చిన్న మార్పులు చేసుకుంటే ఈ నొప్పులను సహజంగా తగ్గించుకోవచ్చు.
రాగులు (Finger Millet) ఆహారంలో చేర్చుకోవడం ద్వారా పీరియడ్స్ సమయంలో కలిగే అసౌకర్యాన్ని తగ్గించవచ్చని ఆరోగ్య నిపుణులు చెబుతున్నారు. రాగిలో ఉన్న కాల్షియం, ఐరన్, ఫైబర్, మెగ్నీషియం వంటి పోషకాలు గర్భాశయ కండరాలకు సాంత్వననిస్తూ, శక్తి స్థాయిని పెంచుతాయి.
రాగుల్లోని కాల్షియం గర్భాశయ కండరాలకు బలం
రాగుల్లో కాల్షియం అధికంగా ఉంటుంది. ప్రతి 100 గ్రాముల రాగిలో సుమారు 344 mg కాల్షియం ఉంటుంది — ఇది పాలు కంటే ఎక్కువ. కాల్షియం గర్భాశయ కండరాల సంకోచాలను నియంత్రిస్తుంది. దీనివల్ల కడుపు నొప్పి, తిమ్మిరి తగ్గుతాయి. Obstetrics & Gynecology Science పత్రికలో ప్రచురించిన ఒక అధ్యయనం ప్రకారం, తగినంత కాల్షియం తీసుకోవడం పీరియడ్స్ నొప్పిని గణనీయంగా తగ్గిస్తుంది.
ఐరన్ సమృద్ధిగా ఉండటం వల్ల అలసట తగ్గుతుంది
నెలసరి సమయంలో ఎక్కువ రక్తస్రావం జరగడం వల్ల ఐరన్ లోపం ఏర్పడుతుంది. దీని వల్ల అలసట, బలహీనత, తలతిరుగుడు వంటి సమస్యలు వస్తాయి. రాగుల్లో ఐరన్ అధికంగా ఉండటం వల్ల ఈ సమస్యలు తగ్గుతాయి. ముఖ్యంగా మొలకెత్తిన రాగులు ఐరన్ శాతం మరింత పెంచుతాయి. ఐరన్ శరీరంలో ఆక్సిజన్ రవాణా మెరుగుపరుస్తూ, కండరాల తిమ్మిరిని తగ్గిస్తుంది.
ఫైబర్ హార్మోన్ల సమతుల్యతకు తోడ్పడుతుంది
రాగులు అధికంగా ఫైబర్ను కలిగి ఉంటాయి. Journal of Food Science and Technology ప్రకారం, రాగుల్లో 15–20% ఆహార ఫైబర్ ఉంటుంది. ఇది ఈస్ట్రోజెన్, ప్రొజెస్టెరాన్ హార్మోన్ల స్థాయిలను సరిగ్గా నిలుపుతుంది. ఫైబర్ రిచ్ ఫుడ్స్ ఉబ్బరం, మానసిక ఒత్తిడి, నొప్పులు, ప్రీమెన్స్ట్రువల్ సిండ్రోమ్ (PMS) వంటి లక్షణాలను తగ్గించడంలో సహాయపడతాయి.
మెగ్నీషియం కండరాలకు రిలాక్సేషన్ ఇస్తుంది
రాగుల్లో అధికంగా ఉండే మెగ్నీషియం సహజ కండరాల రిలాక్సర్గా పనిచేస్తుంది. ఇది ఇన్ఫ్లమేషన్, కండరాల సంకోచాలను తగ్గిస్తుంది. నెలసరి నొప్పులను తగ్గించడంలో మెగ్నీషియం ముఖ్యపాత్ర పోషిస్తుంది. క్రమంగా రాగులను ఆహారంలో చేర్చుకుంటే పీరియడ్స్ సమయంలో కలిగే అసౌకర్యం తగ్గిపోతుంది.
యాంటీఆక్సిడెంట్లు ఒత్తిడిని తగ్గిస్తాయి
రాగుల్లో ఉన్న పాలీఫెనాల్స్, ఫ్లేవనాయిడ్లు వంటి శక్తివంతమైన యాంటీఆక్సిడెంట్లు శరీరంలోని ఆక్సిడేటివ్ స్ట్రెస్, ఇన్ఫ్లమేషన్ను తగ్గిస్తాయి. ఇవి గర్భాశయ కండరాల పనితీరును మెరుగుపరుస్తూ, నొప్పులను తగ్గించడంలో సహాయపడతాయి.
రాగులు ఎప్పుడు తినడం మంచిది?
నిపుణుల ప్రకారం, పీరియడ్స్ రాకముందు కొన్ని రోజుల నుంచే రాగులను ఆహారంలో చేర్చుకోవడం ఉత్తమం. రాగి జావ, రాగి ముద్ద, రాగి పిండి దోసెల రూపంలో తీసుకోవచ్చు. నెలసరి సమయంలోనూ రాగులను తీసుకోవడం ద్వారా శరీరానికి అవసరమైన కాల్షియం, మెగ్నీషియం లభించి నొప్పి తగ్గుతుంది.
గమనిక: ఈ సమాచారం వైద్యుల సలహా, పరిశోధనల ఆధారంగా అందించబడింది. పీరియడ్స్ నొప్పి లేదా ఇతర ఆరోగ్య సమస్యలు తీవ్రంగా ఉంటే తప్పనిసరిగా వైద్యులను సంప్రదించండి.
