ఆంధ్రప్రదేశ్లో బీసీ వర్గాల అభివృద్ధికి ముఖ్యంగా దోహదపడే ‘ఆదరణ–3’ పథకం అమలుపై బీసీ సంక్షేమశాఖ మంత్రి సవిత కీలక ప్రకటన చేశారు. ఈ పథకాన్ని త్వరలోనే అమలు చేయనున్నట్టు తెలిపారు. దీని కోసం రాష్ట్ర ప్రభుత్వం రూ.1,000 కోట్లు కేటాయించినట్లు మంత్రి వెల్లడించారు.
గొల్లపూడిలోని బీసీ భవన్లో వివిధ బీసీ కుల కార్పొరేషన్ల ఛైర్మన్లు, డైరెక్టర్లతో సమావేశం నిర్వహించిన మంత్రి సవిత, ‘ఆదరణ–3’ పథకం అమలు రూపురేఖలపై సమగ్ర చర్చ జరిపారు. ఈ సందర్భంగా చేతివృత్తులు, కులవృత్తులు చేసుకునే వారికి ఆధునిక యంత్రాలు, పరికరాలు అందించడం ద్వారా వారి ఆదాయం పెరగడమే ఈ పథకం ప్రధాన లక్ష్యమని చెప్పారు.
ఆమె మాట్లాడుతూ – “ఆదరణ–3 పథకం ద్వారా వృత్తిదారులు ఆర్థికంగా బలపడటమే కాకుండా, ఆధునిక పరికరాల వినియోగంతో మరింత నాణ్యతతో పనులు చేయగలుగుతారు. ఈ పథకం అమలులో బీసీ కార్పొరేషన్ల పాత్ర అత్యంత కీలకం. వారి పర్యవేక్షణలోనే కార్యక్రమాన్ని ముందుకు తీసుకెళ్తాం” అని పేర్కొన్నారు.
మూడు రోజులపాటు జరగనున్న ఈ వర్క్షాప్లో పాల్గొన్న ఛైర్మన్లు, డైరెక్టర్ల సూచనల ఆధారంగా పథకాన్ని అధికారికంగా ప్రారంభిస్తామని మంత్రి తెలిపారు. ఈ పథకం వృత్తిదారులందరికీ ఉపయుక్తమవుతుందని, బీసీ కార్పొరేషన్ల ఆధ్వర్యంలో అన్ని పథకాలను పారదర్శకంగా అమలు చేస్తామని హామీ ఇచ్చారు.
ఇక, ఆదరణ–3 పథకంలో ఒక ముఖ్యమైన మార్పు ఏమిటంటే – లబ్ధిదారులు తాము అవసరమైన పరికరాలను స్వయంగా ఎంపిక చేసుకోవచ్చు. గతంలో ప్రభుత్వం ఎంపిక చేసిన పరికరాలకే పరిమితమై ఉండాల్సి వచ్చేది. కానీ ఇప్పుడు వారి అభిప్రాయాలకు ప్రాధాన్యత ఇస్తూ, పరికరాల ఎంపిక స్వేచ్ఛను కల్పిస్తున్నారు.
ఆదరణ–2 పథకంలో లబ్ధిదారులు పరికరాల మొత్తం ధరలో 10 శాతం మాత్రమే చెల్లించి, 90 శాతం రాయితీ పొందేవారు. అదే విధంగా, గీత కార్మికులకు ద్విచక్ర వాహనాలు మరియు వృత్తిపరమైన పరికరాలు అందించడానికి కూడా ప్రభుత్వం చర్యలు తీసుకుంటోంది. ఉదాహరణకు, రూ.1 లక్ష విలువైన బైక్కు లబ్ధిదారు కేవలం రూ.10 వేలే చెల్లిస్తే సరిపోతుంది. చిన్న పరికరాల విషయంలో ఈ సబ్సిడీ మరింత ఎక్కువగా ఉంటుంది.
అలాగే గీత కార్మికులకు మూడు స్లాబులలో లోన్ సౌకర్యం కల్పించనున్నట్టు మంత్రి వెల్లడించారు. రాష్ట్రంలో వృత్తుల ఆధారంగా పరికరాల పంపిణీ జరుగుతుంది. ఈ విధానం ద్వారా కులవృత్తులు ఆధునికతతో పాటు, స్థిరమైన ఆదాయాన్ని పొందే దిశగా అడుగులు వేయగలుగుతారని అధికారులు భావిస్తున్నారు.
ఇక, ఈ సమావేశం సందర్భంగా నకిలీ మద్యం కేసు అంశంపై కూడా మంత్రి సవిత స్పందించారు. ఈ కేసుపై వైఎస్సార్సీపీ సీబీఐ విచారణ కోరడాన్ని “హాస్యాస్పదం” అని అభివర్ణిస్తూ, “బాబాయి హత్య కేసుపై సీబీఐ దర్యాప్తు కోరటానికి ఎందుకు వెనుకడుతున్నారు?” అని ప్రతిపక్షంపై ప్రశ్నల వర్షం కురిపించారు.
ఆదరణ–3 పథకం అమలుతో బీసీ వర్గాల వృత్తులు అభివృద్ధి చెందుతాయని, ఆర్థిక స్వావలంబన దిశగా పెద్ద అడుగు వేయగలుగుతారని ప్రభుత్వం ఆశిస్తోంది.
